DOE: Publiko ‘wag muna mag-panic, imbak na langis sapat pa ng 40 araw

ni Leonida Sison @Boses | March 19, 2026

Hindi pa muna dapat mag-panic ang publiko, dahil sa kabila ng pangamba ng marami, tiniyak ng Department of Energy (DOE) na may sapat pang suplay ng petrolyo ang bansa, pero ang tanong ng marami, hanggang kailan ito magiging sapat?. 

Ngunit sa likod ng katiyakang ito, nananatiling sensitibo ang sitwasyon, lalo na para sa ordinaryong mamamayan na araw-araw umaasa sa abot-kayang presyo ng gasolina.

Ayon sa DOE, hindi pa kinakailangan ang pagrarasyon ng langis dahil nananatiling matatag ang imbentaryo ng bansa, na tinatayang aabot pa sa mahigit 40 araw. Ibig sabihin, kahit may kaguluhan sa pandaigdigang merkado, may sapat pang buffer ang Pilipinas upang maiwasan ang agarang kakulangan sa suplay ng gasolina at diesel.

Gayunpaman, hindi ito nangangahulugan na wala nang dapat ikabahala. Sa katunayan, mas pinaigting ngayon ng pamahalaan ang pagbabantay laban sa mga posibleng hoarding o pagtatago ng langis na maaaring magdulot ng artificial shortage. 

Ang ganitong gawain ay hindi lamang ilegal kundi direktang magpapasakit sa bulsa ng taumbayan dahil maaaring magdulot ito ng biglaang pagtaas ng presyo.

Bilang paghahanda sa mga posibleng epekto ng patuloy na tensyon sa Middle East, sinisikap din ng gobyerno na palakasin ang ugnayan sa ibang bansa tulad ng Russia at China upang matiyak ang tuluy-tuloy na suplay ng petrolyo. 

Isa itong hakbang upang hindi lubusang umasa sa iisang pinanggagalingan ng langis, lalo na sa panahong hindi tiyak ang galaw ng pandaigdigang merkado.

Kasabay nito, nananawagan ang DOE sa publiko na umiwas sa panic buying, dahil maaari itong magpalala ng sitwasyon. 

Kapag nag-unahan ang mga mamimili sa pagbili ng gasolina, nagkakaroon ng impresyon ng kakulangan kahit sapat naman ang suplay. 

Pinayuhan din ang publiko na agad i-report ang anumang kahina-hinalang aktibidad ng mga gasolinahan sa DOE o sa pamamagitan ng E-Gov PH app upang mapigilan ang pang-aabuso.

Sa ganang akin, mahalaga ang malinaw at transparent na komunikasyon mula sa pamahalaan. Ang katiyakan ng suplay ay hindi lamang usapin ng numero kundi ng tiwala. 

Kapag ramdam ng mamamayan na kontrolado ang sitwasyon, mas nagiging maayos ang daloy ng merkado at naiiwasan ang ‘pagpa-panic.

Ang usapin dito ay hindi lamang kung sapat ang suplay ng langis kundi kung paano mapapanatiling abot-kaya ang presyo nito para sa mga mamamayan. Dahil ‘pag usapang reyalidad, kahit may sapat na imbentaryo, kung mataas naman ang presyo, patuloy pa ring magdurusa ang taumbayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Panawagan para sa makatarungang kita sa transportasyon

ni Leonida Sison @Boses | March 18, 2026

Ipantay ang taas ng pasahe sa bigat ng krisis na ating kinakaharap, dahil malinaw ang panawagan ng mga tsuper na patuloy na binabayo at nagpapahirap, dulot ng walang sawang pagtaas ng presyo sa petrolyo. 

Sa gitna ng halos dobleng taas ng diesel, tila barya lamang ang naging tugon ng pamahalaan sa pamamagitan ng P1 dagdag-pasahe. Hindi ito solusyon kundi simbolo ng kakulangan sa malasakit sa sektor na araw-araw bumubuhay sa galaw ng ekonomiya.

Kamakailan, inaprubahan ng Department of Transportation (DOTr) ang provisional fare increase na P1 para sa traditional jeepneys at P2 para sa modern jeepneys. 

Ito ay kasunod ng sunud-sunod na pagtaas ng presyo ng petrolyo dulot ng tensyon sa Middle East. Ngunit para sa mga transport group tulad ng Manibela at Piston, ang nasabing dagdag ay malayo sa kanilang hinihinging P5 na umento.

Ayon sa Manibela, tila sampal sa mukha ng mga tsuper ang napakaliit na dagdag-pasahe kumpara sa higit 100 porsyentong pagtaas ng diesel. Dagdag pa rito, tila kulang sa masusing pag-aaral ang naging basehan ng desisyon ng mga ahensya tulad ng DOTr at Land Transportation Franchising and Regulatory Board (LTFRB).

Samantala, iginiit naman ng pangulo ng Piston, na halos walang epekto sa kita ng mga tsuper ang P1 dagdag-pasahe. Aniya, katumbas lamang ito ng humigit-kumulang P200 dagdag kita kada araw, samantalang umaabot na sa P3,600 ang arawang gastos sa diesel batay sa presyong P120 kada litro at konsumo na 30 litro. Sa ganitong sitwasyon, malinaw na mas malaki pa rin ang lugi kaysa kita.

