Pinapunta sa bahay, kumain kaya naghubad ng face mask… ANGELINE, NA-TRACE NA SA KATRABAHO NAHAWA NG

COVID

ni Melba R. Llanera - @Insider | April 20, 2021

Para kay Angeline Quinto, mabuti na rin na wala ang ina na si Mama Bob nang dapuan siya ng sakit na COVID-19.

Alam ng singer na bukod sa edad ng ina na high risk na, 'di rin ito papayag na 'di siya alagaan at mag-aalala ito nang husto sa kanya.

Pagbabalik-tanaw ni Angge, nakuha niya ang virus nang dalawin siya ng isang katrabaho sa bahay at dahil kumain sila ay naghubad sila ng face mask.

Pagkatapos nito ay nalaman niya na nagpositibo ang nasabi niyang katrabaho kaya alam ng singer na rito niya nakuha ang virus.

Ang unang sintomas na naramdaman ni Angeline ay ang pagkakaroon ng on and off na lagnat, pagkasira ng tiyan at ilang araw ang lumipas ay nawalan na rin siya ng pang-amoy at panlasa at hanggang sa ngayon nga ay 'di pa masyadong bumabalik ang mga ito.

Ang mas kinatakutan ng singer ay ang mas makahawa sa mga kasama niya sa bahay at mabuti na lang, pagkatapos magpa-antigen test ng lahat ay lumabas na siya lang ang nagpositibo at lahat ng kasama sa bahay ay negatibo.

'Di alam ni Angeline kung paano niya napaglabanan ang virus. Ang tangi lang niyang ginawa ay magdasal pagkagising, magpapawis at palakasin ang immune system sa pamamagitan ng pag-inom ng vitamins.

Tumatak din sa isip ni Angeline ang mga mabibigat na pinagdaanan sa buhay at alam niya na 'di lang isang COVID-19 ang magpapatumba sa kanya.

Sa ngayon ay mas doble na ang ingat ni Angge kung saan aminado siya na medyo nagpabaya siya at nakalimutang uminom ng vitamins 'pag nauubos ang supply niya.

'Di lang si Angge ang masuwerteng gumaling sa sakit na dulot ng COVID-19 kundi maging sina Heaven Peralejo, Nikki Valdez, Cherry Pie Picache at marami pang mga celebrities na 'di rin nakaligtas sa bagsik ng virus.

'Di lang basta tanggap, suportado pa… GERALD, KA-BONDING NA SA BEACH NG PAMILYA NI JULIA

ni Melba R. Llanera - @Insider | March 25, 2021

Kahit kabi-kabila pa rin ang pambabatikos at pamba-bash ng maraming netizens sa relasyong Julia Barretto at Gerald Anderson, masaya at kuntento hindi lang ang magkasintahan kundi maging ang pamilya ng aktres sa relasyon nito sa Kapamilya actor.

Pagkatapos mag-post ni Marjorie ng birthday greeting para kay Julia kung saan may mensahe ito na ngayon niya nakita ang anak sa pinakamasayang lebel ng kaligayahan, nag-post naman ang nakakatandang kapatid ni Julia na si Dani Barretto-Panlilio sa kanyang IG account ng isang beach photo kung saan kasama ng pamilya nila si Gerald.

Nasa larawan si Marjorie, ang anak na si Leon, Julia at Gerald, Claudia at ang mag-asawang Dani at Xavi na magkakaakbay at masaya.

Kuha ang larawan sa isang beach resort at may caption na, "Mi Familia (white heart emojis) (insert Millie and Erich here)."

Si Millie ay anak nina Dani at Xavi, samantalang si Erich naman ay bunsong anak ni Marjorie kay Cong. Recom Echiverri.

Tila wala nang makakapigil sa relasyong Gerald at Julia lalo't buo ang suporta na ibinibigay ng pamilya ng aktres sa relasyon nila ng boyfriend.

Mukhang wala rin namang negatibong epekto sa career ng dalawa ang ginawa nilang pag-amin dahil tuluy-tuloy ang mga proyektong gagawin nila. Malapit nang mapanood si Gerald sa seryeng Init sa Magdamag ng ABS-CBN samantalang si Julia naman ay balitang handa nang gumawa ng mga daring at sexy roles ngayong Viva na ang humahawak ng kanyang showbiz career.

Kung si Claudine, idinemanda pa si Raymart…

KATRINA, ‘DI INOOBLIGA NG SUSTENTO SI KRIS PARA SA ANAK NILA

ni Melba R. Llanera - @Insider | March 15, 2021

"Wala namang problema na ganu’n sa amin ni Kris. Kung meron, meron, kung wala, wala. ‘Pag minsan, meron naman. Kung wala akong trabaho, lagot siya sa akin. Hindi, joke lang," ito ang naging sagot ni Katrina Halili nang tanungin namin kung nagbibigay ba ng buwanang sustento si Kris Lawrence sa 8 years old nilang anak na si Katie.

Ang financial support kasi ang kadalasang pinag-aawayan ng mga mag-asawa o live-in partners na nauwi sa hiwalayan ang relasyon na kadalasan ay humahantong pa sa demandahan.

Kabilang nga rito ang estranged couple na sina Raymart Santiago at Claudine Barretto kung saan nagsampa ng kaso ang huli laban sa nakahiwalay na asawa dahil sa diumano'y pagtalikod ng aktor sa pinansiyal na obligasyon sa kanilang mga anak.

Masuwerte ngang maituturing si Kris dahil ‘di pala-hanap si Katrina at tuluy-tuloy ang trabaho ng Kapuso actress. Kung kapos ito sa pera ay maoobliga siyang magbigay ng buwanang sustento sa anak sa kabila ng wala ring raket sa ngayon ang singer.

Wala ring panahon sa love life si Katrina at aniya ay skeptical na siya pagdating sa usaping puso.

Tinanong din namin kung may takot ba siya dahil kadalasan ay ginagawang trophy ang katulad niyang may seksing imahe, ngunit hindi ang isinagot sa amin ni Katrina at ang dahilan daw ay sobrang pagka-busy sa pag-aalaga sa anak at sa buhay-probinsiya nilang mag-ina kung saan namamalagi na sila ngayon sa El Nido, Palawan.

Pahayag din ng Kapuso actress, ayaw niyang mag-aksaya ng panahon at itutulog na lang niya ito kaysa sumugal ulit sa pag-ibig.

Katatapos pa lang mapanood si Katrina sa seryeng Prima Donnas ng Kapuso Network kung saan kumpirmado ang pagkakaroon ng book 2 nito. Pinaghahandaan din ng aktres ang pagsisimula ng pelikulang Abe-Nida ng BG Productions kung saan makakasama niya si Allen Dizon sa ilalim ng direksiyon ni Direk Louie Ignacio.

Isang dual personality ang gagampanan dito ni Katrina bilang Nida at Cecille na ngayon pa lang gagawin ng aktres sa buong buhay niya kaya excited siya.

Pressure at kinakabahan si Katrina dahil bukod sa mahuhusay na artista ang makakasama niya sa pelikula ay nagbitaw ng salita si Direk Louie na ang pelikulang Abe-Nida ang magbibigay ng kauna-unahang award na kikilala sa pagiging aktres niya.

Katulad kasi sa pag-ibig ay skeptical din ang Kapuso actress sa mga awards dahil sa loob ng matagal na panahon na rin niya sa industriya ay ‘di pa siya nakakakuha ng award bukod sa Sexiest Woman ng FHM.