Pagtiyak na walang hawaan ‘pag nag-MGCQ, ‘wag lang iasa sa LGUs!

ni Leonida Bonifacio Sison - @Boses | February 22, 2021

Hindi pa man pinal ang desisyon kung isasailalim sa modified general community quarantine (MGCQ) ang bansa sa susunod na buwan, kani-kanyang payo na ang mga eksperto at ilang ahensiya ng pamahalaan sa taumbayan, partikular sa mga lokal na pamahalaan.

Kaugnay nito, sinabihan ng Department of Health (DOH) ang local government units (LGUs) na mag-level up sa COVID-19 response sakaling matuloy ang pagluluwag ng quarantine.

Dagdag pa ng ahensiya, alam na dapat ng mga lokal na pamahalaan kung paano reresponde sa pandemya, luwagan man o hindi ang quarantine restrictions.

Matatandaang sa kabila ng pagiging sentro ng pandemya at matagal na pagdadalawang-isip, mayorya ng NCR mayors ang pabor sa pagsailalim ng buong bansa sa MGCQ upang umusad ang ekonomiya.

Gayunman, nagbabala ang health experts at ilang alkalde na possible itong maging sanhi ng muling pagtaas ng COVID-19 cases at nanindigang dapat munang hintayin ang bakuna.

Sa totoo lang, malaki ang papel ng mga lokal na pamahalaan sa pagtugon sa pandemya, pero aminin na natin, hindi lamang sila ang dapat nating asahan dahil ang nasyonal na pamahalaan ay may dapat ding gawin. Kumbaga, ‘wag lang ipasa sa mga LGU ang responsibilidad, galaw-galaw din dahil ‘ika nga, “We Heal as One”.

Mula nang ipatupad ang enhanced community quarantine (ECQ) noong Marso ng nakaraang taon, kapansin-pansing napakarami nang nagawa ng ating mga alkalde.

Kani-kanilang diskarte upang makakuha ng pondo para patuloy na makapagbigay ng ayuda, kani-kanyang kilos para mapabilis at maging epektibo ang contact tracing at ngayon, todo-kayod para makakuha ng bakuna.

Oras na luwagan ang quarantine restrictions, napakaraming magbabago. Asahan na nating mas maraming tao sa labas, lalo na ang mga bata, kaya plis lang, palakasin pa ang puwersa ng ating mga barangay tanod o kapulisan upang matiyak na nasusunod ang health protocols.

Isa pa, dapat lang din na paghandaan, hindi lang ng LGUs kundi pati ang nasyonal na pamahalaan, ang mga puwedeng mangyari sakaling matuloy ang hakbang na ito.

Nakakabilib din dahil kitang-kita naman ang mga pagsisikap ng ating mga lokal na pamahalaan, kaya hangad nating magtuluy-tuloy pa ito hanggang malampasan natin ang pandemya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

‘Pinas, ready na raw magbakuna pero delayed ang COVID vaccine, anyare?

ni Leonida Bonifacio Sison - @Boses | February 21, 2021

Nakatakdang dumating ngayong ikalawa hanggang ikatlong linggo ng Pebrero ang COVID-19 vaccine mula sa COVAX facility ng World Health Organization (WHO) pero naantala ito.

Kasabay ng patuloy na paghahanda ng mga lokal na pamahalaan at ilang ospital, humingi ng pasensiya si vaccine czar Carlito Galvez Jr. sa mga alkalde ng Metro Manila dahil sa pagkaantala ng pagdating sa Pilipinas ng mga bakuna kontra COVID-19.

Paliwanag ni Galvez, naghigpit ang Pfizer sa indemnification agreement na gagarantiyang protektado ito mula sa habla, sakaling may makaranas ng adverse o negatibong side effect sa mga mababakunahan.

Rekisito ang indemnification agreement o bayad-pinsala — sa pagkuha ng Pilipinas ng tiyak na petsa ng pagdating ng COVAX facility vaccines sa bansa.

Habang naghihintay ang taumbayan sa pagdating at pag-rollout ng bakuna, inihayag ng Malacañang, maging si Pangulong Rodrigo Duterte ay naiinip na sa pagdating ng bakuna, na dapat darating ngayong buwan.

