Romualdez, humirit ng piyansa sa P7.4B plunder case

by Mervin Reyes @News | September 29, 2026

Photo: File / DILG

Humiling si dating House Speaker at incumbent Leyte Rep. Martin Romualdez sa Sandiganbayan Third Division na payagan siyang makalaya pansamantala sa pamamagitan ng piyansa.

Nahaharap si Romualdez, kasama sina dating Ako Bicol Partylist Rep. Zaldy Co at dalawang iba pa, sa plunder case kaugnay ng umano’y P7.44 bilyong kickback. Itinuturing na non-bailable offense ang plunder.

Nag-plead ng not guilty si Romualdez, ngunit maaari pa ring pagbigyan ng piyansa sa pamamagitan ng summary bail hearing kung saan kailangang patunayan ng prosekusyon na malakas ang ebidensya laban sa akusado.

Ayon kay Third Division clerk of court Dennis Pulma, inihain ni Romualdez ang kanyang petition alas-12:05 ng tanghali nitong Lunes.

Magsisimula ang bail hearing sa Oktubre 12 at magpapatuloy tuwing Lunes, Martes at Huwebes. Ayon sa prosekusyon, 23 saksi ang kanilang ihaharap sa pagdinig.

Hirit ni Romualdez na mailipat sa ospital, tablado

by Jeff Tumbado @News | September 17, 2026

Photo: Si dating House Speaker Martin Romualdez habang dumadalo sa kanyang arraignment o pagbasa ng sakdal sa Sandiganbayan Third Division via teleconferencing habang siya ay nakakulong sa New QC Jail Male Dormitory sa Payatas. (via Ombudsman)

Ibinasura ng Sandiganbayan Third Division ang mosyon ni dating House Speaker Martin Romualdez na mailipat siya sa isang tertiary government hospital habang nagpapatuloy ang paglilitis sa kanyang kinakaharap na kaso.

Ayon kay Associate Justice Karl Miranda, chairperson ng Third Division, walang sapat na batayan upang pagbigyan ang kahilingan ni Romualdez dahil may iba pang Persons Deprived of Liberty (PDLs) na may mas malubhang kondisyon sa kalusugan sa mga pasilidad ng piitan.

Hiniling umano ni Romualdez na mailipat sa Veterans Memorial Medical Center (VMMC) sa Quezon City.

Dahil dito, mananatili si Romualdez sa Quezon City Jail Male Dormitory sa Payatas habang nagpapatuloy ang mga pagdinig sa kanyang kaso.

Nauna nang idineklarang clinically stable si Romualdez bago siya ilipat sa QC Jail mula sa Philippine General Hospital (PGH).

Kasabay nito, nagpasok ng “not guilty” plea si Romualdez sa kaso nitong plunder kaugnay sa umano’y P7.44 bilyong kickback mula sa mga proyekto ng flood control.

'Di kailangang ma-confine — UP-PGH... Romualdez, ikinulong na

by Jeff Tumbado @News | September 15, 2026

Photo: Dumating si DILG Sec. Jonvic Remulla sa New Quezon City Jail Male Dormitory sa Payatas upang inspeksiyunin ang magiging kulungan ni dating House Speaker Martin Romualdez na nakatakdang ilipat mula sa Philippine General Hospital sa Maynila. (Jeff Tumbado)

Iniutos ng Sandiganbayan Third Division ang paglipat kay dating House Speaker Martin Romualdez mula sa UP-Philippine General Hospital (UP-PGH) patungo sa Quezon City Jail-Male Dormitory sa Payatas, matapos suriin ang kanyang kondisyon.

Batay sa independent medical evaluation ng UP-PGH, stable na ang kondisyon ni Romualdez at hindi na niya kinakailangang manatili sa acute-care hospital.

• 

  Photo: DILG

Gayunman, kailangan pa rin niya ng tuluy-tuloy na medical care, kabilang ang blood pressure monitoring, mga gamot, paggamit ng CPAP machine at psychiatric treatment, at follow-up.

Inatasan din ang jail authorities na tiyaking maa-access niya ang kanyang mga gamot, CPAP machine at mga doktor kung kinakailangan.

Nakatakda naman ang arraignment at pre-trial ni Romualdez sa kasong plunder sa Miyerkules, Setyembre 16, alas-8:30 ng umaga.