Alert Level 3 na sa NCR, sabik na naman lumabas ang madlang pipol!

ni Korina Sanchez - @Isyung 'K' | October 19, 2021

Isinailalim na sa Alert Level 3 ang buong Metro Manila dahil bumaba na umano ang bilang ng kaso ng COVID-19. Medyo lumuwag na rin ang COVID-19 admissions sa ilang malalaking ospital. Mas maluwag ang lebel na ito — makikita sa internet ang mga gabay na saklaw ng Alert Level 3 para makita kung anu-anong negosyo at establisimyento ang maaaring magbukas na sa publiko.

Isa na ang pagbukas ng mga sinehan — higit isang taon na walang nanonood ng sine.

Ayon sa guidelines, 30 porsiyento ng sinehan ang papayagan at walang magtatabi sa mga upuan.

Hindi lang nating masasabi kung komportable na manood ng sine ang mga tao.

Sa totoo lang, nami-miss na talaga natin manoon ng sine bilang pantanggal-stress.

Kaugnay nito, kapansin-pansin ang pagdagsa ng mga tao sa malls. Dahil mas maluwag ang Alert Level 3, tila nasabik talaga ang marami. Bukas na rin kasi ang mga kainan, spa, salon, barberya at iba pa hanggang 30 porsiyentong kapasidad kapag indoor at 50 porsiyento naman kapag outdoor. Hindi naman ipinagbawal ang mga hindi bakunado kaya dapat pa ring mag-ingat. Mas maganda na talaga kung bakunado na para mas kampanteng lumabas.

Sa website ng DOH, nasa 52 milyon na ang nabigyan ng kahit isang bakuna itong Oktubre 16. Marami na nga ang pumapasok na bakuna sa bansa, at nagsimula na ring buksan ang pagbabakuna sa buong populasyon na may edad 18 pataas.

Samantala, nagpahayag naman ng pangamba ang ilang doktor na baka dumami na naman ang mga kaso dahil sa pagluwag sa National Capital Region (NCR).

Sana naman ay hindi. Halos nagsimula na nga ang pangangampanya ng ilang kandidato sa pamamagitan ng pag-ikot sa iba’t ibang lugar kaya mas maraming pagkakataon ang pagtitipon ng maraming tao.

Hindi pa rin puwedeng lumabas nang walang facemask, at palaging maghugas ng mga kamay.

Kung hindi mag-iingat at muling dumami ang mga kaso, paniguradong ibabalik na naman tayo sa Alert Level 4. Makipagtulungan na lamang sa gobyerno, hindi na natin kakayanin ang isa pang taong pakikipaglaban sa pandemya. Pagod na ang mga tao sa ganyang pamumuhay, hindi ba?

Pagkalat ng mga survey at pangangampanya, nagsisimula na!

ni Korina Sanchez - @Isyung 'K' | October 12, 2021

Congratulations kay Maria Ressa, ang kauna-unahang Pilipinong nabigyan ng Nobel Peace Prize — kasama niya si Russian journalist Dmitry Muratov. Prestihiyoso ang gantimpalang ito sapagkat hindi basta-basta ang mga taong nakakatanggap nito.

Pinag-aaralang mabuti ng Nobel Peace Prize Committee sa Oslo, Norway kung sino ang karapat-dapat makatanggap nito. Ayon sa kagustuhan ni Alfred Nobel, ang nagpasimuno ng parangal, dapat ibigay ito sa taong may “pinakamalaking pakinabang sa kapwa.”

Kaugnay nito, bukod sa medalyang matatanggap ni Ressa, may pera rin itong gantimpala. “Free, independent and fact-based journalism serves to protect against abuse of power, lies and war propaganda,” ayon kay Berit Reiss-Andersen, chair ng Norwegian Nobel Committee, nang inanunsiyo ang makatatanggap ng gantimpala.

