Mga OFW na nadamay sa Hong Kong fire, saklolohan

ni Leonida Sison @Boses | November 28, 2025

Nakakalungkot ang nangyaring trahedya na yumanig sa Hong Kong. Buti na lamang at hanggang ngayon, walang kumpirmadong Pinoy ang nasawi o nasugatan sa malagim na sunog sa Tai Po. 

Isang pakikiramay din sa mga pamilyang nawalan ng mahal sa buhay — dahil ang apoy na ito, na kumitil ng buhay ng hindi bababa sa 44 katao at nag-iwan ng halos 300 nawawala, ay isa sa pinakamadilim na pangyayari sa lungsod sa nakalipas na mga dekada. 

Ayon sa Department of Foreign Affairs (DFA), wala pang kasong nag-uugnay sa Pinoy casualties sa Level 5 fire na tumupok sa pitong high-rise building sa Tai Po District. Gayunman, may natanggap ang Philippine Consulate General ng unverified reports na posibleng may ilang Filipino domestic workers na na-trap sa loob ng mga gusali. 

Agad itong ipinasa sa Hong Kong authorities para sa agarang aksyon. Patuloy din ang koordinasyon ng DFA, Consulate General, Hong Kong Police Force, at Hong Kong Fire Services Department. 

Dahil sa laki ng sunog at tindi ng pinsala, mabagal ang paglabas ng opisyal na bilang ng mga biktima. Ilang gusali ang tumagal lamang ng mahigit 10 oras bago tuluyang nasunog. 

Ang apoy, ayon sa mga ulat, ay mabilis na kumalat dahil sa flammable foam materials at bamboo scaffolding na nakabalot sa mga tower, mga materyales na matagal nang pinapa-phase out sa Hong Kong dahil sa panganib na dala nito. Tatlong lalaki mula sa construction company na nagsasagawa ng maintenance ang inaresto dahil sa suspicion of manslaughter, habang nagsara ang mga highway, nagkansela rin ng mga klase sa anim na paaralan, at napuno ang komunidad ng takot at pagdadalamhati. 

Isa itong trahedyang hinding-hindi malilimutan sa Hong Kong, na huli nang nakaranas ng ganito kalaking sunog noong 1996. Habang patuloy nating hinihintay ang kumpletong impormasyon tungkol sa ating mga kababayan, malinaw na ang buhay ng bawat OFW ay delikado, pero para sa pangarap, at sa kanilang pamilyang naghihintay, sila ay lumalaban. 

Kapag may krisis sa abroad, ang kaba ng kanilang pamilya ay parang sunog na kumakalat, masakit at mahirap sa damdamin. 

Patuloy nating ipagdasal sa ngayon ang ligtas na kalagayan ng ating mga kababayan, gayundin hindi dapat kinakalimutan ang mga nasawi. 

Sa panahon ng trahedya, hindi natin alam kung kailan ito darating o tatama sa atin.

Nararapat lamang na lagi tayong maging handa.

Dapat ding tutukan ang kalagayan ng ating mga OFW na patuloy na kumakayod para sa kinabukasan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Droga, ipinupuslit sa stuffed toys, dapat pigilan

ni Leonida Sison @Boses | November 27, 2025

Magising na dapat ang lahat sa katotohanang kahit mga laruan na para sana sa kasiyahan ng nakararami ay nagiging daan sa ilegal na gawain. 

Ang pagkakasamsam ng Bureau of Customs (BOC) ng P807,000 halaga ng high-grade “kush” marijuana na itinago sa loob ng Labubu stuffed toy keychains sa Port of Clark ay malinaw na patunay na desperado at matindi na ang galawan ng drug smuggling ngayon sa bansa. 

Ayon sa BOC, ang parcel na mula Hong Kong na patungo sa Biñan, Laguna ay dumating noong Nob. 15. Sa paunang X-ray inspection, nakitaan ito ng kahina-hinalang imahe, kaya isinailalim pa sa K-9 inspection ng Philippine Drug Enforcement Agency (PDEA) noong Nob. 19. Nagpositibo ito sa illegal drugs, dahilan para buksan at suriin nang buo ang laman. Nadiskubre umano ng mga otoridad ang 538 gramo ng hinihinalang pinatuyong dahon at fruiting tops na nakasilid sa dalawang sealed pouches sa loob ng kahon ng collectible keychains. 

Kinumpirma ng laboratory test na ang laman ay tetrahydrocannabinol (THC) — ito ay psychoactive compound ng marijuana. 

Dahil dito, agad naglabas ng Warrant of Seizure and Detention ang BOC para sa paglabag sa Sections 118(g), 119(d), at 1113 ng Customs Modernization and Tariff Act, kaugnay ng Republic Act 9165 (Dangerous Drugs Act). 

