DND at AFP, katapatan dapat para sa Konstitusyon at sa bayan

ni Leonida Sison @Boses | September 14, 2025

Sa gitna ng mga panawagan ng publiko laban sa umano’y katiwalian, partikular na sa flood control projects, nananatili naman ang suporta at hindi bibitiw sa gobyerno ang mga sundalo at militar.

Naninindigan ang Department of National Defense (DND) at Armed Forces of the Philippines (AFP) ng kanilang pagiging tapat sa Konstitusyon at sa taumbayan. 

Sa inilabas na pahayag nina Defense Secretary Gilberto Teodoro Jr. at AFP Chief of Staff General Romeo Brawner Jr., mariin nilang tinututulan ang mga tangkang ilihis ang misyon ng militar sa mga usaping pulitikal. Tinawag nila itong “futile and irresponsible”, na para bang sinasabing hindi dapat ginagawang ‘laruan’ ang AFP sa mga agenda ng iilang grupo. Sa halip, binigyang-diin nila ang pagiging propesyonal at non-partisan ng institusyon — isang paninindigan na dapat pahalagahan sa panahon ng kahinaan ng tiwala ng publiko sa pamahalaan. 

Hindi rin nila kinakalimutan ang laban kontra-korupsiyon, na kanilang tinaguriang pambansang krusada. Ang ganitong mensahe ay mahalaga dahil ipinapakita nitong hindi sila basta nagbubulag-bulagan sa mga usaping nagpapahirap sa mamamayan at sa bayan. Pinaninindigan nila na ang tunay na serbisyo ay nakaugat sa integridad at pananagutan, isang pangakong iniaalay nila sa mga bayani at sa susunod na henerasyon ng mga Pinoy. 

Sa kabila ng mga panawagan na magsalita, o pumabor ang militar sa ilang isyu, pinatutunayan ng AFP na ang tanging sinusunod nila ay ang tinatawag na Chain of Command at ang mandato ng batas. Ito ay nagpapakita ng respeto sa demokratikong proseso, taliwas sa mga panawagang magpatupad ng hakbang na wala sa legal na balangkas o labag sa batas. Ang ganitong paninindigan ay hindi lamang pagtalima sa Konstitusyon kundi isang proteksyon laban sa kaguluhan na maaaring idulot ng pamumulitika. 

Ang pahayag ng AFP at DND ay hindi lamang simpleng depensa laban sa tila nagtatangkang guluhin ang ating bansa. Isa itong paalala sa ating lahat na ang tunay na pagbabago ay hindi kailanman makakamit sa marahas o anumang pag-aaklas. Ang kapayapaan at kaunlaran ay makakamtan lamang kung may pagtitiwala sa demokratikong institusyon, paggalang sa mga proseso at pagkakaisa sa ilalim ng batas. 

Tulad nila, at bilang mamamayan, ipanata rin natin na maging tapat sa Konstitusyon, sa kapwa at sa bayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Pagiging kampante at pasaway ng taumbayan, no. 1 dahilan ng pagtaas ng COVID cases

ni Leonida Bonifacio Sison - @Boses | March 2, 2021

Mas mataas na arawang kaso ng COVID-19 sa bansa.

Ito ang inaasahan ng mga eksperto ng UP-OCTA Research Group kung magpapatuloy ang trend sa pagtaas nito na nag-umpisa noong mga nakaraang araw kung saan giit ng mga eksperto, posibleng umabot sa 2,500 ang arawang kaso ng COVID-19 sa bansa.

Matatandaang noong Sabado, naitala ang 2,921 bagong kaso ng COVID-19, pero bumaba naman ito sa 2,113 noong Linggo.

Binigyang-diin ng mga eksperto na ang naturang pagtaas ng COVID-19 cases ay maaaring dulot ng mga nagdaang selebrasyon tulad ng Valentine’s Day at maging ang Chinese New Year kung saan marami ang lumabas at namasyal, pero pangunahing dahilan umano ang maaaring pagkakumpiyansa ng publiko.

