Celtics, No. 1 sa standings, Bucks, pinakamainit na team

ni Anthony E. Servinio @Sports | February 12, 2023

Wala pa ang kanilang bagong kakampi na si Russell Westbrook subalit nagawa ng Utah Jazz na maukit ang 122-116 tagumpay sa Toronto Raptors sa NBA kahapon sa Scotiabank Arena. Nanatiling numero uno sa liga ang Boston Celtics, 127-116, kontra sa Charlotte Hornets at naging unang koponan na may 40 panalo.

Binura ng Jazz ang 111-98 lamang ng Raptors sa huling 5 minuto hanggang tuluyang maagaw ang abante sa three-point play ni Lauri Markkanen pagsapit ng last 2 minutes, 115-114.

Humugot ang Utah ng tig-23 puntos mula kay Markkanen at Walker Kessler habang 22 si Collin Sexton bilang kapalit ng lumiban na si Jordan Clarkson dahil may karamdaman at Westbrook na malakas ang usapan na hindi na maglalaro at bibilhin ang kanyang kontrata upang makabalik sa Los Angeles pero sa panig ng Clippers.

Pinalakas ang Celtics nina Jayson Tatum na may 41 puntos at Derrick White na may 33 puntos at 10 assist. Hindi naglaro si Jaylen Brown dahil nabasag ang buto sa mukha noong isang araw laban sa Philadelphia 76ers subalit hindi siya kailangang operahan.

Ang humahabol na Milwaukee Bucks ang pinakamainit na koponan sa liga ngayon at dinurog ang Clippers, 119-106, para kanilang ika-10 sunod na panalo at kartadang 39-17. Namuno si Giannis Antetokoumpo na may 35 puntos sa 30 minuto lang.

Samantala, itinalaga bilang mga All-Star sina Pascal Siakam ng Toronto Raptors, De’Aaron Fox ng Sacramento Kings at Anthony Edwards ng Minnesota Timberwolves na kapalit ng mga pilay na sina Kevin Durant, Stephen Curry at Zion Williamson. Aakyat sa First Five ang mga naunang ipinangalan na reserbang sina Markannen, Joel Embiid at Ja Morant sa taunang laro sa Pebrero 20.

Splash brothers, angat sa GSW, Bucks, namayani kontra Pacers

ni Anthony E. Servinio @Sports | January 29, 2023

Nanaig ang World Champion Golden State Warriors laban sa bisitang Toronto Raptors, 129-117, sa paghaharap ng mga lumaban sa 2019 Finals bilang bahagi ng NBA Rivals Week kahapon sa Chase Center. Pumutok ng todo ang “Splash Brothers” Stephen Curry at Klay Thompson sa 4th quarter upang umangat ang Warriors sa 25-24.

Inaalagaan ng Warriors ang 98-94 lamang sa simula ng huling quarter at parehong nagsumite ng tig-9 na puntos ang dalawang superstar at ang huling talaan ang siya ring pinakamalaking lamang ng Warriors. Nagtapos si Curry na may 35 puntos at 11 assist na sinundan ni Thompson na may 29 puntos.

Malaking bawi ito para kay Curry na pinatawan ng NBA ng multang $25,000 (P1.361M) bunga ng pagtapon ng mouthpiece sa huli nilang laro kontra Memphis Grizzlies. Tatlong beses lang sa 14 taon pinalabas si Curry sa laro at lahat na ito ay dahil sa mouthpiece kasama ang 2016 Finals kontra Cleveland Cavaliers at noong 2017 na kalaban din ang Memphis.

Ipinagdiwang ni Giannis Antetokounmpo ang kanyang paghirang bilang kapitan ng 2023 All-Star Game at naging susi sa 141-131 pagwagi ng Milwaukee Bucks sa Indiana Pacers. Bago matapos ang first half ay umakyat ng 85-52 ang lamang ng Bucks at sapat na ito.

Double-double si Giannis na 41 puntos, 15 sa first half, at 12 rebound. Nag-ambag ng 20 puntos si Jrue Holiday. Naramdaman ng Cleveland ang pagliban ni All-Star Donovan Mitchell at pinataob sila ng Oklahoma City Thunder, 112-100. Pinatibay ni Shai Gilgeous-Alexander ang dahilan na mapiling reserba sa All-Star sa kanyang 35 puntos.

Sa unang tapatan ngayong taon ng dalawang prangkisa ng Florida, wagi ang Miami Heat sa Orlando Magic, 110-105, sa likod ng 29 puntos ni Jimmy Butler.

LBJ at Giannis, team captains ng 2023 NBA All-Star Game

ni Anthony E. Servinio @Sports | January 28, 2023

Magsisilbing mga kapitan ng 2023 NBA All-Star Game sina LeBron James at Giannis Antetokounmpo matapos nilang maging numero uno ng Western at Eastern Conference sa online botohan sa nakalipas na buwan. Sila ang pipili ng kanilang mga kakampi sa araw mismo ng laro sa Pebrero 20 (petsa sa Pilipinas) sa Vivint Arena na tahanan ng Utah Jazz at kabayan Jordan Clarkson.

Naboto rin bilang mga First Five ang mga guwardiyang sina Stephen Curry, Luka Doncic, Kyrie Irving at Donvan Mitchell at mga forward/center Nikola Jokic, Zion Williamson, Kevin Durant at Jayson Tatum. Maaaring kunin ng mga kapitan ang mga manlalaro buhat sa kabilang conference.

Ito na ang ika-19 na All-Star ni LBJ at hindi pa siya natatalo sa limang beses na hinirang siyang kapitan. Dalawang beses pa lang naging kapitan si Giannis noong 2019 at 2020 at parehong nabigo sa koponan ni LBJ.

Ginamit na batayan sa pagpili ng mga All-Star ang boto ng mga tagahanga (50%), mga mamamahayag (25%) at mga kapwa manlalaro (25%). Ang 30 head coach ng liga ang pipili sa 14 reserba na ipakikilala sa Pebrero 3.

Sa pagpapatuloy ng NBA Rivals Week, itinapal ng New York Knicks sa numero unong Boston Celtics ang bihirang ikatlong sunod na talo, 120-117, sa overtime mula sa TD Garden. Ipinasok nina Julius Randle at RJ Barrett ang apat na free throw sa huling 21 segundo para sa kartadang 27-23 habang bumaba ang Celtics sa 35-15.

Binigo ng bisitang Dallas Mavericks ang Phoenix Suns, 99-95, kahit sa unang 3 minuto lang naglaro si Doncic matapos mapilay ang bukong-bukong. Hindi sumapat ang 40 puntos ni Irving at yumuko ang Brooklyn Nets sa kulelat na Detroit Pistons, 130-122.