3 beses taas-presyo ngayong Oktubre... LPG, papalo sa P1,600 kada tangke

by BRT @News | October 3, 2026

Photo: File

Inaasahang tatlong beses na tataas ang presyo ng LPG ngayong Oktubre, ayon kay LPG Marketers Association (LPGMA) founder Arnel Ty.

Nakatakda umano ang dagdag na P10 kada kilo simula Oktubre 3, P5 kada kilo sa Oktubre 10, at P3 kada kilo sa Oktubre 17.

Dahil dito, asahan na tataas sa mahigit P1,600 ngayong Oktubre ang dating nasa P1,400 na 11-kilogram na LPG.

Iniuugnay ang inaasahang pagtaas sa patuloy na tensyon sa Gitnang Silangan at problema sa negosasyon ng US at Iran.

Excise tax sa LPG at kerosene, sinuspinde na

ni Mylene Alfonso @News | September 24, 2026

Photo: Sara Duterte at Sal Panelo - FB

Sinuspinde na ng Department of Finance (DOF) ang excise tax sa LPG at kerosene bilang tugon sa patuloy na pagtaas ng presyo ng langis dulot ng nagpapatuloy na sigalot sa Middle East.

Sa pagdinig ng Senado sa panukalang budget ng DOF nitong Martes, inanunsyo ni Finance Secretary Frederick Go na agad niyang nilagdaan ang resolusyon matapos itong makarating sa kanyang tanggapan.

“Kanina lang po umabot sa akin, pinirmahan ko agad-agad,” ani Go.

Gayunman, nilinaw ng DOF na hindi isasama ang diesel at gasolina sa suspensyon ng excise tax. 

Ayon sa ahensya, ang pagtanggal ng buwis sa dalawang produktong ito ay hindi magiging “progressive” at maaaring magdulot ng humigit-kumulang P12 bilyong pagkawala sa kita ng gobyerno bawat buwan.

Ipinaliwanag ni Go na batay sa payo ng mga ekonomista, mas malaki ang pakinabang ng mga mayayamang sektor sa pagbawas ng buwis sa diesel at gasolina dahil sila ang mas malakas gumamit ng mga ito.

Sa halip, sinabi ng DOF na magpapatupad ito ng targeted fuel subsidies upang matulungan ang mga pinakaapektadong sektor habang patuloy na tumataas ang presyo ng krudo.

Dagdag-presyo sa LPG sa Oktubre

ni BRT @News | September 23, 2026

Photo: DepEd / File

Asahan na ang dagdag-presyo sa Liquefied Petroleum Gas (LPG) sa Oktubre.

Ayon kay Atty. Rino Abad, director ng Oil Industry Management Bureau ng Department of Energy, mahal na ang presyo ng inangkat na supply ng mga LPG manufacturer ngayong Setyembre.

Ito’y matapos umanong tumaas ang presyo ng Dubai crude oil mula 90 US dollars kada bariles noong September 1, patungong 128 US dollars kada bariles noong September 16.

Kaya kahit bumaba aniya ang presyo ng Dubai crude oil kamakalawa sa 113 US dollars kada bariles, mahal na ang presyo ng supply na nabili ng mga manufacturer, na ipapasa sa mga konsyumer. (BRT)