Basta okay daw sina Ria at Zanjoe… ROBI, NAGSALITA NA SA AWAY NILA NI JOHN LLOYD

ni Melba R. Llanera @Insider | January 21, 2026

Photo: File / Robi Domingo - FB

“My stand is as long as Ria and Zanjoe are okay, then I’m okay. ‘Yun ang pinakamahalaga. The Atayde family is okay, the Marudo family is okay. For me, there’s nothing to worry about,” ito ang naging pahayag ni Robi Domingo sa eksklusibong panayam ng PEP.ph nang tanungin ang Kapamilya TV host tungkol sa nabalitang hindi pagkakaunawaan sa pagitan nila ni John Lloyd Cruz na naganap sa nakaraang after party ng church wedding nina Ria Atayde at Zanjoe Marudo noong nakaraang December 22, 2025.

Ayon sa lumabas na balita, si Robi ang tumayong host nu'ng araw na iyon at matapos tanungin si Ria kung ano ang pakiramdam na maging Mrs. Marudo ay sinundan niya ito ng biro kay Zanjoe at tinawag na ‘Mr. Atayde’. 

Diumano, hindi ito nagustuhan ng A-list actor. Pagkababa ni Robi sa entablado at pagpunta nito sa bar area ay lumapit si John Lloyd at nagtaas umano ng boses at kinompronta si Robi, dahil hindi niya nagustuhan ang sinabi nito na wala raw sa lugar.

Diumano ay sumagot si Robi at nagtanong kung may isyu ba sa kanila ni John Lloyd at dito ay nagpalitan na sila ng mga salita. Nagulat ang maraming bisita at balita na isa sa mga umawat at nagpababa ng tensiyon ay si Donny Pangilinan. Pinagsabihan umano ang dalawa na igalang ang kasal ng mag-asawa at dito ay unti-unti ring bumaba ang tensiyon.

Sa kabilang banda ay excited naman ang Kapamilya TV host dahil 20 weeks nang nagdadalantao ang asawa nitong si Maiqui Pineda at inaasahang manganganak sa June o July. 

Bukas na aklat naman na may dermatomyositis si Maiqui, isang autoimmune disease kung saan nagkakaroon ng panghihina ng mga kalamnan, inflammation o pamamaga at skin rashes. Wala ring lunas ang naturang karamdaman at bihira ito.

Ibinahagi ni Robi na sumailalim muna sa treatment ang asawa at nang bigyan sila ng go signal ng doktor na puwede na silang mag-anak, makalipas ang ilang buwan ay nagbuntis na nga si Maiqui. 

Ayon pa sa TV host ay nagkaroon ng clinical remission ang kanyang asawa. Hindi man masasabing tuluyang nawala ang sakit, maayos naman ang kalusugan ni Maiqui at aktibo pa rin ito at pumapasok sa kanyang trabaho.

Nakaranas ng morning sickness si Maiqui noong first trimester ng pagbubuntis ngunit sa kasalukuyan ay nabawasan na ito. 

Wala rin itong partikular na pinaglilihian at nahihilig lamang sa maaalat at matatamis na pagkain.

Sumang-ayon din si Robi nang tanungin kung lalo bang lumalim ang pagmamahalan nila ni Maiqui. Matagal na umanong subok ang kanilang relasyon dahil hindi niya iniwan ang asawa at pinakasalan pa rin ito sa kabila ng autoimmune disease nito.

Sa ngayon ay trabaho-bahay ang routine ng Kapamilya TV host. Bukod sa nais niyang laging updated sa kalagayan ni Maiqui ay lilipat din ng bahay ang mag-asawa at kasalukuyan nila itong ipinapa-renovate. 

Tuluy-tuloy din ang mga proyekto ni Robi Domingo sa ABS-CBN kung saan regular siyang napapanood sa Pinoy Big Brother (PBB) at A.S.A.P.

---

MASAYA at lalong inspirado namang maglabas ng mga bagong original compositions ang bandang Inner Voices ngayong nakuha ng kanilang mga kanta na I Will Wait For You in the Rain at Shadows ang puwesto sa Vibe PH. 

Nagpahayag ng pasasalamat ang grupo sa kanilang mga tagahanga at sa mga sumuporta sa kanilang mga kanta at gigs. Kahanga-hanga na sa kabila ng ilang dekada sa industriya ay nananatiling matatag at buo ang Inner Voices.

Ayon kay Atty. Rey Bergado, ang sikreto ng kanilang matibay na samahan ay ang malalim na pagkakaibigang nabuo sa kanila. Wala ring lugar ang kompetisyon at inggitan dahil may kani-kanya silang career sa labas ng showbiz. 

Makikita rin ang pagbibigayan at kawalan ng sapawan sa pagitan ng mga miyembro.

