Mahiya naman daw… SMALL LAUDE, HUMIRIT TUNGKOL SA GHOST PROJECT

ni Mercy Lejarde @Showbiz Talkies | September 17, 2025

Photo: Small Laude - Instagram

Bongga ang ginawang pagpaparinig ng YouTuber, fashion and lifestyle influencer at kilala bilang asawa ng entrepreneur na si Philip Laude na si Small Laude tungkol sa ghost project.

Sa latest YouTube video ni Madam Small ay nag-book siya ng robo taxi sa Los Angeles, California. 

Makikita sa nasabing vlog na naghihintay si Madam Small, kasama ang asawang si Philip at dalawang anak na sina PJ at Allison (unica hija), at ang lagi niyang kasama na si Lotlot.

Dalawang minuto bago dumating ang ibinu-book nilang robo taxi ay nag-dialogue si Madam Small ng, "See you in 2 minutes, pero wala namang driver. Ghost driver naman siya. Pero at least, it's not ghost project.”

Dagdag pa ni Madam Small, "Hello, I'm paying my tax properly and then ganyan kayo? Shame on you, guys."

Samantala, pagsakay ni Madam Small sa robo taxi ay makikita sa video na masaya siya sa bagong experience.

'Yun lang, pagbaba ng robo taxi at pagkatapos nilang kumain ay nalaman niyang nawala ang cellphone niya. Naiwan pala niya sa robo taxi at in fairness, naibalik naman sa kanya nu’ng araw ding 'yun.

Well, bongga si ghost driver, nagbabalik ng naiwang cellphone. 

---

NAGBAHAGI ang professional boxer at former senator na si Manny Pacquiao sa kanyang social media ng larawan nila ng pumanaw na British boxing legend na si Ricky Hatton (RIP).

Nalungkot ang soon-to-be lolo at Pambansang Kamao na si Manny nang mabalitaan niyang pumanaw ang British boxing legend na si Ricky Hatton noong

September 14.

Saad ni Manny sa post niya, "I am deeply saddened to hear about the passing of Ricky Hatton.  

"He was not only a great fighter inside the ring but also a brave and kind man in life.  

"We shared unforgettable moments in boxing history and I will always honor the

respect and sportsmanship he showed. 

"Ricky fought bravely, not just in the ring, but in his journey through life. He truly had a good fight, and we are all blessed to have been part of his wonderful journey. 

"My prayers and deepest condolences go out to the Hatton family and all his loved ones. May the Lord give you strength and comfort in this difficult time. May he rest in peace."

Matatandaan na naglaban sa boxing sina Manny at Ricky noong May 2, 2009 na ginanap sa MGM Grand sa Las Vegas, Nevada, United States.

---

IBIBIDA ng nation’s girl group na BINI ang kanilang makulay na karanasan sa paglibot sa mundo sa kanilang bagong reality series na BINI World Tour Stories na eksklusibong mapapanood sa iWant simula Setyembre 21 (Linggo).

Ibabahagi ng BINI ang kanilang hindi malilimutang experiences mula sa matagumpay at soldout na BINIverse World Tour 2025, na nagsimula sa Philippine Arena at umarangkada rin sa Dubai (United Arab Emirates), London (United Kingdom), at sa iba’t ibang lungsod sa North America gaya ng Toronto (Canada), Washington D.C.,

Hollywood, at Las Vegas (United States).

Mas makikilala rin ng Blooms ang personal na kuwento nina BINI Aiah, Colet, Maloi, Gwen, Stacey, Mikha, Jhoanna, at Sheena tungkol sa pagharap nila sa iba’t ibang pagsubok gaya ng matagal na pagkakalayo sa pamilya at matinding pressure ng kasikatan.

Mapapanood din sa nasabing series kung paano nanatiling matibay ang kanilang samahan bilang isang grupo, na ngayon ay magkakapatid na ang turingan, walang kupas na passion para sa musika, at inspirasyong hinuhugot mula sa kanilang mga pamilya at fans.

‘Yun lang and I thank you.

Sigaw sa mga taxpayers… EDU: WALA TALAGANG PERA NG GOBYERNO, ATIN LAHAT ‘YAN!

ni Mercy Lejarde @Showbiz Talkies | September 9, 2025

Photo: Edu Manzano - IG

What?! Ang aktor na si Edu Manzano, ilang araw na lang ay 70 years old na? 

Hindi makapaniwala si yours truly na sa tikas at ganda ng mukha ng father dearest ni Luis Manzano ay magse-70 years old na pala, ‘noh?

