‘Di maka-move on… PAGKAIN AT PAGTULOG NI CLAUDINE, APEKTADO NG PAGKAMATAY NG MADIR

ni Melba R. Llanera @Insider | June 5, 2026

Photo: IG _claubarretto

Aminado si Claudine Barretto na hanggang ngayon ay hindi pa rin niya lubusang matanggap ang pagkawala ng kanyang inang si Inday Barretto. 

Bilang bunso sa pamilya at isa sa pinakamalalapit sa kanilang ina, malaki pa rin ang epekto nito sa aktres.

Matapos ang advanced special screening ng Home Along Da Riles: Da Reunion (HADRDR) na ginanap sa Metropolitan Theater noong June 1, nakausap namin si Claudine. Inamin niyang ngayon niya mas nararamdaman ang matinding pangungulila sa ina kaya naapektuhan maging ang kanyang tulog at pagkain.

Matapos ang kanyang pagganap sa seryeng Totoy Bato (TB) ng TV5, nagpahinga muna siya sa trabaho dahil sa nararanasang kalungkutan. 

Kamakailan ay bumisita siya sa Thailand upang makasama ang kanyang best friend, na nakatulong upang kahit paano ay mabawasan ang pangungulila niya.

Naging emosyonal din si Claudine sa special screening ng HADRDR. Ikinuwento niyang habang nanonood sila ng pelikula ay magkahawak-kamay sila ni Nova Villa na gumaganap bilang Tita Nanay Azon sa istorya.

Ayon kay Claudine, ramdam na ramdam nila ang presensiya ni the late Comedy King Dolphy, na nagsilbing ama-amahan nila noong ginagawa nila ang sikat na sitcom. 

Aniya, kapag may problema sila noon ay kay Dolphy sila lumalapit, at madalas pa silang yayain nito, kasama si Vandolph, na mag-dinner sa isang restaurant malapit sa ABS-CBN.

Hindi rin itinago ng aktres na kinabahan siya bago pa man makarating sa venue at lalo nang tawagin siya sa entablado upang magbigay ng maikling mensahe. 

Sa kauna-unahang pagkakataon ay napanood din niya ang pelikula at buong-pagmamalaking pinuri ang direktor nitong si Boy2 Quizon.

Masasabi naming matagumpay nitong napatawa at napaiyak ang mga manonood sa maraming mahahalagang eksena.

Dumalo rin sa espesyal na screening si Vandolph, ang asawa nitong si Jenny, anak na si Vitto, at sina Gio Alvarez, Boy2 Quizon, Maybelyn dela Cruz, Cita Astals, Dang Cruz at Nova Villa.

Mapapanood ang Home Along Da Riles Da Reunion simula June 17 sa mga sinehan nationwide sa ilalim ng Riles Productions, katuwang ang TJay Productions at Rebisco, sa direksiyon ni Boy2 Quizon.

---

SA nakaraang panayam ng Philippine Movie Press Club members kay Mayor Christian Natividad ng Malolos, Bulacan, naikuwento niyang naging chairman siya ng Optical Media Board (OMB) noong 2020 matapos italaga ng dating Pangulong Rodrigo Duterte.

Nang tanungin kung sino ang nais niyang gumanap sa kanya sakaling maisapelikula ang kanyang buhay, agad niyang binanggit sina Joko Diaz at Jomari Yllana. Sa personal ay malaki ang pagkakahawig niya kay Jomari.

Ayon pa sa alkalde, makulay ang kanyang buhay dahil sa maraming pagsubok na kanyang pinagdaanan bago narating ang kanyang kasalukuyang katayuan. 

Bata pa lamang siya ay interesado na sa pag-arte at minsan ding sumubok sa teatro.

Naranasan din niyang umarte sa pelikula kung saan gumanap siya bilang National Bureau of Investigation (NBI) agent at pulis sa ilang proyekto, kabilang ang BuyBust.

Ikinuwento rin niya ang pagtatatag ng Sine Republika sa Bulacan, isang proyektong nakagawa ng ilang pelikula, kabilang ang isang naisama sa Cannes Film Festival. Tumagal ito nang anim na taon at naipalabas pa sa mga sinehan ng SM at Robinsons bago pansamantalang nahinto dahil sa pandemya.

Sa kasalukuyan ay gumagawa sila ng mga short films para sa mga high school students na tumatalakay sa mga isyung may kinalaman sa early teen pregnancy.

Kabisado na ang sumpong ng dyowa… JOEM, TANGGAP NA BIPOLAR SI MERYLL

ni Melba R. Llanera @Insider | May 20, 2026

Photo: Meryll Soriano at Joem - Instagram

Naging bukas si Meryll Soriano kung kailan siya na-diagnose ng bipolar disorder, kung paano ito nakaapekto sa kanya at kung paano niya ito nilabanan at patuloy na nilalabanan. 

Ayon sa aktres, nagsimula ito noong 2007 nang isilang niya ang panganay na anak nila ni Bernard Palanca, at nang maghiwalay sila habang nilalabanan niya ang sakit. 

