Mga hotel na dedma sa health protocols, sampolan!

ni Leonida Bonifacio Sison - @Boses | January 17, 2021

Dahil sa umano’y paglabag ng City Garden Hotel sa Makati City kung saan natagpuang walang buhay ang flight attendant na si Christine Dacera noong Enero 1, iniimbestigahan na ng Department of Tourism (DOT) ang ilang mga hotel na lumalabag umano sa mga health at quarantine protocols ng bansa.

Ito ay kasunod ng imbestigasyon sa naturang hotel hinggil sa pagtanggap umano ng mga staycation guest.

Ayon kay Tourism Secretary Bernadette Romulo-Puyat, may iba pa silang mga hotel na iniimbestigahan, gayundin, naghain na ng show cause order sa ibang establisimyento sa paglabag sa protocols.

Giit pa ng kalihim, hindi umano nagkulang ang ahensiya sa pagpapaalala at kasuwapangan na umano kung pagsasamahin ang mga staycation guest at mga naka-quarantine.

Dahil dito, nagdesisyon ang DOT na tanggalin ang certificate to operate ng City Garden Grand Hotel habang may quarantine at sinuspinde ng 6 buwan ang accreditation nito.

Gayundin, mas mahigpit na ang DOT ngayon, lalo na’t may bagong strain ng COVID-19 sa Pilipinas na sinasabing mas madaling makahawa, sa kabila ng layuning pataasin ang domestic tourism sa bansa dahil matatandaang, bumagsak ng 84% ang foreign tourism arrivals sa bansa dahil sa mga travel restriction.

Sa totoo lang, nakadidismaya dahil hanggang ngayon, napakarami pa ring lumalabag sa iba’t ibang kautusan kontra COVID-19. Ang masaklap pa, mga negosyante ang lumalabag at tila wa’ paki kung magkaroon ng hawaan sa kanilang establisimyento.

Kaya pakiusap sa mga kinauukulan, patuloy na imbestigahan at sampolan ang mga hotel na dedma sa umiiral na protocols.

At paalala sa mga negosyante riyan, kapag binigyan kayo ng pagkakataong kumita, sana ay sumunod naman kayo sa mga kautusan. Hindi kasi puwedeng kumikita nga kayo at nakakabawi sa pagkalugi, pero inilalagay n’yo naman sa panganib ang kaligtasan ng inyong mga kostumer.

‘Ika nga, ‘wag pera-pera. Magpakita naman kayo ng malasakit sa ating mga kababayan at ‘wag puro sa sarili.

Sa panahon ng pandemya, lahat tayo ay dapat maging bahagi ng solusyon at hindi maging ugat ng panibagong problema.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pagiging arogante at kawalan ng simpatya ng gov’t officials, ‘di nakakatulong sa bansa!

ni Leonida Bonifacio Sison - @Boses | January 16, 2021

Hanggang ngayon, hindi pa rin tapos ang diskusyon hinggil sa naging pahayag ni Presidential Spokesperson Harry Roque na hindi dapat maging mapili ang mga Pilipino sa bakuna vs. COVID-19 gayung libre naman ito.

As usual, inulan ito ng iba’t ibang reaksiyon sa publiko, gayundin sa ilang opisyal ng gobyerno.

Kaugnay nito, napatanong tuloy ang isang mambabatas ng, “Gaano kahirap magpakita ng simpatya sa panahong ito?”

Giit ng mambabatas, dapat pagsabihan ng Palasyo ang tagapagsalita dahil hindi umano nakatutulong ang insensitive at aroganteng pananalita nito sa damdamin ng publiko.

Bagama’t kinikilala ang pagsisikap ng Inter-Agency Task Force at vaccine czar na makabili ng COVID-19 vaccines, hindi umano dapat palampasin ang mga aroganteng pahayag ng opisyal.

Sa totoo lang, maraming nadidismaya sa paraan ng pagsasalita ng ni Spox Roque.

Anila, parang hindi opisyal ng gobyerno ang nagsasalita dahil madalas, baluktot na katwiran ang ibinibigay nito sa mamamayang humihingi ng mahusay na serbisyo.

Ngayong panahon ng pandemya, mas kailangan ng taumbayan ang inyong lubos na pang-unawa at simpatya. Kaya utang na loob, maging sensitibo naman tayo sa mga pahayag na ating binibitiwan, lalo pa’t anumang gawin o sabihin n’yo ay dala-dala n’yo ang pangalan ng gobyerno.

Bilang opisyal, dapat ninyong ipakita na kayo ay handang magserbisyo sa publiko, anuman ang kalagayan ng bansa.

Kumbaga, gawin ninyong makabuluhan ang inyong pagsisilbi sa bayan dahil mas magandang tumatak sa publiko ang inyong magandang serbisyo at hindi ang pagiging arogante.

Tandaan, ang bawat ginagawa n’yo ay may epekto sa publiko at ngayong nakikipaglaban tayo sa pandemya, maging mabuti tayo sa isa’t isa — mapa-salita man ‘yan o gawa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pasaway na PUV drivers at komyuter, walang kadala-dala!

ni Leonida Bonifacio Sison - @Boses | January 14, 2021

Hindi bababa sa 20 bus na dumadaan sa EDSA-Santolan busway ang tinikitan ng mga kawani ng Inter-Agency Council Traffic (I-ACT) dahil sa hindi pagsunod sa health protocols vs. COVID-19, partikular sa ipinatutupad na one-seat-apart ng mga pasahero sa pampublikong sasakyan.

Ayon sa lider ng I-ACT team, kabilang sa mga nasita ay ang hindi pagpapatupad ng one-seat-apart na utos ng pandemic task force, na mahalaga upang maipatupad ang physical distancing sa mga pasahero.

Kaya matapos ang ilang linggong pagbibigay-babala at paalala sa mga bus driver, konduktor at operators, nagsimula nang maniket noong Martes ang task force sa mga lumalabag.

Giit ng I-ACT, dapat nasa 50% lang ang kapasidad ng mga bus, kaya nasa 25% hanggang 30% lang ang mga pasaherong dapat isinasakay ng mga ito.

Kabilang sa mga nasita ay ang isang bus na eksaktong nagsakay ng pasahero sa Santolan station.

Paliwanag ng drayber, sumusunod sila sa kautusan sa one seat apart, ngunit naaktuhan lamang na hindi nila napansin kung saan umupo ang pasaherong kasasakay lang.

Samantala, tuluy-tuloy ang paniniket ng I-ACT hanggang sa matuto umano ang mga bus driver at konduktor na seryosohin ang health protocols para sa kaligtasan ng mga pasahero.

Sa totoo lang, matagal nang ganito ang sitwasyon sa mga pampublikong sasakyan. Tipong kahit dikit-dikit ang mga pasahero, dedma na para lang makapasok o makauwi sa trabaho.

At siyempre, dahil parang wala namang nagrereklamo, larga lang nang larga ang mga tsuper dahil dagdag-kita rin.

Ngunit sa kabilang banda, nakadidismaya rin dahil parang wala tayong kadala-dala. Ang nangyayari kasi, wa’ ‘wenta ang mga protocols dahil hindi naman sinusunod.

Baka nakakalimutan nating ginagawa ang mga ito bilang hakbang kontra COVID-19.

Tandaan, hindi pa rin bumubuti ang sitwasyon ng COVID-19 sa bansa, kaya hindi dapat isantabi ang pag-iingat.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com