US visa ni Romualdez, binawi

ni Jeff Tumbado @News | June 6, 2026

Photo: Martin Romualdez - FB

Pinawalang-bisa na ng Estados Unidos ang lahat ng visa ni dating House Speaker at Leyte 1st District Rep. Ferdinand Martin Romualdez.

Ito ang kinumpirma ni Philippine Ambassador to the United States Jose Manuel Romualdez sa impormasyong ibinahagi nito sa media nitong Biyernes.

Ayon kay Romualdez, opisyal na kinansela ng US ang lahat ng uri ng visa ng kanyang pinsan, kabilang ang diplomatic at tourist visa nito.

Sa nangyaring hakbang ng kasalukuyang Trump administration ay wala pang karagdagang nakukuha si Romualdez na iba pang detalye kaugnay ng isyu.

“All I can say is it's confirmed. I don't have any details,” pahayag ni Ambassador Romualdez.

Romualdez, bawal lumabas ng bansa — Sandiganbayan

ni BRT @News | April 24, 2026

Naglabas ang 7th Division ng Sandiganbayan ng Precautionary Hold Departure Order (PHDO) laban kay dating House Speaker at ngayo’y Leyte 1st District Rep. Ferdinand Martin Romualdez.

Kasunod ‘yan ng hiling ng Office of the Ombudsman na pigilang makalabas ng bansa si Romualdez.

Ito’y habang iniimbestigahan sa mga reklamong plunder, direct bribery, paglabag sa Anti-Graft and Corrupt Practices Act, at money laundering na may kinalaman sa maanomalyang flood control projects.

Samantala, kukuwestiyunin umano sa tamang forum ng kampo ni Romualdez ang PHDO, ayon sa kanyang abogado.

Sa isang pahayag na inilabas nitong Huwebes ni Atty. Ade Fajardo, tagapagsalita at abogado ni Romualdez, sinabi niyang gagamitin ng kampo nila ang “all appropriate legal remedies to question the issuance of this order before the proper forum.”

Iginiit pa ni Fajardo na nasa bansa pa rin ang dating lider ng Kamara de Representantes.

Pinaninindigan din ng kampo ni Romualdez, na handang harapin ng mambabatas ang mga ibinabatong alegasyon laban sa kanya.

Executive, itinuro sa flood control scam... Hindi ako ang mastermind — Martin

ni Jeff Tumbado @News | April 22, 2026

Iginiit ni dating House Speaker Martin Romualdez na hindi siya ang mastermind sa budget insertions at anomalya sa flood control projects. 

Ayon sa kanya, nagsisimula ito sa Ehekutibong sangay ng pamahalaan, bago dumaan sa deliberasyon ng Kamara at Senado, at hindi ito kontrolado ng iisang tao lamang.

Binigyang-diin niya na ang implementasyon ng mga proyekto, kabilang ang flood control, ay nasa ilalim ng Ehekutibo at hindi ng Kongreso. 

“Kung may korupsiyon man sa implementasyon, dapat doon ito hanapin,” aniya.

Dagdag pa niya, kung siya umano ang sangkot, dapat ay makikita ito sa kanyang sariling distrito sa Tacloban. Ngunit tiniyak niyang walang ghost projects o substandard na flood control projects sa kanyang lugar, at handa siyang ipasuri ito sa publiko.

Binanggit din ni Romualdez ang ilang personalidad na aniya’y may mahalagang papel sa proseso ng badyet, kabilang sina Senator Francis ‘Chiz’ Escudero at dating Congressman Zaldy Co.

Sa huli, nagbabala si Romualdez na handa niyang ipagtanggol ang kanyang pangalan laban sa aniya’y “politically motivated” na mga akusasyon.

Sinabi rin niya na hindi siya papayag na maging “fall guy” sa kasalanan na gawa ng ibang tao, at iniutos sa kaniyang opisina na isapubliko ang mga affidavit na kaniyang isinumite sa isinagawang mga imbestigasyon. 

“Ipaglalaban ko ang aking pangalan. Hindi ako mananahimik kung kinakailangan kong magsalita,” pagtatapos niya.

Sa kabila nito, kinilala niya ang galit ng publiko at sinabing may karapatan ang mamamayan na managot ang sinumang nagnakaw ng pondo ng bayan.

Hinikayat niya ang mga awtoridad, lalo na ang Ombudsman, na sundan ang ebidensya at huwag umanong maging selective sa pananagutan.