Ginanahan sa sigaw na MVP ng fans, SGA tumaga ng 2-0

ni Anthony E. Servinio @Sports | May 24, 2025

Photo: Shai Gilgeous-Alexander - Oklahoma City Thunder - IG

Sabay-sabay sumisigaw ng “M-V-P” ang mga tagahanga sa Paycom Center at nagtulak ito sa bagong-hirang na MVP Shai Gilgeous-Alexander at Oklahoma City Thunder na humarurot sa 118-103 panalo sa bisitang Minnesota Timberwolves kahapon. Hawak na ng OKC ang nakasasindak na 2-0 lamang sa 2025 NBA Western Conference Finals at lilipat na ang serye sa Target Center para sa susunod na dalawang laro sa Linggo at Martes. 

Tulad ng Game 1 na nagtapos sa 114-88, humataw ang todo ang Thunder sa pangatlong quarter. Biglang lumobo ang kanilang 58-50 lamang sa simula ng nasabing quarter sa 93-69 sa likod ng 11 puntos ni SGA bago humabol ng shoot si Anthony Edwards para isara ang quarter. 

Itinatak ni SGA ang kalidad bilang MVP sa kanyang 38 puntos.  Umani siya ng malaking tulong kay Jalen Williams na may 26 at 10 rebound at Chet Holmgren na may 22. 

Apat na beses lang nahawakan ng Timberwolves ang lamang at ang huli ay 37-36 noong pangalawang quarter. Nagawa nilang ipilit ang 45-45 tabla pero lumayo ng tuluyan ang OKC sa mga buslo nina Isaiah Hartenstein at SGA at ilatag ang pundasyon para sa malupit na pangatlong quarter.

Nanguna sa Minnesota si Edwards na may 32 habang may 22 si Jaden McDaniels.  Hinanap ang opensa ni Julius Randle na nalimitahan sa anim lang matapos ang 28 sa Game 1.

Samantala, sisikapin ng ganadong Indiana Pacers na tumbasan ang 2-0 bentahe ng OKC sa pagharap nila sa New York Knicks sa Game 2 ng East Finals ngayong Sabado sa Madison Square. Naisahan ni Tyrese Haliburton ang mga dating kakampi sa Team USA noong 2023 FIBA World Cup sa MOA Arena na sina Jalen Brunson, Josh Hart at Mikal Bridges patungo sa 138-135 himalang overtime tagumpay sa Game 1 noong Huwebes.  

Pacers inagaw ang Game 1 vs. Knicks sa East Finals

ni Anthony E. Servinio @Sports | May 23, 2025

Photo: Dinumog si Indiana Pacers guard Tyrese Haliburton (0) ng teammates habang nakaaktong hawak ang leeg matapos ang winning shot laban sa New York Knicks sa pagtatapos ng regulation period para makuha ang Game 1 ng NBA basketball Eastern Conference final kahapon sa New York.  (AP Photo/Adam Hunger)

Naglabas ng nakahihilong huling hirit ang bisitang Indiana Pacers sa overtime upang maagaw ang Game 1 ng 2025 NBA Eastern Conference Finals laban sa New York Knicks, 138-135, kahapon sa Madison Square Garden. Kasabay nito ay iginawad ang 2025 MVP kay Shai Gilgeous-Alexander ng numero unong Oklahoma City Thunder.

Ibinalik ng buslo ni Andrew Nembhard ang lamang sa Pacers, 136-135, at 27 segundo ang nalalabi sa overtime. Itinapon ng Knicks ang bola na nagresulta sa dunk ni Obi Toppin para dagdagan ang agwat, 138-135, at nagmintis ang mga tres nina Jalen Brunson at Karl-Anthony Towns sabay ubos ng oras. 

Sinayang ng Knicks ang 111-94 lamang na may 6 na minuto pa sa huling quarter at humabol ang Indiana. Ipinilit ni Tyrese Haliburton ang karagdagang 5 minuto sa three-points kasabay ng busina, 125-125.

Nagtapos na may 31 puntos at 11 assist si Haliburton habang 30 si Aaron Nesmith.  Nagtala ng pito sa kanyang 15 sa overtime si Nembhard. Nawalan ng bisa ang 43 ni Brunson at 35 ni KAT. Ang Game 2 ay sa Sabado sa parehong palaruan at gagawin ng Knicks ang lahat para makaiwas na bumaba sa 0-2 sa seryeng best-of-seven. 

Ito ang unang MVP ni SGA na nagtala ng 32.7 puntos at 6.4 assist sa 76 laro na pinakamataas sa 7 taon sa liga at tinalo ang iba pang nominado Nikola Jokic ng Denver Nuggets at Giannis Antetokounmpo ng Milwaukee Bucks. Siya ang pangatlong Thunder na MVP matapos sina Kevin Durant (2014) at Russell Westbrook (2017). 

Taga-Canada ang bagong MVP at patuloy na ang parangal ay napunta sa isang banyaga matapos ang huling Amerikano James Harden ng Houston Rockets noong 2018.  

Saglit lang malalasap ang karangalan at sasabak ang OKC sa Game 2 ng West Finals ngayong araw sa Paycom Center laban sa bisitang Minnesota Timberwolves. Nagwagi ang Thunder sa Game 1. 

Thunder at Nuggets 2-2, Pacers namumuro na

ni Anthony E. Servinio @Sports | May 13, 2025

Photo: Oklahoma City Thunder vs Nuggets - FB

Higanteng tagumpay ang nauwi ng bisita at numero unong Oklahoma City Thunder laban sa Denver Nuggets, 92-87 at itabla ang 2025 NBA Western Conference Semifinals sa 2-2 kahapon sa Ball Arena. Isang panalo na lang ang kailangan ng Indiana Pacers para pagbakasyunin ang numero uno ng East Cleveland Cavaliers matapos ang 129-109 desisyon sa Game 4. 

Matiyagang humabol ang OKC mula sa 81-73 sa unang minuto ng huling quarter hanggang maagaw ang lamang sa tres ni Cason Wallace at hindi na nila binitawan sa nalalabing 8 minuto, 75-73. Inihatid ni Shai Gilgeous-Alexander ang pandiin na puntos papasok ng huling 2 minuto, 88-81, at sinelyuhan ng apat na free throw ni Jalen Williams sa huling 20 segundo ang resulta. 

Bumawi si SGA mula sa “malamyang” ipinakita sa 104-113 talo sa Game 3 kung saan 18 puntos lang siya. Ngayon, ipinasok niya ang siyam ng kanyang 25 sa huling quarter.  

Double-double si Nikola Jokic na 27 at 13 rebound. Lilipat ang serye sa Paycom Center para sa Game 5 sa Miyerkules at babalik sa Ball para sa Game 6 sa Biyernes at kung kailangan ng Game 7 ay sa Lunes sa Paycom. 

Sa gitna ng pagiging hirap ng mga koponan na ipagtanggol ang tahanan ngayong semifinals, nanigurado ang Pacers at dinomina ang laban para sa 3-1 bentahe sa serye. Nagtala ng 80 ang Indiana matapos ang unang 2 quarter at ang three-point play ni Pascal Siakam sa simula ng pangatlo ang nagtayo ng pinakamalaking agwat, 83-39. 

Nanguna sa atake sina Siakam na may 21 at Myles Turner na may 20 kahit hindi na sila ginamit sa huling quarter. Maaaring tapusin ng Pacers ang serye sa Game 5 sa Huwebes pagdalaw nila sa Rocket Arena.

Matapos magtala ng 41.3 sa unang tatlong laro, nalimitahan si Donovan Mitchell sa 12 lang. Nagtala ng 21 si Darius Garland.