Samantala, naniniwala rin ang Department of Health (DOH) na ang pagbabawas sa ilang quarantine restrictions at ang maluwag naman na pagtugon ng mga lokal na pamahalaan ang isa sa mga maaaring dahilan ng muling pag-angat ng COVID-19 cases.

Kapansin-pansin nga ang pagtaas ng kaso ng COVID-19 sa ilang lugar sa bansa, partikular sa Metro Manila. Sa Pasay City, may pinakamalaking itinaas ng mga kaso, na dahilan para isailalim sa “localized lockdown” ang nasa 56 barangay. Kasabay nito, binabantayan din ng OCTA Research ang posibleng pagtaas ng mga kaso Manila, Quezon City at Makati.

Sa totoo lang, marami talagang dahilan ng pagtaas ng COVID-19 cases at kung sakali mang pumalo ito sa 2,500 kada araw, hindi nakapagtataka dahil hanggang ngayon, napakaraming pasaway.

Kahit may curfew, kapansin-pansing napakaraming istambay. Dikit-dikit, walang mga facemask at madalas, nag-iinuman pa. Ang iba naman, todo-lakwatsa at dedma sa mga health protocols.

Kahit patuloy ang mga paalala at babala tungkol sa virus, wa’ ‘wenta kung hindi makikinig ang taumbayan.

Isa pa, kampante ang marami dahil may bakuna na, pero hindi ito sapat para umastang normal na ang lahat. Paalala lang, marami pa ho tayong pagdaraanan kaya utang na loob, pairalin pa rin ang disiplina at wastong pag-iingat sa lahat ng oras.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

Maluwag na travel requirements, oks sa ekonomiya pero ‘di safe sa COVID-19

ni Leonida Bonifacio Sison - @Boses | March 1, 2021

Kamakailan, inanunsiyo ni Presidential Spokesperson Harry Roque na hindi na kailangan ng COVID-19 test, quarantine, travel authority at health certificate sa pagpasok sa saanmang local government unit (LGU), sa ilalim ng inaprubahang bagong guidelines ng Inter-Agency Task Force (IATF), maliban na lang kung nire-require ito ng lokal na pamahalaan na pupuntahan.

Suportado naman ng Department of Health (DOH) ang desisyon ng IATF dahil kadalasan ay nagiging irasyonal na ang mga travel requirement, kaya mas mabuti umanong i-test na lamang ang mga may sintomas ng sakit at i-monitor ang mga biyahero na pumasok sa isang LGU.

Pero tulad ng inaasahan, umani ito ng iba’t ibang reaksiyon mula sa publiko at health experts. Bagama’t ikinatuwa ng ating mga kababayan na nais nang bumiyahe ang maluwag na domestic travel requirements, iba naman ang opinyon ng mga eksperto.

Kaugnay nito, nagpahayag ng pagkabahala ang OCTA Research Group sa dahil posible umanong mahawa ang mga lugar na maganda ang sitwasyon kung basta-basta makakapasok ang mga biyaherong walang sapat na screening.

Binigyang-diin pa ng grupo na kailangan pa ring magkaroon ng border control dahil hindi lahat ng lugar ay pare-pareho ang estado sa coronavirus disease (COVID-19).

Sa totoo lang, nauunawaan nating layunin nitong matulungan ang sektor ng turismo, pero utang na loob, pag-aralan nating mabuti ang mga ipatutupad na panuntunan para mapigilan ang lalo pang pagkalat ng virus.

Baka kapag dumami na naman ang hawaan, LGUs na naman ang may kasalanan.

Sa Metro Manila pa lang, biglang taas na naman ang COVID-19 cases, kaya kung basta-basta tayong tatanggap ng mga turista na kadalasan ay galing sa Maynila, ano na lang ang mangyayari?

Panawagan sa mga kinauukulan, isip-isip ho para sa ikabubuti ng nakararami.

‘Ika nga, hindi naman masamang mamasyal, pero hindi natin dapat hayaang mailagay sa panganib ang kalusugan ng mga residente at biyahero.

Isa pa, ‘wag nating kalimutan na patuloy na nananalasa ang virus at hindi natin alam kung sino ang tatamaan nito.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni LEONIDA BONIFACIO SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com