Nagbahagi ang matikas na aktor ng larawan niya na may hawak na mahiwagang payong at may caption that goes: “Turning 70 in a few days pero fit, still on fire, may dumbbell, may rower, at s’yempre, savage tito n’yo… At may payong pang-cover ng corruption, este ulan.”

In fairness, Edu, hindi ka mukhang 70, mukha ka lang 37. Wa’ etch! (smiling emoji).

Anyway, happy birthday, Edu!

Pero kahit na 70 years old na ang mahusay na aktor this coming September 14 ay hindi pa rin niya nakakalimutan na magpaalala na maging mapanuri sa nangyayari sa kapaligiran, lalo na sa ating bansang sinilangan.

Sa social media post ni Edu ay nagbahagi siya ng kanyang saloobin para sa mga ka-taxpayers niya.

Aniya, “Mga ka-taxpayer, tandaan n’yo ‘to, wala talagang ‘pera ng gobyerno’. Pera nating lahat ‘yan! Kaya bawat proyekto, bawat serbisyo, invested tayo d’yan. Sulitin natin, bantayan natin. Obligasyon nila, pero responsibilidad din nating magtanong at mag-demand ng tama. At oo, kahit bumili ka lang ng suka, asin, toyo, o nagbayad ng tubig, taxpayer ka na rin.

“Akala ng iba, ‘pag wala silang trabaho, wala silang ambag. Pero lahat ng namomroblema sa araw-araw, lahat ng bumibili ng makakain, kasama ka sa mga taxpayer. Hindi lang ‘to tungkol sa mayayaman o empleyado… lahat tayo ay magkakasama sa laban na ‘to.”

Very well said, Edu! Iba talaga ang talino ng father dearest ng TV host of Rainbow Rumble (RR) na si Luis Manzano.

---

KUNG si Edu Manzano ay may paalala para sa mga taxpayers, si Senator Robin Padilla naman ay may kahilingan para sa mga lolo at lola.

Sa Facebook (FB) page post ng multi-awarded actor na si Sen. Robin ay nag-share siya ng video clip na makikita ang kanyang ina na si Eva Cariño habang inaalagaan ng mga anak. 

Caption nito: “Ang aking ina ay 90 taong gulang at may dementia. Kaya ramdam ko po ang bigat at hirap na pinagdadaanan ng ating mga nakatatanda at ng kanilang pamilya, kaya naman po taimtim kong hangad na mabigyan sila ng maayos na kalinga at tunay na malasakit upang masiguro na ang ating mga lolo’t lola ay mamumuhay nang may dignidad at pagmamahal hanggang sa kanilang huling mga taon.”

Harinawa, Sen. Robin ay mangyari ang kahilingan mo para malagay sa maayos na lugar at may mag-aalaga sa mga lolo at lola na hindi pinalad magkaroon ng magandang buhay tulad ng napakasuwerte mong ina na si Mommy Eva.

---

“LOLA era begins now!” ito naman ang sinabi ng aktres na si Maritoni Fernandez sa kanyang social media post kamakailan lang.

Nanganak na ang loving daughter ni Maritoni, ang dating Kapuso actress na si Lexi Fernandez, sa first baby nila ng non-showbiz husband na si Harry Cordingley.

Super-happy ang veteran actress dahil finally, certified lola na siya.

Samantala, sa Instagram (IG) post ng proud daddy na si Harry Cordingley ay nagbahagi siya ng larawan nila ni Lexi bilang first-time proud parents, kasama ang cute nilang baby na si Charlotte.

Present din ang first-time grandma na si Maritoni sa memorable moment ng pamilya nila.

Saad ni Harry sa post niya, “This morning at 6:48 AM, Lexi and my life became immeasurably brighter. We have the pleasure of welcoming Charlotte ‘Lottie’ Cordingley into our lives and introducing her to you all.”

Congratulations, Maritoni! Welcome to the wonderful world of grandparenthood.

‘Yun lang, and I thank you.

Pang-shopping, natangay… ANNABELLE, NANAKAWAN NG BAG SA ITALY

ni Mercy Lejarde @Showbiz Talkies | September 8, 2025

Photo: Annabelle Rama - IG

Nabiktima ng kawatan ang celebrity mom at talent manager na si Annabelle Rama.

Kamakailan lang ay nagbakasyon ang mother dearest ni Ruffa Gutierrez sa Rome, Italy kasama ang kanyang pamangkin.

Sa panayam ng aming kaibigan na si Jun Lalin kay Annabelle, napag-usapan nila ang isa sa mga hindi makakalimutang karanasan ng masaya sanang bakasyon sa Italy.

