Mga benepisyaryo na mawawala sa programang TUPAD, mabigyan sana ng tulong

ni Leonida Sison @Boses | October 23, 2025

Sa panahon ng krisis at kalamidad, hindi lahat ng bayani ay nakasuot ng uniporme, minsan, sila ay nakatsinelas, may sakong dala-dala, at may hawak na walis. Sila ang mga benepisyaryo ng Tulong Panghanapbuhay sa Ating Disadvantaged/Displaced Workers (TUPAD) ng Department of Labor and Employment (DOLE), mga ordinaryong manggagawang umaasa sa pansamantalang kabuhayang handog ng gobyerno. 

Sa deliberasyon ng 2026 budget, isiniwalat ni Sen. Sherwin Gatchalian, chairman ng Senate Committee on Finance, na halos isang milyong benepisyaryo ng TUPAD ang posibleng maapektuhan ng pagbawas ng budget. Mula sa P18 bilyon — P12.24 bilyon na lang ang nakalaan para sa TUPAD at sa Government Internship Program (GIP). 

Ayon sa DOLE assistant secretary, malaki ang epekto nito lalo na sa mga nawawalan ng trabaho tuwing may bagyo, lindol, o sakuna. Aniya, kung lumiit ang suporta, bababa hindi lang ang bilang ng matutulungan kundi pati ang kalidad ng tulong sa mga pinakaapektado. Ipinaliwanag naman ni DOLE Secretary Bienvenido Laguesma na 50 porsyento ng apat na milyong benepisyaryo ng TUPAD noong 2024 ay tinulungan dahil sa sunud-sunod na kalamidad sa bansa. 

Bagaman tiniyak ni Gatchalian na may natitirang pondo para sa mga lugar na laging tinatamaan ng bagyo kasabay naman nito ang pagbabawas ng isang milyong manggagawa sa saklaw ng programa. 

Gayunman, nitong nakaraang buwan isang mambabatas ay nagpanukala ng realignment ng P46 bilyon mula sa budget ng Department of Public Works and Highways (DPWH) para sa flood control projects, kung saan P14.82 bilyon ay idinagdag sa TUPAD. 

Sa kabila ng lahat, nananatiling malinaw na ang TUPAD ay hindi luho kundi sandigan ng mga Pinoy sa hirap ng buhay. Ito ang pundasyon ng mga nawalan ng kabuhayan at pag-asa. Ang bawat piso ng programang ito ay sumasalamin sa bawat araw na inilalaan ng manggagawang Pinoy. 

Marahil, nararapat lamang na mas paigtingin pa ang mga programang nagbibigay-lakas sa masa. Kailangang mag-isip ng paraan ang gobyerno upang ang mga apektadong kababayan ay patuloy na suportahan sa kanilang kabuhayan. 

Hindi lang ito usapin ng budget, ito ay usapin ng pagkalinga. Dahil sa bawat trabahong pansamantala lamang, may pangarap na gustong magpatuloy.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Good news sa mga motorista, one RFID lang, all tollways na

ni Leonida Sison @Boses | October 22, 2025

Matapos ang halos walong taong paghihintay, tuluyan nang natuldukan ang aberyang matagal nang inirereklamo ng mga motorista. Ang hiwa-hiwalay na RFID para sa iba’t ibang expressway. Sa inilunsad na proyekto ni Pangulong Ferdinand “Bongbong” Marcos, Jr. na “One RFID, All Tollways,” sapat na ngayon ang isang RFID sticker para makadaan sa lahat ng expressways sa Luzon — mula NLEX, SLEX, SCTEX, CAVITEX, CALAX, hanggang TPLEX at Skyway. Isinagawa ang programa sa pakikipagtulungan ng Department of Transportation (DOTr), Toll Regulatory Board (TRB), Metro Pacific Investments Corporation (MPIC) na may-ari ng Easytrip, at SMC Infrastructure na nagpapatakbo ng Autosweep. 

Sa wakas, ang dating pahirap na dalawang RFID system ay napalitan na ng interoperability, isang simpleng teknolohiyang may malaking epekto sa araw-araw na buhay ng bawat Pinoy. Ayon kay DOTr Acting Secretary Giovanni Lopez, walong taon ang ginugol bago maipatupad ang sistemang ito dahil sa mga teknikal at regulasyong kailangang talakayin. Dahil dito, tuluyan nang natupad ang pangarap na mula Norte hanggang Sur, at maginhawa na ang pagbiyahe. Maging ang chairman ng MPIC ay nagpahayag ng pagbati sa gobyerno na sa wakas ang proyektong matagal nilang hinintay ay natupad na. Ganito rin ang sentimyento ng SMC Infrastructure, na nagpahayag ng suporta sa bagong sistema at tiniyak ang seguridad at kadalian ng transaksyon. 