Nakatulong nang malaki ang patuloy na propesyonal na tulong para sa kalusugang pangkaisipan, mga taong tumanggap at nagmahal sa kanya kabilang ang current partner na si Joem Bascon.

Sa panayam namin sa Kapamilya actor sa nakaraang exclusive sneak peek at presscon ng Drug War: A Conspiracy of Silence (DWACOS), ikinuwento ni Joem na kabisado na niya kung kailan umaatake ang bipolar disorder ng partner. 

Kapag sumisingkit na ang mata nito ay alam na niyang bumibigat na ang pakiramdam nito at kapag masayang-masaya naman ito ay pinapaalalahanan niya ito na maghinay-hinay lang. 

Ayon kay Joem, hindi siya nagbibigay ng payo kay Meryll kundi ipinaparamdam lang niya ang presensiya niya at assurance na hindi niya ito iiwan.

Sa ngayon ay masaya siya at kuntento sa tinatakbo ng relasyon nila ni Meryll, kung saan sabay nilang pinapalaki ang anak nilang si Gideon o Gido. 

Nang tanungin namin kung napag-uusapan na ba nila ang pagpapakasal, ayaw nang magbigay ng detalye tungkol dito ni Joem at gagawin na lang niya ito nang pribado at silang dalawa lamang. 

Tinanong namin kung ano sa palagay niya ang sikreto sa masaya at matatag na pagsasama nila ni Meryll.

Ani ng aktor, wala, pero sa bahay ay nagkukulitan lang sila at inirerespeto nila kung ano ang gustong gawin ng bawat isa. 

Siniguro rin sa amin ni Joem na wala na siyang hahanapin pang iba, wala na siyang nakikita at masaya na siya sa buhay niya kasama si Meryll.

Isa si Joem sa cast ng DWACOS, a six-part mini-series sa ilalim ng Rein Entertainment in collaboration with KC Global Media at sa ilalim ng direksiyon ni Shugo Praico. Kasama rito sina Ian Veneracion, Lotlot de Leon, Ryan Eigenmann, at Jane Oineza. 

Ang naturang sneak peek ay ang kauna-unahang beses na napanood din ni Joem ang first episode at tama nga ang sinabi ng Kapamilya actor na napaka-immersive nito, kung saan ramdam mo na parte ka sa bawat eksena.

Tinanong din namin si Joem kung ano ang pakiramdam niya noong kasagsagan ng war on drugs noong nakaraang administrasyon at nabalita na may mga kapatid sa industriya na kasama sa listahan. 

Aminado si Joem na nakaramdam siya ng takot lalo’t may mga kaibigan siya sa labas ng showbiz na nawala na lang at hindi na nakita. 

Noong mga panahong iyon ay walang ginawa si Joem kundi magtrabaho nang magtrabaho sa kabila ng maraming tanong kung ano ba talaga ang protocols at bakit umabot sa ganitong desisyon. 

Hiling ni Joem Bascon, sana sa pamamagitan ng series na ito ay magkaroon ng kalinawan ang mga nangyari noong panahong iyon.

---

SA presscon naman ng Project Baby (PB) na pinagbibidahan nina Sue Ramirez at Rico Blanco sa ilalim ng produksiyon ng Regal Entertainment at idinirek ni Erik Quizon, napapanahon ang tema ng pelikula dahil maraming kababaihan na ngayon ang bukas sa pagkakaroon ng anak kaysa magpakasal at bumuo ng sariling pamilya.

Tulad ng bida ng pelikula na si Sue Ramirez, aminado ang aktres na naramdaman niya dati na gusto niyang magkaanak dahil pakiramdam niya ay kaya niya ang responsibilidad at kaya niyang magpalaki at magtaguyod mag-isa ng isang bata.

Sa parte naman ni Rico, ibinahagi ng PB lead actor na nakaramdam siya ng pagdadalawang-isip at alinlangan dahil marami siyang kaibigang lalaki na nakita niyang nasaktan at nadurog ang puso nang hindi pinayagan ng mga ina ng kanilang mga anak na makita at makasama ang kanilang mga anak. 

Sa kabila nito ay naniniwala naman si Rico na alam niyang magiging isa siyang mabuting ama dahil sa ngayon pa nga lang ay isa na siyang cool tito sa kanyang mga pamangkin.

May chemistry sina Rico at Sue on the big screen kung saan may kilig kapag pinapanood mo silang dalawa. Ito’y sa kabila na open naman si Sue na masaya sa kanyang relasyon kay Dominic Roque at paulit-ulit na pinupuri ang kabutihan ng loob at kabaitan ng kasintahan.

Ang Project Baby ay mapapanood na sa darating na June 10 sa mga sinehan kung saan makakasama nina Sue Ramirez at Rico Blanco sina Matt Lozano, Arra San Agustin, Yasser Marta, Charuth, Jazzil Sarinas, Jonathan Perez at Alex Calleja.

Kung saan daw happy ang madir… MARTHENA, TANGGAP NA MAGPAKASAL SI AIKO KAY ONEMIG

ni Melba R. Llanera @Insider | May 7, 2026

Photo: FB Lotlot De Leon

Promising ang Star Worx Block 1 artists na ini-launch last May 5 ng TV5. 