Gayundin, nananabik na umanong magpaturok ang mga frontliners, partikular ang mga medical workers bilang dagdag-proteksiyon laban sa virus.

Habang naghihintay ng bakuna, ang tanging magagawa natin ay ang ‘wag magpasaway.

Baka kasi masyado tayong kampante na may parating na bakuna, at ang ending, hindi pa man nababakunahan ay umaasta na tayong normal na ang lahat.

Panawagan sa mga kinauukulan, galaw-galaw ho at ‘wag puro pramis. Sana naman, matiyak na kung kailan ang dating ng bakuna para maiwasan ang delay sa rollout at pagbabakuna.

Matatandaang kamakailan, sinabi pa nating handa na tayo sa gagawing pagbabakuna, pero ang ending, delayed pala.

Maraming umaasa sa bakuna para sa kanilang kaligtasan, lalo na ang mga medical frontliners na buwis-buhay sa araw-araw na pakikipaglaban sa pandemya.

Hangad nating masolusyunan ito agad dahil sayang ang panahon, lalo pa ngayong usap-usapan ang pagluluwag ng quarantine sa bansa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

‘Pinas, ready ba talaga sa MGCQ?!

ni Leonida Bonifacio Sison - @Boses | February 20, 2021

Matapos hilingin ng National Economic Development Authority (NEDA) na isailalim sa modified general community quarantine (MGCQ) ang buong Pilipinas sa Marso upang umusad ang ekonomiya, agad na nagpahayag ng iba’t ibang opinyon ang publiko, ilang alkalde at maging ang ilang ahensiya ng gobyerno.

Unang pinalagan ng dalawang NCR mayors ang proposal dahil anila, dapat hintayin na lang ang bakuna, gayundin, kailangan umanong hilingin ang opinyon ng mga health experts hinggil dito.

Ang Department of Transportation (DOTr) naman, nangakong kayang itaas sa 70% ang kapasidad ng public transport sakaling payagan ang MGCQ sa bansa.

Samantala, ibinabala rin ng ilang health experts ang posibilidad na humiling ulit ng “time-out” ang mga medical frontliners dahil posibleng muling tumaas ang COVID-19 cases sa bansa. At kamakailan naman, mayorya ng Metro Manila Mayors ang pumabor sa MGCQ sa Marso 1 para makabawi ang ekonomiya.

Kaya naman, nagpaalala ang World Health Organization (WHO) sa mga opisyal ng Pilipinas sa posibleng sumirit ulit ang COVID-19 cases kung itutuloy ang pagbababa ng quarantine protocols sa ‘Pinas.

Bagama’t nauunawaan ng WHO ang pangangailangan na buksan na ang ekonomiya, kailangan din umanong masusing pag-aralan ang mga lahat ng panuntunan bago ito pagdesisyunan at ipatupad.

Sa totoo lang, napakarami pang kailangan ikonsidera, kaya ang tanong, handa na ba talaga tayo sa mga susunod na mangyayari oras na payagan ang pagluwag ng quarantine?

Tulad ng paulit-ulit nating sinasabi, dapat nating pag-aralang mabuti kung paano maibabangon ang ekonomiya nang hindi nalalagay sa panganib ang ating mga kababayan dahil ngayon pa lang, kung kinakailangang mas higpitan ang pagpapatupad ng health protocols, gawin na.

Tulad na lang ng signages sa mga estabilsimyento na “No facemask and no face shield, no entry”, pero nakakapasok naman ang mga kostumer nang walang faceshield at hindi nakasuot nang maayos ang facemask. Sa mga pampublikong sasakyan, kung hindi kapiraso ang pagitan ng mga pasehero, sira-sira naman ang barrier.

Ilan lang ‘yan sa mga kasalukuyang nangyayari habang nasa general community quarantine (GCQ) ang ilang lugar sa bansa, kabilang ang Metro Manila.

Napakalaking hamon nito para sa ating pamahalaan, kaya kung mailalagay sa MGCQ ang ‘Pinas, paano na? Kakayanin ba talaga?

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com