Seguridad ng OFWs sa Middle East, dapat unahin

ni Leonida Sison @Boses | March 5, 2026

Seguridad ang unang dapat inuuna sa gitna ng lumalalang tensyon sa Middle East, at ito ang malinaw na ipinapakita ng agarang pagkilos ng Overseas Workers Welfare Administration-7 (OWWA) katuwang ang Department of Migrant Workers-7 (DMW). 

Ang ganitong kahandaan ay hindi lamang protocol ng gobyerno kundi paalala na may tutulong sa mga OFW kapag ang mundo sa labas ay nagiging alanganin na para sa kanila.

Bilang tugon, isinailalim sa aktibong estado ang regional emergency response protocols. Naka-standby 24/7 ang mga tauhan sa Mactan-Cebu International Airport upang tiyakin ang maayos na pagdating, agarang tulong, at maayos na reintegrasyon ng mga OFW mula sa Central Visayas. 

Para sa mga pamilyang naghihintay sa bahay, mahalagang mensahe ito na may nakahandang kamay sa oras ng pangangailangan ng ating mga kapwa Pinoy.

Batay sa ulat noong Marso 2, wala pa umanong naitatalang nasawi, nasugatan, o humihiling ng agarang tulong mula sa mga OFW sa mga rehiyon na apektado. 

Gayunman, hindi ito dahilan upang maging kampante. 

Patuloy pa rin ang koordinasyon ng OWWA-7 sa Migrant Workers Offices sa iba’t ibang bansa sa Middle East para sa real-time updates, dahil ang sitwasyon ay mabilis magbago at nangangailangan ng tuluy-tuloy na pagbabantay.

Tinatayang 33,903 rehistradong OFWs mula sa Region-7 ang kasalukuyang nasa mga apektadong lugar. 

Ang bilang na ito ay hindi lamang datos, ito ay mga magulang, anak, at kapatid na piniling mangibang-bansa para sa mas magandang kinabukasan ng kanilang pamilya. 

Kaya’t ang panawagan ng isang opisyal sa mga OFW na stranded sa Cebu, agad lumapit sa OWWA personnel para sa kinakailangang tulong. 

May mga tauhan sa OWWA counter sa International Departure Terminal ng MCIA na handang umalalay sa anumang agarang pangangailangan.

Kasabay nito, pinapayuhan ang lahat ng OFWs sa Middle East na sundin ang mga abiso ng Philippine Embassy at ng lokal na otoridad hinggil sa umiiral na security situation. 

Ang disiplina at tamang impormasyon ang unang depensa laban sa panganib dulot ng sigalot ng dalawang bansa.

Ang kahandaan ng OWWA-7 at DMW-7 ay repleksyon ng paninindigang ang seguridad ng manggagawang Pilipino ay hindi maaaring ipagpaliban at baliwalain. 

Sa gitna ng pandaigdigang tensyon, ang malinaw na koordinasyon, bukas na komunikasyon, at mabilis na aksyon ang nagsisilbing tulay ng tiwala sa pagitan ng gobyerno at taumbayan. 

Kapag ang OFW ay may sandalan, may mas mas magkakaroon sila ng matatag na kalooban at mas buo ang pag-asang makauwi nang ligtas para sa kanilang pamilya.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

‘Pinas, mananatiling ligtas sa gitna ng krisis sa Middle East

ni Leonida Sison @Boses | March 4, 2026

Maigi at ng hindi tayo madamay sa isang digmaang wala namang direktang kinalaman sa ating soberanya at araw-araw na buhay, ito ang malinaw na mensaheng gustong ipaabot ng kalihim ng Department of National Defense (DND), sa gitna ng tumitinding tensyon sa Middle East, dahil sa pananaw niya, walang sapat na batayan ang pangamba na mahahatak ang Pilipinas sa gulo dahil lamang sa alyansa nito sa United States.

Matapos ang press conference ni Pangulong Ferdinand R. Marcos Jr. sa Malacañang, iginiit ng kalihim na hindi maihahambing ang sitwasyon sa Middle East sa kalagayan ng Pilipinas at ng mas malawak na Indo-Pacific region. 

Ang mga kasunduang pangseguridad ng bansa, ayon sa kanya, ay nakatuon lamang sa depensa at paghahanda sa banta, hindi sa pakikisangkot sa digmaan ng ibang estado. 

Ang pagpapalakas ng alyansa ay proteksyon, hindi tiket patungo sa giyera na ikapapahamak ng ating mga kapwa Pinoy.