Ang Star Worx ay ang dating MediaQuest Artists Agency o MQAA at ngayon ay hahawakan ito ng star maker na si Mr. Johnny Manahan o mas kilala bilang Mr. M sa industriya.

Ipinakilala ang unang batch na binubuo ng 16 baguhang aktor at aktres na nagpakita ng husay sa pagsasayaw at pagkanta. 

Kabilang sa kanila sina Adam Buck, Amo Wilding, Chan Martin, Nico Matugas, Patrick Ballesteros, Spencer Capistrano, Wayne Leonard, Carmela Lorzano, Celyn David, Kaitlyn King, Keisha Serna, Nathalie Apollo, Rahil Gatali, Selina Griffin, Steph Razon at Marthena Jickain.

Nang tanungin kung ano sa tingin nila ang rason kung bakit sa dinami-rami ng mga aspiring artists ay dapat silang hangaan, sinagot ng karamihan sa kanila na ang disiplina na itinuro sa kanila ng training na isinagawa ni Mr. M at ang pagiging bukas nilang matuto para maipakita ang kanilang mga kakayahan at talento ang gagamitin nilang pasaporte para tumagal sila sa industriya.

Ayon nga kay Mr. M, ang ganda, talento at kabataan ng mga ima-manage na Star Worx Block 1 artists ang nagsisilbing ningas kung bakit patuloy pa rin siya sa ginagawang paghubog sa mga baguhang artista na ang pangarap ay makagawa ng sariling tatak sa industriya.

Sa kabilang banda, ang kinausap at kinumusta ng mga press ay si Marthena, anak ng chef na si Martin Jickain at ng pulitiko-aktres na si Aiko Melendez, na present sa media launch para bigyang-suporta ang anak. 

Aminado si Marthena na may pressure kapag naikukumpara siya sa ina dahil kilala ito bilang mahusay na aktres, pero ang lahat ng ito ay tinitingnan niya bilang motibasyon para higit siyang magsikap upang maipakita ang sariling kakayahan.

Sa kabila ng bukas ito sa pagkakaroon ng ka-love team, hindi pa raw papayagan ni Aiko si Marthena sa mga kissing scenes. Hindi rin naman bukas dito ang baguhang aktres na hindi pa pala nagkaka-boyfriend dahil pokus sa kanyang pag-aaral. 

Gustong gumawa ni Marthena ng mga rom-com (romantic-comedy) lalo na ng mga action films. Kung titingnan ay mahinhin at pinong kumilos at magsalita, pero athlete pala si Marthena.

Samantala, nang kumustahin naman namin kung boto ba siya kay Onemig Bondoc para sa ina, agad siyang umoo at sinabing masaya siya kung saan ito magiging masaya. 

Ayon pa kay Marthena Jickain, siya ang nagsabi sa ina na piliin nito ang sarili nito at buo ang suporta niya sa inang si Aiko Melendez kung saka-sakaling i-level-up na ng mga ito ang kanilang relasyon at mauwi sa pagpapakasal.

---

‘Pag inaantok daw sa taping, walang arte… 

JOSHUA, SA UPUAN LANG NATUTULOG

Sa blue carpet at special screening ng Love Is Never Gone (LING) na pinagbibidahan nina Joshua Garcia at Ivana Alawi, puring-puri ng mga beteranang artista mula kina Epy Quizon, Michael de Mesa, Ara Mina at Dina Bonnevie ang husay at propesyonalismo ng mga kabataang artista, partikular na si Fyang Smith.

Ayon sa kanila, kung titingnan ay patawa-tawa at laging masaya ang aura ni Fyang, pero sa sandaling umarte na ito ay lumalabas ang husay nito bilang aktres.

Sa parte naman ni Joshua, dati pa pala ay nahuhusayan na si Dina sa galing niyang umarte lalo na nang mapanood ng aktres ang pelikulang Meet, Greet & Bye (MGB) na kasama si Joshua. 

At lalo pang napabilib si Dina sa husay ng aktor nang magkasama sila sa LING, kung saan sa unang napanood naming episode ay lutang na lutang ang husay ni Joshua.

Wala namang masasabi si Epy sa propesyonalismo ni Joshua, kung saan hindi niya ito kinakitaan ng attitude problem kahit pagod at puyat ito. 

Pagkukuwento nga ni Epy, na siyang gumaganap bilang ama ni Joshua sa istorya, alam niya kapag inaantok ang aktor dahil natutulog lang si Joshua sa upuan, nakayukyok sa mesa.

Anyway, ang Love Is Never Gone ay mapapanood sa Prime Video sa darating na May 8. Ito ay sa ilalim ng produksiyon ng Dreamscape Entertainment, sa direksiyon nina Manny Palo at Jojo Saguin. 

Pinagbibidahan ito nina Joshua Garcia, Ivana Alawi, Jane Oineza, JC Alcantara, Fyang Smith, JM Ibarra, Jameson Blake at ng mga batikang artista na sina Irma Adlawan, Epy Quizon, Ara Mina, Michael de Mesa at Dina Bonnevie.