Aftershocks, patuloy na yumayanig sa Surigao del Sur

ni Eli San Miguel - Trainee @News | December 7, 2023

Ipinahayag ng Surigao del Sur Provincial Disaster Risk Reduction and Management Office (PDRRMO) na patuloy na aftershocks mula sa lindol na may 7.4 magnitude ang nakakaapekto sa mga pagsisikap na ibalik sa normal ang sitwasyon sa lalawigan.

Nagsasabi ang datos na natanggap ng PDRRMO mula sa Municipal DRRMOs sa lalawigan, na 116,217 pamilya o 480,414 na indibidwal sa 237 barangay ang naapektuhan ng lindol.

Sinabi ng PDRRMO na 20,977 na pamilya o 69,771 na tao ang itinuturing na na-displace dahil nananatili pa rin sila sa 115 evacuation center sa lalawigan.

Nasira ang 834 na bahay at 1,141 ang bahagyang nasira dahil sa lindol at nagkakahalaga ng halos P10.3 milyon.

Umaabot sa P151.3 milyon ang pinsalang naranasan sa imprastruktura at pasilidad, kung saan P110.9 milyon ang para sa mga kalsada, tulay, at pader sa tabing-dagat.

Sa kabilang banda, isang lindol na may magnitude 4.6 ang naramdaman sa Surigao del Sur nitong Huwebes ng umaga, apat na araw matapos ang lindol na may magnitude 7.4 na yumanig sa lalawigan noong Sabado, Disyembre 2.

Iniulat ng Philippine Institute of Volcanology and Seismology (Phivolcs) ang lindol na ito sa ganap na 7:33 ng umaga at matatagpuan ang epicenter nito sa 43 kilometro hilaga-silangan ng Hinatuan, Surigao del Sur, kung saan matatagpuan ang epicenter ng lindol noong Sabado.

May lalim na 21 kilometro ang lindol ngayong Huwebes, ayon sa Phivolcs.

Isa itong aftershock ng lindol noong Disyembre 2 na nagmula sa Philippine Trench.

Iniulat naman ng Phivolcs ang Intensity II sa bayan ng Hinatuan at Intensity I sa Lungsod ng Bislig, Surigao del Sur.

Inaasahan ng Phivolcs na walang pinsala o injury mula sa lindol ngayong Huwebes.

3 patay sa lindol sa Surigao del Sur

ni Eli San Miguel - Trainee @News | December 6, 2023

Umabot na sa tatlo ang bilang ng namatay sa lindol sa Mindanao na may 7.4 magnitude dahil sa dalawang karagdagang nasawi sa rehiyon ng Caraga, ayon sa ulat ng National Disaster Risk Reduction Management Council (NDRRMC) ngayong Miyerkules.

Sinabi ng NDRRMC na patuloy nilang kinukumpirma ang iniulat na mga namatay, kabilang ang isang buntis sa Davao Region, at ang 48 na mga sugatan dahil sa malakas na lindol na may sentro sa Hinatuan, Surigao del Sur.

Batay sa datos ng ahensiya, may kabuuang 132,615 pamilya na binubuo ng 528,203 na indibidwal, ang naapektuhan ng lindol na may mahigit sa 3,300 aftershocks hanggang sa umaga nitong Miyerkules.

Hindi nagsanhi ng tsunami ang malakas na lindol, ngunit iniulat ng NDRRMC ang pinsalang naranasan ng halos 4,000 na bahay, lalo na sa rehiyon ng Caraga. Sa iniulat na pinsalang nangyari sa mga bahay, 304 sa kanila ang hindi na matirahan.

Nakaapekto rin ang lindol sa 19 na linya ng komunikasyon na nagdudulot ng pagputol ng suplay ng kuryente. May mga kalsada at tulay din na hindi pwedeng daanan ng mga sasakyan.

Idineklara ang buong lalawigan ng Surigao del Sur na nasa ilalim na ng state of calamity.

5.7 magnitude na aftershock sa Surigao del Sur, naitala

ni Eli San Miguel - Trainee @News | December 5, 2023

Naitala ng Philippine Institute of Volcanology and Seismology (Phivolcs) ang isang aftershock na may 5.7 magnitude sa ganap na alas-8:34 ng umaga ngayong Martes.

Ayon sa Phivolcs, isa itong aftershock ng lindol na may 6.8 magnitude na tumama sa Cagwait, Surigao del Sur noong Disyembre 4.

Natukoy ang sentro ng aftershock na 44 kilometro (km) sa hilaga-silangan ng Cagwait, Surigao del Sur, sa isang mababaw na lalim na 10 km.

Naramdaman ito sa Intensity IV sa Bayabas, Surigao del Sur, ayon sa Phivolcs.

Naitala rin ng kanilang mga instrumento ang pagyanig sa Intensity II sa City of Tandag, Surigao del Sur, at Intensity I sa City of Bislig, Surigao del Sur, at City of Cabadbaran, Agusan del Norte.