Oks kay PBBM — Castro... Facebook, iba-ban

ni Mylene Alfonso @News | August 26, 2026

Photo: PCO

Bukas ang Malacañang hinggil sa pag-aaral ng panukalang ipagbawal ang Facebook o Meta sa Pilipinas kung mapatutunayang bigo itong pigilan ang paglaganap ng karahasan at fake news.

Ito ang tugon ni Palace Press Officer Undersecretary Claire Castro matapos tanungin tungkol sa mungkahi ng Cybercrime Investigation and Coordinating Center (CICC) kasunod ng madugong insidente sa Ateneo de Zamboanga.

“Kung hindi magkakaroon ng accountability ang anumang social media platform at parang nababalewala ang ating mga hiling para maproteksiyunan ang ating mga kababayan laban sa karahasan, laban sa fake news, kung mabagal ang pagtugon, ay magandang pag-isipan at pag-aralan kung dapat silang manatili na parte ng ating sistema,” ani Castro sa Palace briefing.

Nilinaw ng opisyal na hindi target ng gobyerno ang malayang pagpapahayag ng opinyon o pagiging kritiko ng administrasyon.

“Iba naman po kasi iyong fake news; iba naman po kasi iyong ikaw ay naglalahad lamang ng inyong opinion, kritiko ka, hindi po iyan pinagbabawalan. Wala pong pinagbabawalang kritiko lalung-lalo na sa panahon ngayon ni Pangulong Marcos Jr.,” aniya.

Palasyo, bantay-sarado

ni Mylene Alfonso @News | March 17, 2026

Photo: Atty. Claire Castro - PCO

Nilinaw ng Malacañang na ang pinaigting na seguridad na napansin sa paligid ng Palace complex ay bahagi lamang ng isang regular na security exercise upang subukan ang kahandaan sa operasyon ng mga tauhan.

Ayon kay Presidential Communications Office (PCO) Undersecretary Claire Castro, ito ay kasunod ng mga kumakalat na usap-usapan online tungkol sa umano’y paglalagay ng razor wires at pagbabantay ng mga pulis sa mga lugar na papunta sa Malacañang compound.

“It is just part of security exercise to test the operational readiness of personnel and units,” pahayag ni Castro sa mensahe sa mga mamamahayag.

Nag-udyok ng iba’t ibang haka-haka sa social media ang mga larawan, kung saan may ilang personalidad ang nagsabing inilagay umano sa full alert ang Palasyo.

Gayunman, iginiit ni Castro na ang sitwasyon ay bahagi lamang ng isang planadong

security drill at hindi kaugnay ng anumang partikular na banta.

Ang mga security exercise ay regular na isinasagawa sa paligid ng Malacañang at mga kalapit na lugar upang matiyak na nananatiling handa ang mga tauhan at unit ng law enforcement sa iba’t ibang posibleng sitwasyon.

Nauna rito, nag-post online ang beteranong broadcaster na si Jay Sonza at nagtanong kung bakit umano nagkaroon ng “marubdob na alerto” sa paligid ng Palasyo mula pa noong nakaraang gabi.

Sa isa pang post, sinabi naman ng broadcaster na si Ramon Tulfo na nasa “full alert” umano ang Malacañang, ayon sa isang hindi pinangalanang source.

Binanggit din sa mga post na naglagay ng seguridad ang pulisya sa mga lugar na papunta sa Palace compound at isinara sa mga sasakyan ang ilang kalsada tulad ng Mendiola, Arlegui, at Nicanor Padilla.

Presidente ng Timor Leste, sinalubong sa Malacañang

ni Eli San Miguel - Trainee @News | November 10, 2023

Sinalubong ni Pangulong Ferdinand Marcos, Jr. si Timor Leste President José Ramos-Horta para sa isang bilateral meeting sa Kalayaan Ground sa Malacañang, ngayong umaga ng Biyernes.

Matapos ang seremonya kung saan nagtagpo sina Horta at Marcos kasama ang iba pang opisyal ng Gabinete, pumasok ang dalawang pinuno sa Palasyo para sa paglagda sa guestbook.

Nagsagawa sila ng bilateral meeting kung saan tinalakay ang pagpapalakas ng ugnayan sa pulitika, teknolohiya, edukasyon, at ekonomiya.

Dumating si Horta sa Maynila noong Nobyembre 8 at nagdaos ng mga pagpupulong sa ilang ahensya ng gobyerno sa bansa bago ang kanyang pulong kasama si Marcos.