Spurs at Celtics, 3-1 na isa na lang sa playoffs

ni Anthony E. Servinio @Sports | April 28, 2026

Photo: Nabigo sa tangkang pag-swak ng bola si Alperen Sengun (28) ng Houston Rockets habang nakadepensa si Los Angeles Lakers center/forward Jaxson Hayes (11) at forward LeBron James (23) sa 2nd quarter game ng NBA playoffs kahapon sa Toyota Center. (Troy Taormina-Images/Reuters)

Binitin ng Houston Rockets ang martsa ng bisitang Los Angeles Lakers, 115-96 sa 2026 NBA Playoffs kahapon sa Toyota Center. Isang panalo na lang ang kailangan ng San Antonio Spurs at Boston Celtics matapos ang mga impresibong tagumpay.

Unang quarter lang nakasabay ang Lakers at mula roon ay tuloy-tuloy ang arangkada ng Rockets hanggang maging 97-69 maaga sa huling quarter. Ito ang unang panalo ng Houston sa seryeng best-of-seven subalit matapos mahulog sa unang tatlong laro.

Bumanat ng 23 si Amen Thompson habang 20 si Tari Eason. Hindi pa rin naglaro si Kevin Durant dahil masakit ang bukong-bukong.

Umahon ang Spurs mula sa 39-58 butas bago magwakas ang pangalawang quarter at ibinaon ang Portland Trail Blazers 114-93, at itayo ang 3-1 bentahe. Balik-aksyon si Victor Wembanyama at agad uminit para sa 18 ng kanyang 27 sa huling dalawang quarter na may kasamang 12 rebounds at 7 supalpal.

Rumatrat ng 24 3-points ang Celtics para tambakan ang Philadelphia 76ers, 128-96, at lumamang ng 3-1. Anim na tres si reserba Payton Pritchard para pamunuan ang Boston sa kanyang 32 habang nagpatak ng 30 si Jayson Tatum at 20 kay Jaylen Brown.

Sa isa pang serye, panalo ang Toronto Raptors sa bisitang Cleveland Cavaliers, 93-89, para pumantay sa 2-2. Sumandal ang Raptors sa mga paniguradong free throw ni Scottie Barnes sa huling minuto upang magtala ng 23 at tinumbasan ni Brandon Ingram na 23 din.

Samantala kahit lamang ng 3-1 ang Minnesota Timberwolves sa Denver Nuggets, kailangang maghanda silang tapusin ang serye na wala sina Donte DiVincenzo at Anthony Edwards. Napilay ang sakong ni DiVincenzo sa Game 4 at ooperahan na sabay nasaktan ang tuhod ni Edwards at walang linaw kung kailan babalik.

Playoffs: Isa pa sa T'wolves, SGA umangat uli sa Thunder

ni Anthony E. Servinio @Sports | April 27, 2026

Photo: Oklahoma City Thunder / FB

Nagtala ng bagong marka sa puntusan si MVP Shai Gilgeous-Alexander at wagi ang World Champion Oklahoma City Thunder sa Phoenix Suns, 121-109 sa 2026 NBA Playoffs kahapon sa Mortgage Matchup Center. Isang panalo na lang ang kailangan ng Minnesota Timberwolves para pumasok sa susunod na yugto sa bisa ng 112-96 panalo sa Denver Nuggets.

Nagtapos si SGA na may 42 puntos na pinakamarami niya sa playoffs at hinigitan ang 40 kontra Timberwolves sa Game 4 ng 2025 Western Conference Finals. Namuno siya sa malakasang pangalawang quarter kung saan binura nila ang 24-15 lamang ng Suns para maging 62-53 at hindi na sila lumingon.

Maaaring wakasan na ng Thunder ang serye sa Game 4 sa Martes. Kung sakali, haharapin nila ang mananaig sa pagitan ng Los Angeles Lakers at Houston Rockets kung saan lamang din ng 3-0 ang Lakers matapos ang overtime panalo noong Sabado.

Mahigpit ang palitan ng Minnesota at Denver hanggang naglabas ng huling sipa ang Timberwolves at dinomina ang huling quarter. Mula 82-78 ay unti-unting silang lumayo at ang huling iskor ay siya ring pinamalaking agwat.

Nanguna sa Timberwolves si Ayo Dosunmu na may 43 buhat sa limang tres. Ito ang kanyang pinakamarami sa limang taon sa NBA matapos ang 35 noong bahagi siya ng Chicago Bulls sa talo sa Rockets noong Marso 21, 2024.

Sa Eastern Conference, lamang na ang Orlando Magic sa Detroit Pistons matapos kunin ang Game 3, 113-105. Natamasa ng Pistons ang 105-104 lamang pero hindi na sila pinapuntos ng Magic sa nalalabing 2:52.

Bumanat ng limang magkasunod si Franz Wagner na hudyat ng paglayo ng Orlando, 109-104. Nanguna na parehong may 25 sina Paolo Banchero at Desmond Bane.

McCollum bumida sa Hawks 2-1 ang serye, Raptors bumira

ni Anthony E. Servinio @Sports | April 25, 2026

Photo: Atlanta Hawks / Instagram

Bayani si CJ McCollum at wagi muli ang Atlanta Hawks sa New York Knicks, 109-108, sa pagpapatuloy ng 2026 NBA Playoffs kahapon sa State Farm Arena. Umiwas din na mabaon ang Toronto Raptors at Minnesota Timberwolves at parehong wagi sa kanilang mga tahanan.

Bumira mula 16 talampakan si McCollum na may 13 segundo sa orasan at sinundan ito ng agaw ni Jonathan Kuminga kay Jalen Brunson upang mapanatili ang resulta. Lamang ang Knicks, 108-105, pero hindi na sila pumuntos sa huling minuto at sinimulan ng shoot ni Jalen Johnson ang paghabol ng Atlanta at 53 segundo ang nalalabi, 107-108.

Nanguna na may walo ng kanyang 24 sa huling quarter si Johnson. Sumunod si McCollum na may 23 at lamang na ang Hawks sa seryeng best-of-seven, 2-1.

Mahigpit ang palitan pero humataw sa huling quarter ang Raptors laban sa bisitang Cleveland Cavaliers, 126-104. Lamang ang Toronto, 83-81, ngunit biglang bumitaw ang Cavs at pinabayaang magsabog ng 16 walang-sagot na puntos ang Raptors para lumayo, 124-99.

Kabuuang 43 ang naitala ng Toronto sa nakakahilong huling quarter. Parehong 33 sina RJ Barrett at Scottie Barnes para sa una nilang tagumpay matapos kunin ng Cavs ang unang dalawang laro, 126-113 at 115-105.

Sa Western Conference, tagumpay ang Minnesota sa bisitang Denver Nuggets, 113-96, sa Game 3. Kontrolado ng T-Wolves ang buong 48 minuto na nasundan nila ang 119-114 panalo sa Game 2 na ginanap sa Denver. Humugot ang Minny ng hindi inaasahang 25 kay reserba Ayo Dosunmu.