Dahil dito, inanunsyo ng Piston ang planong nationwide transport strike simula Marso 19, bilang protesta sa umano’y kakulangan ng aksyon ng administrasyon ni Ferdinand “Bongbong” Marcos Jr. sa patuloy na pagtaas ng presyo ng langis. 

Nanindigan ang grupo na itutuloy ang kanilang kilos-protesta hangga’t hindi natutugunan ang kanilang mga panawagan, kabilang ang pagtanggal ng VAT at excise tax sa petrolyo.

Para sa mga tsuper, hindi simpatiya ang kanilang hinihingi kundi makatarungang kita na sapat para sa kanilang pamilya at pang-araw-araw na operasyon. 

Ang maliit na dagdag-pasahe ay hindi lamang usapin ng kita, kundi repleksyon ng kung paano tinitimbang ang kapakanan ng sektor na nagsisilbing gulugod ng pampublikong transportasyon.

Ang epekto nito ay hindi lamang mararamdaman ng mga tsuper kundi pati ng mga komyuter. Kapag bumagsak ang sektor ng transportasyon, buong sambayanan ang maaapektuhan. Ang krisis na ito ay paalala na ang solusyon ay hindi dapat patingi-tingi, kundi dapat sumabay sa laki ng problemang kinakaharap ng taumbayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

₱5K ayuda sa mga tsuper, dapat sabayan ng reporma sa presyo ng petrolyo

ni Leonida Sison @Boses | March 17, 2026

Maayos sanang maibigay ang tulong ng pamahalaan sa mga tsuper na araw-araw na lumalaban sa hirap ng buhay, lalo na ngayong hirap ng solusyunan ang malalang price hike ng fuel sa bansa. 

Sa gitna ng krisis sa petrolyo, malinaw na ang sektor ng transportasyon ang isa sa mga pinakaunang tinatamaan. 

Kaya naman malaking bagay para sa mga tsuper ang inanunsyong P5,000 cash assistance mula sa Department of Social Welfare and Development (DSWD). Ngunit para sa maraming Pinoy, ang tanong ay kung sapat ba itong tulong laban sa patuloy na pagtaas ng gastos sa pamamasada.

Simula Marso 17, magsisimula ang pamamahagi ng P5,000 na ayuda para sa mga public utility vehicle (PUV) drivers na labis na naapektuhan ng tumataas na presyo ng langis. 

Sa unang rollout ng programa, tinatayang 139,000 tricycle drivers sa Metro Manila ang makikinabang sa tulong pinansyal. Ang pondo ay kukunin mula sa Assistance to Individuals in Crisis Situation (AICS) program ng DSWD.

Ayon sa opisyal ng DSWD, itinuturing ng ahensya na nasa “economic distress” ang mga tsuper dahil sa patuloy na pagtaas ng presyo ng gasolina na direktang kumakain sa kanilang kita. Magsisimula ang payout alas-6 ng umaga sa mga lugar na itinakda ng mga lokal na pamahalaan, at hahatiin sa umaga at hapon ang mga benepisyaryo upang hindi maapektuhan ang kanilang pamamasada.

Nilinaw din ng DSWD na ang mismong mga driver ang tatanggap ng tulong at hindi ang mga operator ng sasakyan. 

Layunin nitong matiyak na direktang makakarating sa mga tsuper ang ayuda. 

Matapos ang pamamahagi sa mga tricycle driver sa Metro Manila, plano ng pamahalaan na palawakin ang programa para sa jeepney, taxi, at transport network vehicle service (TNVS) drivers.

Sa ngayon, nakikipag-ugnayan na ang DSWD sa Department of Transportation at Land Transportation Franchising and Regulatory Board upang makuha ang beripikadong listahan ng mga karapat-dapat na tsuper. 

Ipinaliwanag din ng ahensya na hindi lamang ang pinakamahihirap ang maaaring makatanggap ng tulong mula sa AICS, dahil kahit ang nasa middle-income households ay maaaring mabigyan kung mapatunayang dumaranas ng krisis.

Sa kabilang banda, mahalagang isaalang-alang din ang mas malawak na solusyon sa problema ng tumataas na presyo ng langis. 

Ilan sa mga mambabatas ay nagpapaalala na kailangang timbangin ang mga hakbang tulad ng pagbabawas ng buwis sa petrolyo dahil maaari itong makaapekto sa kita ng pamahalaan na ginagamit sa mga serbisyong panlipunan.

Ang P5,000 ayuda ay isang pansamantalang ginhawa lamang sa mga tsuper na araw-araw na sumasagupa sa tumataas na gastos sa lansangan. 

Totoong makatutulong ito upang maibsan kahit kaunti ang kanilang pasanin, ngunit hindi nito tuluyang masasagot ang malalim na problema ng mahal na langis.

Kung tutuusin, ang tunay na hamon ay kung paano makabubuo ang pamahalaan ng pangmatagalang solusyon na hindi lamang panandaliang ayuda ang sagot, kundi isang sistemang kayang protektahan ang kabuhayan ng mga tsuper at ang bulsa ng ordinaryong mamamayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com