Humanda sa mga obstacles ng TPSK Fire Run sa Grandstand

ni Anthony E. Servinio @Sports | May 23, 2026

Photo: Handa na ang Team BULGAR sa paglarga bukas sa Takbo Para sa Kalikasan Fire Run na idaraos sa Quirino Grandstand, Manila.

Bagong hamon ang hatid ng Fire Run, ang pambungad na yugto ng seryeng Takbo Para Sa Kalikasan 2026 ngayong Mayo 24 sa Quirino Grandstand. Naghihintay sa mga kalahok ang sari-saring obstacle na inilatag sa daan.

Maliban sa pagtakbo ay maghandang tumalon at gumulong sa mga karera sa 16, 10 at limang kilometro. Gagamitin ang kahabaan ng Roxas Boulevard at iikot sa CCP at Senado bago bumalik ng Luneta.

Kailangang dumating sa lugar bago mag-3 a.m. at lalarga ang 16 kilometro sa 4 a.m. Ang iba pang oras ay 4:30 a.m. sa 10km at 5:30 sa 5km. 

Muling hinihimok ang lahat na magdala ng sariling lalagyan ng inumin upang mabawasan ang kalat. May kasamang botelya sa race kit maliban sa damit at numero.

Para sa mga hindi makakarating, may virtual race at tumakbo kahit saan sa Mayo 23 at 24. Ipadala ang katibayan ng oras at distansiya upang matanggap ang parehong medalya at t-shirt.

Ang Fire Run ay susundan ng Water Run sa Hulyo 26. Gaganapin ang Air Run sa Setyembre 20 at Earth Run sa Nobyembre 15. Opisyal na media partner sa serye ang BULGAR. Abangan ang mga sorpresa sa araw ng karera.         

Fastest non-binary may awards sa 2026 Pride Run

ni Anthony E. Servinio @Sports | May 15, 2026

Photo: Magbabalik ang Runrio Pride Run sa SM Lanang (Hunyo 7), Seaside City (14) at MOA (21) hatid ng SM Supermalls. Kasama sa paglunsad ng bonggang takbuhan sina Patricia Domingo ng Mogu Mogu, Joaquin San Agustin ng SM, Coach Rio dela Cruz ng Runrio at Thysz Estrada ng PANTAY. (A. Servinio)

Magbalik sa ikatlong sunod na taon ang pinakabongga at pinakamakulay na Runrio Pride Run. Aapaw ang kasiyahan sa SM Lanang sa Hunyo 7, Seaside City sa 14 at MOA sa 21.

May malaking pagbabago ngayong 2026 at hiwalay na kikilalanin ang pinakamabilis na lalake, babae at kasama na ngayon ang mga non-binary. Sa unang dalawang edisyon ay umakyat sa entablado ang ipinagsamang Top 10 na kahit anong kasarian.

Ayon kay Coach Rio dela Cruz, hindi muna bibigyan ng gantimpalang salapi ang mga non-binary at pagkilala ito sa kanilang naabot. Maaaring ipatupad ang bagong kategorya sa ibang mga parating na karera ng Runrio.

Pangalawa, dahil patuloy ang pagtaas ng dami at kalidad ng mga mananakbo ay magkakaroon na ng 16 kilometro. Gaganapin pa rin ang mga kinagawiang karera sa 10, lima at tatlong kilometro at isang kilometro kasama ang alagang aso.

Isa pang pagbabago ay ang pagtatakda ng mga pampublikong ensayo bago ang mga yugto. Magkakaroon din ng costume contest, pinakamalaking delegasyon at virtual run para sa mga hindi makakarating sa takdang araw at lugar.

Kaakit-akit ang disenyo ng singlet, bandana at medalya at dagdag t-shirt para sa magtatapos sa 16 kilometro. Ilang mapapalad na kalahok ay makakakuha ng kakaibang medalya na tiyak pag-aagawan.

Napiling advocacy partner ang PANTAY. Noong 2025 ay tumanggap ang NGO na sumusulong sa karapatan ng LGBTQIA+ ng ₱200,000 at tinatayang aakyat ito sa ₱500,000.

Matapos ang tatlong taon, ang Pride Run na hatid ng SM Supermalls at Mogu Mogu ay hindi lang paligsahang pisikal. Simbolo na rin ito ng patuloy na paglaban para sa pantay na karapatan at respeto sa lahat ng kasarian.                  

Shulchenko champ, Huby King of the Climb, Cliqq Best Team

ni Elyssa Nichole @Sports | May 14, 2026

Photo: Overall champion si Russian Nikita Schulchenko sa MPTC Tour of Luzon 2026 kung saan pumangalawa siya kay Frenchman Antoine Hubby (7RBP) na itinanghal namang King of the Climb nang magtapos ang huling karera sa Stage 14 sa Baguio City kahapon. (mptcpix/dzsrsportsradiopix)

.

Baguio City - Pinadyak ni Frenchman Antoine Huby ng 7Eleven Cliqq Roadbike Philippines ang pangatlong lap win matapos angkinin ang Stage 14 habang sinikwat ni Russian rider Nikita Shulchenko ng LCW UAE Cycling team ang titulo sa katatapos na MPTC Tour of Luzon 2026, kahapon dito.

Inirehistro ni Huby ang apat na oras, 26 minuto at 42 segundo sa 181.80 kms. na nagsimula sa Lingayen at nagtapos sa loob ng Camp John Hay, Baguio City, dalawang minuto at 12 segundo ang lamang nito kay Shulchenko pero kapos pa rin para maagaw nito ang Individual General Classification.

“I’m happy to win the last stage, I’m tired to win the yellow jersey. I’m sure it was possible, but I know that I was tired to go faster. I did my best,” saad ng 25-anyos na si Huby.

Terserong tumawid sa meta si Ronnilan Quita ng 7Eleven Cliqq Roadbikes Philippines, pang-apat si Ivan Anisimov ng LCW UAE Cycling team habang pumang-lima si Junrey Navarra ng Standard Insurance Philippines.

Nakalikom si Shulchenko ng kabuuang 41 oras, 11 minuto at 10 segundo sapat para tanghaling kampeon sa 14-Stage race. Lumanding sa second place si Huby, may isang minuto at 34 segundo ang lamang sa kanya ni Shulchenko, tumapos naman ng third place si Syrian rider Ibrahiem Yousef Alrefai ng LCW UAE Cycling team.

Nasikwat naman ni Nash Joshua Lim ng MPT Drivehub cycling team, siya ang best Pinoy rider habang nasa pang lima si Quita. “Sobrang saya ko po, sinubukan ko din pong

umangat pa kahit third place pero hindi rin kinaya,” ani  Lim.

Samantala, kinalawit ng 7Eleven Cliqq Roadbike Philippines ang korona sa Team General Classification sa nalikom na 162 oras, 25 minuto at 49 segundo, pangalawa ang Go fo Gold Philippines habang tersero ang LCW UAE Cycling team.