CMU, binulabog ng bomb threat

by Maeng Santos @News | February 20, 2026

Photo: CMU-I-Connect / SS

Nakatanggap ang City of Malabon University (CMU) ng mensahe sa e-mail na may bomba umaano sa naturang pamantasan kaya agad ipinatupad ang mahigpit na panuntunan, Huwebes ng tanghali.

Hindi naman nagsuspinde ng klase ang unibersidad pero inabisuhan ng pamunuan ang miyembro ng kanilang pamayanan na maging kalmado, mapagmasid, at ipagkaloob ang kooperasyon sa mga pulis at security personnel.

Batay sa inilabas na kalatas ng pamunuan ng naturang pamantasan, nagsagawa ng imbestigasyon ang mga tauhan ng Malabon City Police Station at inalam agad ang sitwasyon habang nagdagdag at hinigpitan na rin nila ang seguridad sa buong campus.

Matapos ang masusing pagsisiyasat sa buong campus, walang nakitang panganib subalit patuloy pa rin ang mahigpit na panuntunang ipinatupad sa mga pumapasok sa campus at masusing nirerekisa ang dalang gamit pati na ang pag-monitor sa mga sasakyan sa pasilidad.

Bagama’t hindi inilagay sa kalatas na inilabas ng pamunuan ang uri ng pananakot na kanilang natanggap, kinumpirma naman ni Malabon Station Community Affairs Section (SCAS) chief P/Capt. Eduardo Antalan, Jr. na bomb threat ang mensaheng natanggap ng pamunuan na ipinadala sa kanilang e-mail.

Sa pahayag ng pamunuan, sineseryoso nila at kinokondena ang lahat ng uri ng mensahe ng pananakot at karahasan kasabay ng pagtiyak na hahabulin ang mga ito hanggang sa lawak na maaabot ng batas.

Mga preso sa Malabon City Jail, nag-noise barrage

ni Maeng Santos | June 24, 2023

Nagsagawa ng noise barrage ang mga Person Deprived of Liberty (PDL) na nakapiit sa Malabon City Jail bilang protesta umano sa warden ng nasabing kulungan, Biyernes ng hapon.

Ayon sa ulat, alas-4:30 ng hapon nang magsimulang mag-noise barrage ang mga PDL sa loob ng MCJ na matatagpuan sa Sanciangco St., Bgy. Catmon sa pamamagitan ng pagbasag ng mga salamin ng kulungan.

Pinuprotesta umano ng mga PDL ang warden ng MCJ at ang paglipat ng dalawang PDL na mayores ng nasabing kulungan sa Metro Manila District Jail.

Agad namang nagsagawa ng area security ang mga tauhan ng Malabon City Police malapit sa paligid ng MCJ para masigurong walang makatakas sa mga PDL, maging ang BPF-Malabon ay rumesponde rin sa lugar.

Habang isinusulat ang balitang ito ay nagpapatuloy ang negosasyon sa pagitan ng mga PDL at ng mga awtoridad sa pangunguna ng isang Major.

Mga empleyado agad pinalabas.. Bomb threat sa Malabon City Hall

ni Lolet Abania | June 3, 2022

Mabilis na pinalabas ng mga awtoridad sa mga opisina ang mga empleyado ng Malabon City Hall ngayong Biyernes ng umaga dahil sa umano’y bomb threat sa nasabing lugar, ayon sa report ng National Police Region Police Office (NCRPO).

Alas-7:06 ng umaga, nakatanggap ang Malabon City Police Station ng impormasyon mula sa Malabon Command Center tungkol sa sinasabing bomb threat.

Agad na pinalikas ng pulisya ang lahat ng personnel na nasa loob ng gusali ng city hall, at kanilang ikinordon ang lugar.

“Likewise, advise SWAT and SECU personnel to proceed at the area to conduct Paneling Operation re: Bomb Threat procedure,” ayon sa police report.

Gayunman, idineklara ng explosive ordnance disposal team na ang city hall ay cleared sa anumang mapanganib at explosive materials. Wala nang iba pang detalyeng ibinigay ang mga awtoridad sa ngayon.