Pinagtibay rin ng Armed Forces of the Philippines (AFP) na wala silang nakikitang direktang banta sa pambansang seguridad mula sa kasalukuyang labanan sa Middle East. 

Para malinawan ang ating mamamayan, mahalagang malaman nila ito sapagkat ang takot sa digmaan ay kadalasang nauuwi sa pangamba sa ekonomiya, trabaho, at kaligtasan ng pamilya.

Gayunman, hindi rin isinantabi ng pamahalaan ang responsibilidad nito sa ating mga kababayan abroad. 

Aktibong nakikipag-ugnayan ang DND sa Department of Migrant Workers (DMW) at Department of Foreign Affairs (DFA) upang tumulong sa repatriation ng mga Pilipino sa apektadong lugar.

Ang usapin ay naging mas nakakabahala para sa bansa matapos masawi ang isang 32-anyos na Pilipinang caregiver sa Israel nang tamaan ng missile attack sa Tel Aviv noong Pebrero 28, kasabay ng pag-atake ng US at Israel.

Sa panig naman ng Iran, iniulat na tinarget ng puwersa ng US ang mga command center, missile site at naval assets sa unang yugto ng “Operation Epic Fury.” 

Inangkin pa ni Donald Trump na maraming lider ng Iran, kabilang si Ali Khamenei, ang napatay, habang may nasawi at nasugatang sundalong Amerikano ayon sa ulat ng Anadolu.

Malinaw para sa Pilipinas na manatiling alerto ngunit hindi padalus-dalos. 

Ang pinakamahalaga ay ang kaligtasan ng mamamayan, sa loob man o labas ng bansa. 

Ang matalinong diplomasya at malinaw na patakaran sa depensa ang magsisilbing panangga upang hindi tayo madamay sa digmaang hindi atin.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com

E-certificates, ‘di na kailangan pumila, puwede nang makuha online

ni Leonida Sison @Boses | March 3, 2026

Mas papadaliin ng makabagong teknolohiya ang dating mabagal at nakakapagod na proseso sa pagkuha ng mahahalagang dokumento, at ito ang bagong mukhang ipinapakilala ngayon ng Philippine Statistics Authority (PSA). 

Sa paglulunsad ng electronic civil registry documents sa PSAHelpline.ph, malinaw na unti-unti nang lumalapit ang serbisyo ng gobyerno sa tunay na pangangailangan ng karaniwang Pinoy na ang makatipid sa oras at pera.

Sa ilalim ng sistemang ito, maaari nang mag-request at makatanggap sa email ng birth, marriage, at death certificates, pati na rin ng Certificate of No Marriage Record at Certificate of No Death. 

Para sa mga manggagawa at estudyante, malaking pagbabago ito mula sa nakasanayang eksena ng mahabang pila, pamasahe, at buong araw na inaaksaya. 

Ayon sa isang opisyal, hindi na kailangang um-absent sa trabaho dahil mas pinadali na ang aplikasyon para sa e-certificates.

Hindi rin matatawaran ang aspeto ng seguridad. Ipinaliwanag din na ang bawat dokumento ay may digital private key. 

Kapag may nagtangkang baguhin ang file, awtomatikong lalabas ang babala sa PDF viewer. Ibig sabihin, hindi lang mabilis ang serbisyo, kundi ligtas din ito laban sa pamemeke at pananamantala.

Sa panig ng pamahalaan, sinabi na patuloy ang koordinasyon ng PSA sa mga ahensya at pribadong sektor upang tanggapin ang e-certificates bilang lehitimong dokumento. 

Mahalaga ito upang tuluyang mabawasan ang red tape at paulit-ulit na paghingi ng hard copies na matagal nang pinoproblema ng mamamayan.

Kung titiyakin natin, ang hakbang na ito ay higit pa sa simpleng digital upgrade. Isa itong pahayag na posibleng maging makatao ang burukrasya kapag may malinaw na direksyon at malasakit. Sa bansang kung saan ang oras sa pila ay kadalasang katumbas ng kaltas sa sahod, ang ganitong serbisyo ay konkretong anyo ng malasakit sa taumbayan.

Ang e-certificates ng PSA ay sumisimbolo ng isang gobyernong natutong makinig at umangkop. Kapag ang serbisyo ay mabilis, ligtas, at madaling maabot, mas nagiging buo ang paniniwala ng mamamayan sa kakayahan ng gobyerno, para sa mga ganitong kahalagang sertipikasyon sa isang indibidwal. At sa ganung serbisyo mas nakikita natin ang simula ng tunay na modernisasyon ng serbisyo-publiko.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com