Taas-pasahe sa MRT, next

ni Mai Ancheta | June 21, 2023

Hihirit din ng fare increase ang Metro Rail Transit (MRT) 3, matapos mapagbigyan ng dagdag-pasahe ang Light Rail Transit 1 at 2.

Ito ang kinumpirma ni Department of Transportation Assistant Secretary for railways Sector Jorjette Aquino sa Laging Handa public briefing nitong Martes.

Ayon kay Aquino, nakatakdang isumite ng MRT 3 ang kanilang petisyon sa loob ng dalawang linggo sa DOTr kaya pag-aaralan ang kahilingan ng mga ito.

May mga pamantayan aniyang tinitingnan ang Rail Regulatory Unit ng DOTr sa mga ganitong petisyon para malaman kung nakakatugon o nakakasunod ang MRT 3.

Kabilang sa titingnan ng RRU ay kung sumusunod ang petitioner sa procedural requirements, legal requirements at maging sa teknikal na aspeto partikular na sa serbisyo ng kanilang mga train.

Titingnan din aniya kung ang hinihinging dagdag-pasahe ay naaayon sa kondisyon sa kasalukuyang sitwasyon.

Huling nagtaas ng pasahe ang MRT 3 noong 2015, o walong taon na ang nakaraan.

Hinihiling ng MRT 3 na makapagtaas ng P2.29 bilang dagdag-pasahe sa boarding fee habang P.21 per kilometer naman para sa distance fare.

Libreng sakay sa LRT at MRT

ni Mai Ancheta | June 10, 2023

Magpapatupad ng libreng sakay ang Light Rail Transit 1 at 2 at Metro Rail Transit (MRT) sa Lunes, June 12, sa selebrasyon ng Independence Day.

Ang libreng sakay ay bilang pakikiisa ng Department of Transportation sa ika-125 anibersaryo ng Araw ng Kalayaan.

Ayon kay Transportation Assistant Secretary for Railways and MRT-3 officer-in-charge Jorjette Aquino, ang libreng sakay ay mula alas-7 hanggang alas-9 ng umaga, at alas-5 ng hapon hanggang alas-7 ng gabi.

Sinabi ng opisyal na ang libreng sakay ay taunang ginagawa ng DOTr bilang pakikiisa sa selebrasyon ng Independence day.

Platform barrier sa mga istasyon ng tren

ni Madel Moratillo | April 14, 2023

Inirekomenda na ng Department of Transportation ang paglalagay ng platform barriers sa mga istasyon ng tren.

Kasunod ito ng pagkasawi ng isang 73-anyos na ginang matapos tumalon sa riles habang may paparating na tren.

Ayon kay Transportation Assistant Secretary at MRT-3 officer-in-charge Jorjette Aquino, noong nakaraang administrasyon ay nagkaroon na ng kaparehong proposal pero dahil sa kakulangan sa budget ay hindi ito natuloy.

Kaya ngayon, susubukan aniya nila itong muli.

Tiniyak ng DOTr na ang kanilang security personnel ay mahigpit na ipapatupad ang patakaran na ang mga pasahero ay hindi makatawid sa yellow line sa mga platforms ng train station hangga’t hindi tuluyang nakakahinto ang tren.

Pinaaalalahanan din sila na mahigpit na i-monitor ang mga pasahero kung may kakaibang kinikilos.

Babala ng opisyal, may katapat na penalty sa mga pasaherong sasadyaing pigilin o abalahin ang railway operations.