Tindahan ng LPG, sumabog

ni Mylene Alfonso | July 2, 2023

Sugatan ang isang drayber matapos na sumabog ang isang Liquefied Petroleum Gas (LPG) sa isang tindahan kamakalawa ng gabi sa Laon-Laan St., Sampaloc, Maynila.

Ginagamot na sa Jose Reyes Memorial Medical Center ang biktimang si Romulo Perante, 42, driver ng Metro North Gas Corporation.

Batay sa imbestigasyon ng Manila Police District-Station 14, alas-11:30 ng gabi nang mangyari ang insidente.

Nagpapahinga umano ang biktima nang biglang sumabog ang isang 11-kilogram na tangke sa establisimyento.

Sa lakas ng impact, sugatan ang biktima kung saan mabilis na isinugod sa pagamutan.

Nasa mahigit P40,000 ang napinsalang ari-arian.

P6 rollback sa LPG

ni Mai Ancheta | June 2, 2023

Bigtime rollback sa liquefied petroleum gas (LPG) ang mararanasan simula nitong Hunyo 1, mula sa ilang kumpanya ng langis.

Sa inilabas na abiso ng Petron Corporation, P6.20 ang rollback kada kilogram ng household LPG, habang ang Solane naman ay magbabawas ng P6.18 kada kilogram; at ang Auto LPG ay magpapatupad ng P3.37 per liter.

Kasama rin sa nag-rollback ang Phoenix sa kanilang produktong LPG na hindi nalalayo sa anim na piso.

Ikinatuwa naman ito ng mga may-ari ng karinderya tulad ni Aling Rebecca na nasa San Miguel, Manila dahil malaking kabawasan ito sa kanilang budget sa LPG

Taas-presyo sa LPG

ni BRT | May 2, 2023

Nagtaas ang presyo ng Liquified Petroleum Gas (LPG) ngayong buwan ng Mayo dahil sa mas mataas na international contract price.

Ayon sa Petron, nagpapatupad ito ng P0.85 kada kilo (kasama ang VAT) na pagtaas ng presyo sa LPG na epektibo kahapon ng alas-6 ng umaga.

Ang presyo naman ng auto-LPG ay tataas ng P0.48 kada litro.

Nag-anunsyo rin ang Solane ng P0.85/kg na pagtaas sa mga produktong LPG nito, epektibo rin kahapon.

Una nang sinabi ng mga industry expert na ang presyo ng gas, kabilang ang LPG ay inaasahang bababa ng mahigit P1 kada litro sa ngayong araw. Subalit sa huling trading day, sumipa ang international contract price ng LPG kaya nagbago ang tinatayang galaw ng presyo ng LPG sa bansa.