Pasahero nakatulog, ibinaba sa ibang lugar... Taxi driver, pinatawan ng lifetime ban

by Jeff Tumbado @News | September 19, 2026

Photo: LTO

Inirekomenda ng Land Transportation Office (LTO) ang lifetime ban sa isang driver ng GSM Green Taxi na inireklamo ng isang pasahero kaugnay ng umano’y maling pag-uugali matapos itong ibaba sa lugar na hindi ang tamang destinasyon sa Parañaque City noong Setyembre 12, 2026.

Agad na nagsagawa ng imbestigasyon ang LTO at naglabas ng Show Cause Order laban sa driver matapos makatanggap ng reklamo.

Batay sa reklamo ng pasahero, nakatulog umano siya habang bumibiyahe sakay ng taxi at hindi siya naibaba sa kanyang itinakdang drop-off point.

Sa halip, dinala umano siya sa ibang lugar.

Ginamit ng LTO bilang bahagi ng ebidensiya ang CCTV footage at impormasyon tungkol sa driver na nakapaloob sa booking details ng pasahero upang matukoy ang taxi driver na sangkot sa insidente.

Inatasan ng LTO ang driver at ang rehistradong may-ari o operator ng taxi na humarap sa Intelligence and Investigation Division (IID) ng LTO Central Office sa Setyembre 24, 2026, para sa imbestigasyon.

Maaari ring patawan ng kaukulang pananagutan ang may-ari o operator ng sasakyan sa ilalim ng Joint Administrative Order (JAO) 2014-01, kabilang ang paglabag sa probisyon hinggil sa employing an insolent or discourteous driver at breach of franchise conditions, kung mapatutunayang nagkasala.

Extension ng lisensya at rehistro, hanggang Hulyo 31 na lang — LTO

ni Jeff Tumbado @News | June 21, 2026

Photo: LTO

Nagpaalala ang Land Transportation Office (LTO) sa mga motorista na i-renew na ang kanilang mga lisensya at rehistro ng sasakyan bago ang Hulyo 31, 2026 upang maiwasan ang pagpapataw ng multa at iba pang kaukulang parusa.

Ayon sa LTO, magtatapos sa Hulyo 31 ang pinalawig na bisa ng driver’s license, conductor’s license, student driver’s permit, at rehistro ng mga sasakyan alinsunod sa Memorandum Circular No. MVL-2026-5157.

Matapos ang nasabing petsa, ang mga lisensya, permit, at rehistro ng sasakyan na paso na ngunit hindi pa naipapa-renew ay sasailalim na sa umiiral na mga regulasyon at kaukulang parusa para sa huling pag-renew.

Nauna nang inanunsyo ng LTO ang tatlong buwang pagpapalawig ng bisa ng mga lisensya at rehistro simula Abril 2026, kabilang ang driver’s license, conductor’s license, student permit, at motor vehicle registration.

Sa panahong ito, pansamantalang hindi ipinataw ang mga multa para sa late renewal ng mga naturang dokumento.

Ayon sa LTO, ipinatupad ang pagpapalawig bilang tugon sa deklarasyon ni Pangulong Ferdinand Marcos Jr. sa national energy emergency dahil sa patuloy na pagtaas ng presyo ng langis dulot ng kaguluhan sa Gitnang Silangan.

Vigor Mendoza, bagong LTO Chief

ni Mylene Alfonso @News | July 17, 2023

Itinalaga si Vigor Mendoza II, bilang bagong pinuno ng Land Transportation Office (LTO).

Ito ang inanunsyo kahapon ng Presidential Communications Office (PCO).

Pinalitan ni Mendoza si dating LTO chief Jay Art Tugade, na nagbitiw noong Mayo dahil sa “differing methods” sa Department of Transportation.

Si Mendoza ay dating kinatawan ng 1-United Transport Alliance Koalisyon (1-UTAK) Partylist.

Nabatid na nagtapos sa Ateneo de Manila University, si Mendoza at naging board member ng Land Transportation Franchising and Regulatory Board (LTFRB).