Spurs inilaglag ang OKC, finalist na vs. NY Knicks

ni Anthony E. Servinio @Sports | June 1, 2026

Photo: Nag-agawan sa rebounds sina San Antonio Spurs forward Victor Wembanyama (1) at Oklahoma City Thunder center Chet Holmgren (7) sa first half ng NBA basketball playoffs series kahapon. Swak na sa finals ang Spurs. (AP/Nate Billings)

Laro sa Huwebes - Frost Bank

8:30 AM NY vs. SA

Magkakaroon ng bagong NBA World Champion sa ika-walong sunod na taon.  Inalis ng bisitang San Antonio Spurs sa trono ang Oklahoma City Thunder, 111-103, sa winner-take-all Game 7 ng 2026 Western Conference Finals kahapon sa Paycom Center.

Tunay na pagmamay-ari ng Spurs ang laro at nakalasap ng lamang ang Thunder ng dalawang beses lang sa pangatlong quarter.  Huli ang 63-60 pero mag-isang bumira ng 8 puntos si Julian Champagnie upang maagaw ang bentahe at lumayo, 68-63.

Saglit pumalag OKC sa simula ng huling quarter, 82-84.  Iyan ang hudyat para kay Victor Wembanyama at Keldon Johnson na magtulungan upang lumayo muli, 97-86.

Pagkakataon ni kabayan Dylan Harper na nagpasikat sa nalalabing 8 minuto at bumanat ng 5 puntos para maging 107-95.  Sinubukang humirit pa ang Thunder na may 53 segundo pa,  103-109, ngunit hindi nila kakampi ang orasan.

Nagtapos na may 22 si Wemby at siya ang napiling MVP ng serye na may numerong 24.6 puntos at 10.9 rebounds bawat laro.  Sumunod sina Champagnie na may 20 at Stephon Castle na may 16.

Nagtala ng 35 si MVP Shai Gilgeous-Alexander.  Malaking bagay ang pagliban ni Jalen Williams dahil sa pilay at kinapos ang 17 ni Cason Wallace habang tig-12 ang mga reserba Alex Caruso at Jared McCain.

Uuwi na ang Spurs para salubungin ang Eastern Conference kampeon New York Knicks sa seryeng best-of-seven.  Sa Frost Bank Center gaganapin ang unang dalawang laro sa Hunyo 4 at 6 at lilipat sa Madison Square Garden sa 9 at 11.

Huling pumasok ang Knicks sa finals noong 1999 kung saan nanaig ang Spurs, 4-1.  Aabangan ngayon ang tapatan nina Gilas Pilipinas Jordan Clarkson at Harper para maging unang Filipino na may singsing ng kampeon sa NBA.

Isang hakbang na lang sa Thunder finalist na

ni Anthony E. Servinio @Sports | May 28, 2026

Photo: Pinagtulungan si Shai-Gilgeous Alexander ng Oklahoma City Thunder nina Victor Wembanyama at isa pa pagdating sa gitna para i-swak ang bola sa labang ito sa NBA West finals.

Laro sa Biyernes - Frost Bank

8:30 AM OKC vs. SA

Isa na lang ang kailangan ng World Champion Oklahoma City Thunder para bumalik sa NBA Finals! Tinalo nila ang bisitang San Antonio Spurs, 127-114, para sa 3-2 na kalamangan sa 2026 Western Conference Finals kahapon sa Paycom Center.

Itinabi ng Thunder ang kanilang malambot na simula at dalawa lang ang kanilang bentahe matapos ang 12 minuto, 29-27. Kumilos na ang OKC at lumayo, 45-35, sa pangunguna ni Alex Caruso.

Mula roon ay bumanat na si MVP Shai Gilgeous-Alexander ng 12 sa loob ng anim na minuto para maging 69-58 sa pagsara ng pangalawang quarter. Ipinasok ng OKC ang unang siyam ng pangatlong quarter para sa pinakamalaking agwat, 78-58.

Nagtapos si SGA na may 32 puntos na pinakamataas niya sa serye. Sumunod sina Caruso na may 22 at Jared McCain na may 20.

Nagtala ng 24 si Stephon Castle para sa Spurs. Nag-ambag ng 22 si Julian Champagnie at 20 kay Victor Wembanyama.

Ang Game 6 ay lilipat sa Frost Bank Center ngayong Biyernes. Sa mga seryeng best-of-seven na tabla sa 2-2, ang nanaig sa Game 5 ang tuluyang nagwawagi 91% kahit umabot ito ng anim o pitong laro.

Knicks pasok na sa Finals, winalis ang East C'ship

ni Anthony E. Servinio @Sports | May 27, 2026

Photo: Dumadrayb si Jalen Brunson #11 ng New York Knicks paikot kay James Harden #1 at Sam Merrill #5  ng Cleveland Cavaliers sa bahaging ito ng kanilang laro sa NBA Eastern Conference Finals. (Sarah Stier/Getty Images) 

Laro ngayong Miyerkules - Paycom

8:30 AM SA vs. OKC

Magbabalik ang New York Knicks sa NBA Finals matapos ang 27 taon!  Tinalo nila sa ika-apat na sunod na laro ang Cleveland Cavaliers, 130-93 at walisin ang Eastern Conference Finals kahapon sa Rocket Arena.

Nagpamalas agad ng bangis ang Knicks nang burahin 8-2 lamang ng Cavs at kunin ang unang quarter, 38-26 sa mga buslo nina Karl-Anthony Towns, Jalen Brunson, Mikal Bridges at reserba Mitchell Robinson. Hindi nakaporma ang Cleveland at hindi nag-preno ang NY para lalong palakihin ang agwat sa huling apat na minuto, 123-78.

Kahit hindi na siya naglaro sa huling quarter, nagtapos na may 15 si Jalen Brunson para mapiling Eastern Conference Finals MVP.  Gumawa siya ng kabuuang 102 o 25.5 bawat laro sa serye.

Double-double si KAT na 19 at 14 rebounds.  Sumuporta sina OG Anunoby na may 17 at Mikal Bridges na may 15.

Nanguna sa Cleveland si Donovan Mitchell na may 31.  Kinapos ang tulong ng kakampi at sumunod sina Evan Mobley na may 15 at James Harden na may 12.

Mabibiyayaan ng Knicks ng siyam na araw na pahinga at kahit anong mangyari sa Western Conference ay sa Hunyo 4 magsisimula ang seryeng best-of-seven.  Tabla ang World Champion Oklahoma City Thunder at San Antonio Spurs, 2-2, papasok sa mahalagang Game 5 ngayong Miyerkules sa Paycom Center.

Si Gilas Pilipinas Jordan Clarkson ang magiging unang kababayan na maglalaro sa NBA Finals.  Lumipat siya sa NY galing Utah Jazz noong nakaraang Hulyo na puntiryang mabigyan ng singsing bilang kampeon.

Nakamit din ng Knicks ang NBA Cup noong Disyembre laban sa Spurs, 124-113, sa likod ni Cup MVP Brunson. Kung sakaling palarin, sila ang magiging unang dobleng kampeon.