Kuwento ni Annabelle, bigla na lang daw nawala ang kanyang bag.

Aniya, “Nagbe-breakfast kasi kami, tapos biglang nag-announce na in 10 minutes, aalis na. So, ako naman, nag-CR. Sabi ko sa niece ko, bantayan n’ya ang bag ko.”

Pagbalik daw niya mula sa CR ay nagmamadali na ang lahat na sumakay ng bus papuntang Milan. 

Kinabahan na siya nang hanapin ang bag at na-realize niyang wala na ito.

Sey pa ni Annabelle, “Sabi ko, ‘Hala, ang bag ko! Nasaan ang bag ko?’ Naiwan doon sa breakfast, pero nang balikan namin, wala na. Sabi ko, ‘Patay, wala na akong pang-shopping.’”

Agaran silang nagdesisyon na ipa-check ang CCTV ng lugar ngunit sinabihan sila na kailangan ng police report para makita ang footage. 

Dahil sa pagmamadali ay hindi na nila ito naasikaso.

Sey pa ni Annabelle, “Ipinarerebyu nga namin ‘yung CCTV para makita namin kung sino ang kumuha, pero kailangan pa raw ng police report. Eh, nagmamadali na kami kaya hindi na kami nakapag-report sa police.”

Dagdag pa niya, “Buti na lang ‘yung bag na gamit ko, mumurahin lang. So ‘yung mga Euro ko lang ang nawala.”

Dahil sa hindi magandang karanasan ay pinapaalalahanan na niya ang kanyang pamilya at mga kaibigan na maging alerto at bantayan ang mga gamit habang nagta-travel.

Nakaka-sad naman ang nangyari kay Annabelle Rama. Sayang at walang nakapagpaalala sa kanya na ingatan ang kanyang bag.

---

KAYA talagang ipagsigawan sa madlang pipol ng singer na si Chito Miranda ang wagas niyang pagmamahal sa kanyang asawa na si Neri Naig.

Kahapon, September 7, ay nagdiwang ng kaarawan ang loving wife ni Chito.

Sa social media post ng band singer ay nagbahagi siya ng larawan ng kanyang asawa na may caption na: “Happy Birthday sa isa sa mga pinakamalakas at pinakamatapang na nilalang na kilala ko.

“Strong, not because ‘di s’ya nahihirapan at tinatablan. Brave, not because ‘di s’ya natatakot... but because she gets up and continues on when struck down, and faces everyday with hope and kindness, kahit minsan unfair ang mundo.

“Sweet, caring, forgiving and generous... even at times when she needs love most.

“Happy Birthday, Ms. Neri (heart emoji). I’m so proud and honored na ako ang pinili ni Lord para mahalin at alagaan ka... at gagampanan ko ‘yun hanggang sa pagtanda.

“Love you, asawa ko! Happy Birthday!!!”

Napaka-sweet naman ng lead vocalist ng Parokya ni Edgar na si Chito. 

Happy Birthday, Neri! Enjoy your special day!

Bigla tuloy naalala ni yours truly ang kantang pinasikat ni Chito na “Bakit pa kailangan ng rosas, kung marami namang nag-aalay sa ‘yo. Uupo na lang at aawit, maghihintay ng pagkakataon. Hahayaan na lang silang magkandarapa na manligaw sa ‘yo. Idadaan na lang kita sa awitin kong ito, sabay ang tugtog ng gitara… Idadaan na lang sa gitara…”

Pak, tumpak!

---

MATAPOS ang makulay na journey niya sa Pinoy Big Brother (PBB) Celebrity Collab Edition, nagbabalik-recording ang Soul Diva at itinuturing ngayon bilang “Nation’s Mom” na si Klarisse de Guzman sa awiting Dito Ka Lang, ‘Wag Kang Lalayo.

Tungkol ang power ballad sa pagkakaroon ng taong nagsisilbing tahanan sa oras ng hirap at ginhawa. Nagsisilbi itong unang patikim ni Klarisse sa upcoming album na ilalabas niya sa ilalim ng StarPop.

Mula ang single sa komposisyon at produksiyon ni ABS-CBN Music Creatives, Content, and Operations Head Jonathan Manalo.

Sinusundan nito ang extended play (EP) na FEELS na inilabas ni Klarisse noong nakaraang taon na naglalaman ng mga awiting Dito, Minamahal Pa Rin Kita, at Bibitawan Ka.

Naghahanda na rin ang Kapamilya singer para sa The Big Night concert na gaganapin sa Araneta Coliseum sa Setyembre 16 (Biyernes). 

‘Yun lang, and I thank you.