Nilinaw naman ni Lopez na hindi kasama sa mga rason ng pagtaas ng toll fees ang One RFID. Dahil ang layunin nito ay mas mapabilis ang daloy ng trapiko at mabawasan ang abala sa mga toll plaza, lalo na sa mga motorista na dati’y nag-aalangan kung alin sa dalawang RFID ang gagamitin.

 Ang hakbanging ito ay hindi lamang tungkol sa mas madali at mabilis na pagbiyahe, ito ay sumasalamin sa epektibong koordinasyon ng gobyerno at pribadong sektor. 

Sa panahon kung saan madalas sabihing mabagal ang ating pag-asenso, pinatunayan ng proyektong ito na kapag gusto, may paraan. 

Ang One RFID ay higit pa sa sticker na ikinakabit sa ating mga sasakyan, ito ay tanda ng pag-unlad, modernisasyon, at malasakit sa bawat mamamayan. Isa rin itong paalala na kapag nakikinig ang pamahalaan sa mga hinaing ng taumbayan, nagkakaroon ng direksyon ang bawat plano at nagbibigay daan sa ating bansa para sa tunay na pagkakaisa at pagbabago.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

AFP, ‘di nagpatinag sa fake news, maling paratang pinabulaanan

ni Leonida Sison @Boses | October 20, 2025

Sa rami ng kumakalat na fake news sa social media, pati pensyon ng mga sundalo, ginawang isyu. Pero buti na lang, mabilis tumindig ang Armed Forces of the Philippines (AFP) para ituwid ang maling balita na gusto umano ni Pangulong Ferdinand “Bongbong” Marcos, Jr. na ipatigil ang military pension. 

Dahil laganap na ang fake news, minsan kailangan din ng tapang, hindi para makipagbakbakan kundi para ipagtanggol ang katotohanan. 

Sa opisyal na pahayag ng AFP, iginiit nilang walang utos, polisiya, o plano mula sa Pangulo o alinmang ahensya ng gobyerno na tanggalin ang benepisyo ng mga retiradong sundalo at militar. Sa halip, binigyang-diin ng kagawaran na ang Pangulo ang siyang paulit-ulit na nagpahayag ng buong suporta sa mga uniformed personnel, mula sa kanilang serbisyo hanggang sa seguridad ng kanilang pensyon. 

Nilinaw din ng AFP na ang military pensions ay protektado ng batas at itinuturing na earned benefit matapos ang hindi bababa sa 20 taon ng tapat at marangal na serbisyo. 

Hindi basta-basta maaaring bawiin ang naturang pensyon, maliban na lamang kung ang isang retirado ay mapatunayang nagkasala na nahatulan ng isang krimen sa ilalim ng tamang proseso.

Hinimok naman nila ang ilan na itigil na ang pagpapakalat ng maling impormasyon. Anila, ang ganitong pahayag ay nakakapagpahina ng moral ng mga sundalo at nakapagdudulot ng pagkakawatak-watak sa publiko. 

Sa kabila ng kontrobersiya, nanindigan ang AFP sa kanilang katapatan sa Konstitusyon at sa bansa, na patuloy silang maglilingkod ng may dangal, integridad, at patriotismo. 

Malinaw na hindi lang maling impormasyon ang kalaban ng mga militar, ito rin ay laban para sa tiwala ng taumbayan. Dahil sa panahon ng social media, isang maling post ay kayang magdulot ng pagdududa sa institusyong ginagalang ng marami. Mabuti at mabilis kumilos ang AFP, nagawa nilang linawin ang lahat bago pa tuluyang kumalat ang mga maling ispekulasyon sa kanilang hanay, kung saan mas pinipili nilang pairalin ang katotohanan at kanilang disiplina. 

Tama rin ang ginawang pagtindig ng sundalo at militar. Hindi lang nila ipinagtanggol ang kanilang benepisyo kundi pati ang dangal ng kanilang uniporme. 

Sa halip na maniwala sa kasinungalingan, dapat tayong matutong magsuri bago mag-react. Dahil kung ang mga sundalo ay marunong magpigil sa gitna ng maling paratang, tayong mga sibilyan ay dapat ding matutong magpigil sa pag-share ng fake news. 

Ang tunay na sandata ng bayan ay hindi bala at baril, kundi ang katotohanan at pagkakaisa. Kaya dapat sabay-sabay nating labanan ang fake news.

Habang nananatiling matatag ang mga sundalo anuman man ang kanilang laban, dapat din tayong maging matatag na hindi basta paniwalaan ang mga maling impormasyon dahil darating ang panahon na lalabas din ang totoo at tama.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com