Ang mabilis na koordinasyon ng Port of Clark personnel at PDEA, at sa profiling efforts ng frontline officers ay nasabat ang napakalaking halaga ng marijuana. Kaya naman nananatili ang Port of Clark na nasa heightened alert laban sa drug smuggling. Ito rin ay nasa direktiba ng Pangulo, kung saan dapat palakasin ang ating border security. 

Kung ang stuffed toy keychains na pambata ay nagiging taguan na ng droga, lalong dapat mag-ingat ang publiko. 

Hindi lahat ng mukhang maganda at maayos ang panlabas ay ligtas nang gamitin o bilhin. Kung may batang makakuha ng ganitong produkto, tiyak ang panganib na idudulot nito.

Ang ganitong modus ay hindi lang maituturing na krimen, bagkus sadyang walang konsensyang nagsasamantala makapagpuslit lamang ng droga. 

Dapat na higpitan ng kinauukulan ang pagbabantay. Kailangang maging mas agresibo ang kampanya kontra-drug smuggling, lalo na kung ginagamitan na ng mga sindikato ng kakaibang diskarte para malusutan ang batas. 

Kailangan ding isipin ang seguridad ng bawat pamayanan, lalo na ng mga bata, kung saan hindi dapat isugal. Huwag hayaan na nagagamit ang mga simpleng laruan sa mga ilegal na gawain.

Nararapat na patuloy ang mga hakbangin ng ating gobyerno para pigilan ang mga ganitong uri ng krimen. Panahon na rin para paigtingin, tuldukan at tuluyang wakasan ang drug smuggling sa ating bansa.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Publiko, di dapat kanlungin ang mga akusado sa flood control scam

ni Leonida Sison @Boses | November 26, 2025

Malinaw na ang pagtulong o pagsaklolo sa mga taong tumatakas sa batas ay hindi kabayanihan, kundi tahasang pagbaluktot ng hustisya. 

Kaya tama lang na pinaigting ng Philippine National Police (PNP) at National Bureau of Investigation (NBI) ang malawakang manhunt laban sa mga akusadong sangkot sa umano’y P289 million flood control scam sa Oriental Mindoro. 

Sa pahayag ni Lt. Gen. Jose Melencio Nartatez Jr., acting PNP chief, na maliwanag ang kanilang babala na sa sinumang kumanlong, kumupkop, magtago o tumulong sa mga akusado ay may kaparusahan. Ito ay pagpapatupad ng batas sa harap ng kasong may bigat at epekto sa taumbayan. 

At lalo pang tumindi ang panawagan ng mga otoridad matapos maaresto ang ilang opisyal ng Department of Public Works ang Highways (DPWH), kabilang ang isang engineer na nakuha sa bahay na pag-aari umano ng isang pulitiko mula sa Mindoro. 

Sa ngayon, pitong co-respondents ni dating Ako Bicol Rep. Zaldy Co ang nasa kustodiya na ng pulisya. Ang natitira pang mga akusado ay hinahabol at hinihikayat na sumuko para harapin ang kaso. 

Inanunsyo rin ng NBI ang pagkakaaresto naman sa isang opisyal ng DPWH, sa Quezon City matapos umano itong umiwas sa warrant of arrest sa Cavite. 

Ayon kay NBI OIC Angelito Magno, iniimbestigahan na nila kung sinu-sino ang posibleng tumulong sa suspek para makatakas. Iginiit din ng NBI na ang sinumang magtangkang magkubli ng kriminal ay lumalabag sa batas at papanagutin. 

Kasabay nito, nagbabala ang Department of the Interior and Local Government (DILG) na ang pagtatago ng akusado ay may kaakibat na kaparusahan, habang patuloy ang kanilang panawagan na sumuko na ang mga akusado bago pa man humantong sa habulan. 

Ang ugat ng problema ay hindi lang ang ninakaw na pondo sa mga programa at proyekto ng ating bansa. Ang mas malalim na sakit ay ang kultura ng pagtatanggol o pagtatakip sa mga kriminal, mga opisyal na nagkukubli, mga indibidwal na tumutulong para itago ang mga tiwali, at sistemang ginagawang ligtas ang dapat sana ay managot.

Hindi makakamtan ang tunay na hustisya kung patuloy na may mga taong nagpapanggap na mabuti para pagtakpan ang kasalanan ng iba. Kung may inaasam tayong pagbabago, dapat simulan sa malinaw na prinsipyo, walang sinuman — opisyal man, pulitiko o pribadong indibidwal, ang dapat kumampi sa kriminal. 

Ang pagpapatupad ng batas ay hindi lamang trabaho ng mga ahensya, kundi obligasyon ng bawat Pinoy na huwag maging kakutsaba ng katiwalian. 

Kung gusto nating wakasan ang mga anomalya, dapat pigilan hindi lang ang mga magnanakaw, kundi pati ang mga nagtatanggol sa mga akusado.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com