Game nang makipagbati sa BFF… DEREK, TINAWAGAN NA SI JOHN

ni Melba R. Llanera - @Insider | August 22, 2021

Kung sa huling interview ni Derek Ramsay ay tinuldukan na nito ang pagkakaibigan nila ni John Estrada, ngayon ay 'di na nagsasarado ng pinto ang Kapuso hunk actor na maaaring magkabati sila pagdating ng tamang panahon.

Ayon nga kay Derek, paghihilumin ng panahon ang lahat at bigyan lang sila ng oras ni John, siniguro niyang darating ang araw na magiging magkaibigan uli silang dalawa, maglalaro uli ng golf at pagtatawanan na lang kung anuman ang naging tampuhan nila.

Kuwento sa amin ng aktor, tinawagan niya si John nu'ng nakaraang Linggo sa harap ng mga magulang niya at nag-usap silang dalawa.

Kinlaro naman nito ang mga atakeng lumabas laban kay Ellen Adarna at sinasaluduhan niya ang mataas na respeto na ibinibigay pa rin ni John sa kanyang mga magulang, kung saan Mom at Dad din ang tawag ni John sa kanyang parents.

Sa pahayag naman ng aktor na kaibigan pa rin ang turing niya kay Derek, para naman sa huli ay kaibigan din ang turing niya kay John at inirerespeto niya ito.

Sa tanong naman namin kung bakit napakadali niyang napatawad si Long Mejia nang humingi ng tawad sa kanila ni Ellen, paliwanag ni Derek, hindi kasi ganu'n kadaling humingi ng tawad lalo't naka-video ito at isinapubliko ng komedyante.

Para rin sa Kapuso actor, nakita niya ang sinseridad ni Long sa paghingi ng tawad at walang rason para 'di niya ito tanggapin.

Nang magkausap sila ni Long ay sinabi niya rito na wala nang isyu sa pagitan nila, pero sana, sa susunod ay iwasan na nitong magbitaw ng mga salita sa mga bagay na wala itong alam.

Maganda at magaan ang aura na nakita namin kay Derek at kita namin na natagpuan na talaga ng aktor ang kaligayahan at kakuntentuhan sa piling ng fiancee, ni Elias at sa pamilya niya at mga totoong kaibigan na para kay Derek ay mas mahalaga kesa sa mga materyal na bagay o pera.

Taping nilayasan dahil dumating lang si Derek…RABIYA, IVANA AT ARCI, PINAGPIPILIAN PARA IPALIT

IPALIT KAY ELLEN SA SITCOM.

ni Melba R. Llanera - @Insider | August 05, 2021

Sa talakayan namin sa Showbiz Cafe ng FYE Channel, napag-usapan ang bali-balita na inalis na raw si Ellen Adarna sa sitcom nila ni John Estrada sa TV5, ang John En Ellen, dahil sa diumano'y pambibitin nito sa taping.

Ayon sa usap-usapan ay 'di pa umano tapos ang taping ng sitcom pero dahil nandu'n na raw si Derek Ramsay na fiancé ng aktres ay nagpaalam na raw si Ellen na uuwi na sila.

Balita ring kinausap daw ng staff ng John En Ellen ang aktres na tapusin muna ang ilang eksena pero nanindigan daw ito na uuwi na sila ng fiancé. Dahil dito ay na-pack-up daw ang taping at 'di natapos ang episode.

Pagkukumpirma naman ng kasamahan naming writer na si Kuya Fernan de Guzman na malapit sa aktor na si John Estrada, totoo na wala na si Ellen sa Season 3 ng John En Ellen at sa ngayon ay may mga pinagpipilian sila na puwedeng pumalit dito.

Ilan sa mga pangalang lumabas ay ang 2020 Ms. Universe-Philippines na si Rabiya Mateo, ang sexy actress na si Ivana Alawi, Kapamilya actress na si Arci Muñoz at dalawa pang aktres.

Pagkaklaro naman ni John kay Kuya Fernan, maayos ang naging pag-uusap nila ni Ellen at naiintindihan niya ang naging desisyon nito na magpokus muna sa nalalapit na pagpapakasal nila ni Derek at pagpasok sa buhay may-asawa, lalo't sa simula pa naman ay 'di talaga prayoridad ng aktres ang pag-aartista.

Naisip din namin na maaaring dobleng pag-iingat ang ginagawa sa ngayon nina Derek at Ellen dahil kamakailan ay nagpositibo sa COVID-19 ang mga magulang ng Kapuso actor, kung saan si Derek ang nag-alaga sa mga ito.

Bukas ang aming espasyo sa magiging pahayag ni Ellen sa isyu upang mabigyang-linaw nito ang mga lumalabas na balita sa pagkawala niya sa John en Ellen.

Oks lang daw sa mga bossing ng network…MGA NAG-OBER DA BAKOD NA KAPAMILYA STARS, PUWEDE PANG BUMALIK

ni Melba R. Llanera - @Insider | July 28, 2021

"At the end of the day, I never left. I spoke with my boss, si Sir Carlo (Katigbak) on the 4th of July and we had a good talk.

"By the time I'm done with quarantine, may meeting kami. I'm a Kapamilya through and through, I have to reiterate that. I'll be back soon for sure. Pagkatapos ng mga meetings, for sure. Just to put this to rest, I'm not going anywhere," ang pahayag ni Piolo Pascual sa eksklusibong interview sa kanya ng Cinema News tungkol sa nabitawan niyang salita sa ASAP Kapamilya Forever episode ng show, kung saan sinabi niyang, "I'll see you soon."

Marami ang natuwa at nabuhayan ng loob sa mga tagahanga ng aktor na kung pansamantala man itong napanood sa Kapatid Network via Sunday Noontime Live na tumakbo rin nang ilang buwan sa ere ay mukhang balik-Kapamilya na nga uli si Piolo.

Naging matunog kasi ang bali-balita na ngayong nasa bakuran na ng GMA si Mr. Johnny Manahan na siyang head ng Star Magic at itinuturing na tatay-tatayan ni Piolo ay maaaring sumunod siya rito gaya ng pagsama dati ng aktor nang lumipat si Mr. M sa TV5 para sa programang Sunday Noontime Live.

Sa sagot na ito ni Piolo, siniguro nito na hindi siya lilipat sa anumang istasyon at ang itinuturing nitong tahanan ay ang ABS-CBN.

Dahil galing sa Amerika ay sasailalim muna si Piolo sa quarantine. Pagkatapos nito ay makikipag-meeting na siya sa mga big bosses ng ABS-CBN para pag-usapan ang mga posibleng proyekto na gagawin niya rito.

Masayang-masaya rin ang aktor dahil nag-top 1 sa Netflix ang My Amanda nila ni Alessandra de Rossi at ngayon ay kasama pa rin sa Top 10 ng mga most watched films sa Pilipinas, Qatar at UAE. Para kay Piolo ay nasabik ang mga kababayan natin sa Pilipinas at nakakatuwa na makapagpalabas ng isang orihinal at pelikulang Pinoy tulad ng My Amanda.

Ayon nga sa aktor, para siyang nabunutan ng tinik at proud na proud siya sa direktor at kapareha sa pelikula na si Alessandra dahil nakita niya ang dedikasyon at sipag nito, kung saan nagkasakit ito at dumaan din sa maraming pagsubok matapos lamang nang maganda ang pelikula.

Papuri pa ni Piolo kay Alessandra, bilib siya sa kapareha at direktora dahil alam nito ang mga gagawin, mga eksenang dapat kunan sa kabila ng baguhan lamang ito at ito ang kauna-unahang pelikula na naidirek nito.