Brown at Tatum namayani sa kampeonato ng Celtics

ni Anthony E. Servinio @Sports | June 19, 2024

Itaas ang ika-18 kampeonato ng Boston Celtics! Nanigurado ang makasaysayang prangkisa at tinambakan ang desperadong bisitang Dallas Mavericks, 106-88, at wakasan ang 2024 NBA Finals sa limang laro, 4-1, kahapon mula sa maingay na TD Garden. 

Ipinasok ni Jrue Holiday ang unang anim na puntos na sinundan ng three-points ni Al Horford para humataw agad ang Celtics, 9-2, at hindi na nila pinatikim ng bentahe ang Mavs. Mula roon ay nagtrabaho na sina Jaylen Brown at Jayson Tatum para sa 31 puntos at tinuldukan ni Payton Pritchard sa milagrong tira mula 50 talampakan ang first half, 67-46. 

Lumobo ang agwat sa 78-52 sa mga puntos nina Horford at Holiday at third quarter ay natatanaw na ang magiging resulta. Bago sumapit ang last 2 minutes ay sumuko na ang Dallas at pinaupo na sina Luka Doncic at Kyrie Irving sa gitna ng 106-85 lamang ng Boston. 

Bumuhos ng 21 puntos si Brown at itinanghal na Finals MVP. Nanguna si Tatum na may 31 puntos at 11 assist habang nag-ambag ng 15 si Holiday at 14 kay Derrick White. 

Nagtala ng 28 at 12 rebound si Luka at sinundan ni Irving na may 15.  Ipinasok ni Josh Green ang lahat ng kanyang 14 sa huling quarter. Nagising ang Celtics mula sa 84-122 talo sa Game 4 at naiwasan ng Mavs na mawalis.  Bago noon ay umarangkada sila sa unang tatlong laro, 107-89, 105-88 at 106-99. 

Iniwan nila ang dating katablang Los Angeles Lakers na may 17 kampeonato.  Ang ibang tropeo ng Celtics ay nakamit noong 1957, 1959 hanggang 1966, 1968, 1969, 1974, 1976, 1981, 1984, 1986 at 2008. 

Para kay Brown, Tatum, White, Pritchard, Horford, Sam Hauser at Luke Kornet, nakabawi sila mula pagkatalo sa Golden State Warriors noong 2022.  Ito rin ang unang kampeonato ni Horford sa kanyang ika-17 taon sa NBA habang sinundan ni Holiday sa kanyang unang taon sa Boston ang singsing niya sa Milwaukee Bucks noong 2021. 

Mavs agaw-buhay sa bingit ng isang panalo ng Celtics

ni Anthony E. Servinio @Sports | June 18, 2024

Laro ngayong Martes – TD Garden

8:30 AM Dallas vs. Boston 

Hindi na kailangang tumingin sa malayo ang Boston Celtics at Dallas Mavericks sa kanilang kinalalagyan papasok ng Game 5 ng 2024 NBA Finals ngayong Martes sa TD Garden simula 8:30 ng umaga. Panalo lang ang kailangan ng Celtics upang itahi ang kanilang ika-18 na World Championship habang agaw-buhay ang Mavs na layunin maging unang NBA koponan na makaahon mula sa 0-3 sa seryeng best-of-seven. 

Noong nakaraang taon, nasa kabilang banda ang Boston at nalugmok sila ng 0-3 sa Eastern Conference Finals laban sa Miami Heat. Nagawang itabla ng Celtics ang serye sa 3-3 subalit nabitin sa Game Seven sa TD, 84-103. Sa panig ng Dallas, umarangkada sila ng 3-0 kontra sa Portland Trail Blazers sa Round 1 ng 2003 Playoffs. Bumangon ng Blazers at ipinilit ang Game 7 kung saan nanaig ang Mavs at maiwasang mapahiya sa sariling tahanan, 107-95.

Balik-2024 at determinado ang Boston na makaganti mula sa 122-84 tambakan na itinapal sa kanila noong Game 4 na pumutol din sa kanilang 10 sunod na tagumpay.  Mas malaking papel ang aasahan mula kay Jaylen Brown (20.8) at Jayson Tatum (20.0) na kahit nalimitahan ang opensa ay mataas pa rin ang kanilang numero sa serye. 

Mahalaga pa rin para kay Luka Doncic (29.5) at Kyrie Irving (21.0) na makahanap ng tulong mula sa mga kakampi. Maaaring makita ito kay PJ Washington (12.5) o Daniel Gafford (8.5) na abala rin na bantayan ang mga matatangkad ng Celtics. Kung magwawagi ang Mavs, ang Game Six ay nakatakda sa Biyernes sa American Airlines Center. Naka-reserba ang TD kung magkakaroon ng Game Seven sa Hunyo 24.  

Mahalaga si Irving sa Game 3 vs. Celtics

ni Anthony E. Servinio @Sports | June 13, 2024

Laro ngayong Huwebes – American Airlines Center

8:30 AM Boston vs. Dallas 

Hindi na kailangang lumayo ng Dallas Mavericks upang makahanap ng paraan na umahon mula sa 0-2 butas nila sa 2024 NBA Finals laban sa rumaragasang Boston Celtics. Nagawa na ito ng beteranong gwardiya Kyrie Irving at mahalaga ang papel na gagampanan niya sa Game 3 ng seryeng best-of-seven ngayong araw sa American Airlines Center simula 8:30 a.m.  

Noong 2016 Finals si Irving at koponan noon na Cleveland Cavaliers ay nabigo sa unang dalawang laro kontra Golden State Warriors. Naiwasan ng Cavs na mawalis sa Game 3 at kahit nadapa sa Game 4 ay nagawang kunin ang sunod na tatlo na tinuldukan ng Game 7 sa Oracle Arena para sa nag-iisang kampeonato ng prangkisa. 

Susubukan na ni Irving na maulit ang milagrong ginawa sa Mavs na umaasa na ang paglaro sa tahanan ay makakatulong ng malaki. Kahit umaapoy si Luka Doncic ng 31.0 puntos at 10.5 rebound sa serye, nalimitahan si Irving sa 14.5 puntos lang kaya dapat dagdagan ito.

Sa panig ng Celtics na nasa gitna ng siyam na sunod-sunod na panalo mula pa noong Mayo, ang pagtayo ng 3-0 bentahe ay halos katiyakan na at walang koponan sa NBA ang nakakabalik mula sa ganoong kalaking pagkalugmok. Perpekto pa rin sila ngayong playoffs at wala pang talo sa anim na laro bilang bisita. 

Limang Boston ang nagsusumite ng mahigit 10 puntos bawat laro na sina Jaylen Brown (21.5), Jrue Holiday (19.0), Jayson Tatum (17.0), Derrick White (16.5) at Kristaps Porzingis (16.0). Malaking tanong kung makakalaro si Porzingis matapos mapilay ang binti sa 3rd quarter ng Game 2. 

Wala itong kinalaman sa nauna niyang pilay noong Game 4 ng serye kontra Miami Heat noong Abril. Dahil dito, mahigit isang buwan siyang lumiban at naglaro muli noong Game 1 laban sa Mavs.