Sa tanong kung hindi ba sila nainip sa matagal na panahong itinakbo bago sila mas nakilala ng publiko, sinabi ng grupo na hindi nila naramdaman ang pagkainip dahil ine-enjoy lamang nila ang kanilang ginagawa at masaya sila tuwing nagpe-perform para sa mga tao.

BF ng anak, nakakasama na… MONCHING, BOTO KAY ECHO PARA KAY JANINE

ni Melba R. Llanera @Insider | January 13, 2026

Photo: File / Janine at Echo IG

Sa premiere night ng pelikulang Breaking The Silence (BTS), nakapanayam si Ramon Christopher Gutierrez kung saan kinuha ang kanyang reaksiyon sa relasyon ng anak na si Janine Gutierrez kay Jericho Rosales. 

Ayon sa aktor, masaya siya kung saan masaya ang kanyang anak. Nakikita rin niyang masaya sina Janine at Echo at wala sa kanya ang pagpili kung sino ang mas okay para sa kanyang mga anak. 

Papuri pa ni Ramon Christopher, mabait si Echo at wala siyang masasabing hindi maganda sa Kapamilya actor sa mga pagkakataong nakasama niya ito.

Isa si Ramon sa cast ng BTS na tumatalakay sa bullying at mental health problems na kinahaharap ng mga nagiging biktima nito. 

Ayon sa aktor, ibang-iba na ang bullying ngayon kumpara noon dahil mas matindi na ang epekto nito at lubhang naaapektuhan ang mentalidad ng mga biktima. 

Iikot din umano ang istorya sa stress at anxiety ng mga kabataang nakararanas nito at kung paano nila haharapin at lalabanan ang ganitong sistema.

Ang BTS ay isinulat at idinirek ni Direk Errol Ropero at produced nina Ms. Ann Michelle Weber at Mr. Lawrence Weber ng Gummy Production.

Kasama sa cast sina Potchi Angeles, Bugoy Cariño, Shira Tweg, at ipinapakilala sina Gray Weber at Francis Saagundo. Mapapanood din dito sina Pinky Amador, Jeffrey Santos, Rob Sy, Pekto Nacua, Mark Herras, Gene Padilla, atbp..

Mapapanood ito sa mga sinehan sa darating na mga araw.

---

NAKAPANAYAM namin si Rica Peralejo kung saan inamin ng aktres na malaking tulong ang mga pinagdaanan niyang intriga at kontrobersiya sa showbiz kung kaya’t hindi siya gaanong naapektuhan ng isyung ipinukol kamakailan ng isang netizen sa kanila ng asawang si Joseph Bonifacio, kaugnay ng paratang na nagnakaw umano sila ng ‘ikapu’ o tithes mula sa kanilang dating kongregasyon.

Kinlaro rin ni Rica na walang katotohanan ang naturang paratang. 

Ayon sa aktres, may sarili siyang ipon mula sa kanyang kinita sa pag-aartista at may tatlong trabaho na pinanggagalingan ng kanilang pang-araw-araw na pangangailangan ng pamilya. 

Namuhay din sila nang simple at ibinahagi ni Rica na sa loob ng mahabang panahon ay masaya na sila kahit Tamaraw FX lamang ang sasakyang ginagamit ng kanyang asawa.

Sa tanong kung paano nila pinananatili ang financial transparency at accountability sa bagong tayong kongregasyon na No Other Name, ipinaliwanag ng aktres na may ginagawang financial report ang kanyang asawa at ang team nito. 

Ayon pa kay Rica, kahit noon ay mayroon na silang financial report, ngunit mas detalyado lamang ito ngayon. 

Dagdag pa niya, hindi rin sila nanghihingi ng ikapu sa kanilang church services dahil hindi naman money-making ang layunin ng NON. Maaari umanong magbigay ang sinumang nais magbigay at kung wala o ayaw magbigay ay hindi ito isyu.

Huling napanood si Rica sa Metro Manila Film Festival (MMFF) entry na Manila’s Finest (MF) kung saan gumanap siya bilang asawa ni Piolo Pascual. 

May ilang nagsabi na masyadong maigsi ang kanyang role para sa isang comeback movie, ngunit ipinaliwanag ng aktres na choice niya ito at ayaw niyang ang kanyang pagbabalik ay puro exposure lamang. 

Aniya, mas mahalaga na sa kanya ngayon ang kabuuan ng isang proyekto kaysa sa dami ng kanyang eksena.

Tinawag na fake news… KA TUNYING, MAS DUMAMI ANG KOSTUMER NANG BANATAN NI PINKY

ni Melba R. Llanera @Insider | December 16, 2025

Photo: File / FB Anthony Taberna

Para sa batikang broadcast journalist na si Anthony Taberna o mas kilala bilang Ka Tunying, maaaring balewalain nila ng asawang si Rossel Taberna ang anumang below-the-belt na pamba-bash sa kanila ng ilang netizens, ngunit ang pinakanaapektuhan sila ay nang idamay ang anak nilang si Zoey at hilingin pang bumalik ang sakit nitong leukemia.

Ito ay may kaugnayan sa nabanggit ni Ka Tunying na diumano’y may insertions sa 2025 national budget ang isang senadora, na pinalagan ng mga tagasuporta nito, kabilang ang aktres na si Pinky Amador. 

Naging viral ang video ng pagpunta ng aktres sa isang branch ng Ka Tunying’s at sinabing bibili siya ng fake news, kung saan pinararatangan nilang fake news peddler ang broadcast journalist. 

Sa panayam namin kina Anthony at sa asawang si Roselle, nabanggit ng huli na nais niyang magpasalamat sa ginawa ni Pinky dahil lalo pang dinayo ang mga Ka Tunying’s branches at tumaas ang kanilang benta.

Samantala, muling nasilayan ng entertainment press si Zoey na cancer-free at ipinakilala na rin sa nagdaang thanksgiving party ng Taberna Group of Companies bilang future ng kumpanya. Dito ay makikitang malusog siya at walang bakas na dumaan sa matinding sakit. 

Magde-debut na si Zoey sa susunod na taon at nagbigay din siya ng speech sa naturang event kung saan sinabi niyang magiging bahagi na sila ng kapatid na si Helga sa pagpapaunlad pa ng kanilang kumpanya. 

Hiling niya na manatiling bahagi ang mga taong kasama nila sa patuloy na pag-usad ng Taberna Group of Companies na kinabibilangan ng Ka Tunying’s Restaurant, Kumbachero Food Corp., Taste of the Town Catering at Outbox Media Powerhouse Corp..

Labis ang pasasalamat ng pamilya Taberna sa tuluyang paggaling ni Zoey, sa matatag na samahan ng kanilang pamilya, sa magandang takbo ng kanilang kumpanya, at sa patuloy na biyaya sa career ni Anthony bilang isa sa mga hosts ng Dos Por Dos kasama si Gerry Baja sa DZRH.

---

SA eksklusibong panayam namin kay Emilio Daez sa mediacon ng Bar Boys 2: After School (BB2AS) na isa sa official entries sa Metro Manila Film Festival (MMFF) 2025, tinanong namin kung may kompetisyon ba sa pagitan nila ng mga Pinoy Big Brother (PBB) housemates sa PBB Celebrity Collab Edition (PBBCCE). 

Ayon sa Kapamilya actor, hindi ito maiiwasan sa industriya, ngunit sa bandang huli ay pamilya pa rin sila at iyon ang kanyang pinanghahawakan. 

Para kay Emilio, kapatid ang turing niya sa mga dating housemates at masaya siya sa magandang takbo ng kanilang mga career.

Nilinaw din ni Emilio na wala silang sibling rivalry ng nakatatandang kapatid na si Mikael Daez. Aniya, numero unong supporter niya ang kanyang kuya at laging buo ang suportang ibinibigay nito sa kanya.

Masaya si Emilio na isa siya sa cast ng BB2AS. Bagama’t hindi sila nabigyan ng pagkakataong magkasama sa mga eksena nina Carlo Aquino at Ms. Odette Khan, labis pa rin ang kanyang paghanga at respeto sa dalawang artista dahil sa kanilang husay at passion sa trabaho.

Ang pelikula ay tinatampukan nina Carlo Aquino, Rocco Nacino, Kean Cipriano, Enzo Pineda, Glaiza de Castro, Sassa Gurl, Will Ashley, Emilio Daez, Therese Malvar at Ms. Odette Khan, sa ilalim ng produksiyon ng 901 Studios at sa direksiyon ni Direk Kip Oebanda.

---

NAGPAPASALAMAT din kami kay Honorable Vice-Mayor Marcos Mamay sa thanksgiving party na ibinigay niya para sa kanyang mga nakatrabaho at sa entertainment press noong Disyembre 4. Ito ay pasasalamat sa mga achievements at magagandang nangyari sa kanyang biographical film na Mamay: A Journey to Greatness – The Marcos Mamay Story (MAJTG), na nag-uwi ng 7 awards mula sa Filipino Academy of Movie Arts and Sciences (FAMAS). 

Nanalo rin bilang Indie Theme Song of the Year ang kantang Hamon, na theme song ng pelikula.

Dinaluhan ang naturang okasyon ng mga malalapit na kaibigan at katrabaho sa industriya tulad nina Ynez Veneracion, Lance Raymundo, Gerald Santos na siyang kumanta ng Hamon, Alma Concepcion, Atty. Vince Tañada, at iba pa. 

Bongga rin ang pamimigay ng mga papremyo kung saan lahat ay nanalo at walang umuwing luhaan. 

Sa nasabing event ay inilunsad din ang kanyang librong pinamagatang The Pugilist, isang inspirational book kung paano niya nalagpasan ang mga pagsubok at hamon sa ating lipunan.