Natutuwa tayo nang husto sa parangal na natanggap ni Maria Ressa. Alam nating kritiko siya ng kasalukuyang administrasyon. May mga kilos nga na ipinakulong pa ang beteranong mamamahayag sapagkat hindi maganda ang relasyon ng Rappler sa kasalukuyang gobyerno.

Kapansin-pansing walang pahayag ang Palasyo sa pagkapanalo ni Ressa kahit napakalaking tagumpay para sa Pilipino. Hindi tayo magtataka kung nanggagalaiti si Pangulong Rodrigo Duterte sa pagkapanalo ni Ressa. Gayundin, kung maglabas ng pahayag ang administrasyon na minamaliit ang kanyang pagkapanalo.

Samantala, ang lumabas na pahayag mula kay Pangulong Duterte ay hindi na tatakbo si Sara bilang pangulo. Maniniwala lamang tayo kapag lumipas na ang Nov. 15 at hindi ito nagpasa ng substitution sa kanilang partido. Tandaan, ganito ang ginawa ng kampo ni Pangulong Duterte noong 2016 nang pinalitan niya si Martin Diño bilang kandidato ng PDP-Laban. May higit isang buwan pa para mangyari ang pagpalit ng kandidato. Parang ganito na ang pinahiwatig ni Sen. Dela Rosa nang mag-file para maging kandidato sa pagka-pangulo ng PDP-Laban. Taas-kilay at tingin sa langit ang marami sa kilos ng PDP-Laban.

Natapos ang pag-file ng pagiging kandidato sa maraming posisyon noong Biyernes. Pero ganun nga, hanggang Nov. 15 pa ang pagpalit ng kandidato. Sasalain na rin ng Comelec kung sino ang may kakayanang tumakbo para sa mga nasyunal na posisyon tulad ng pangulo, pangalawang pangulo at senador. Marami rin kasing wala namang kakayanang mangampanya sa buong bansa kaya tatanggalin ng Comelec ang mga ito. Ngayong alam na natin kung sinu-sino ang tatakbo para sa iba’t ibang posisyon, magsisimula na rin ang mga surveys. Halos nagsimula na nga ang panganagmpanya ng ibang kanidato.

Pekeng address na hindi man lang inalam?

ni Korina Sanchez - @Isyung 'K' | August 31, 2021

Ilang beses na nating narinig si Pangulong Rodrigo Duterte na nagpahayag na pagod na siya, gusto na magbitiw, walang interes sa kapangyarihan at kung anu-ano pa (lahat ‘yan ay makikita naman sa internet), pero gayunman ay tatakbo pa rin siya sa 2022. At ang unang gagawin kapag manalo ay siya ang mag-audit sa COA.

Malinaw na pagbuwelta ito ni Pangulong Duterte sa Commission on Audit para sa lahat ng inilabas na ulat hinggil sa paggastos ng iba’t ibang ahensiya sa ilalim ng kanyang administrasyon na may pagkukulang at kuwestiyunableng gastusin. Inutusan na nga niya ang kanyang gabinete na huwag pansinin ang COA. Ngayong nag-iimbestiga na rin ang Senado sa napakamahal na pagbili ng gobyerno sa kagamitang panlaban sa COVID-19 at mula pa sa kumpanyang may ng pekeng address ng tanggapan. P8.7 bilyong piso ang nakuhang kontrata ng Pharmally Pharmaceuticals Inc. na may kapital na P625, 000 lamang. Pero napakalaki ng nakuhang kontrata? Hindi man lang inalam ng Procurement Service of the Department of Budget and Management (PS-DBM) kung saan ang kanilang tanggapan? Paano sila nakipag-egosasyon sa kumpanyang ‘to? Saan ipinadala ang mga dokumento kung peke ang tanggapan?

Lumalabas na rin ang miting ng dating kontrobersiyal na “economic adviser” na si Michael Yang at mga opisyal ng Pharmally kay Pangulong Duterte noong 2017. Wala pang pandemya noong pero ano naman kaya ang pinagpulungan? Nang maganap ang pandemya, ito na ang pagkakataon ng Pharmally na tumabo ng napakalaking kita. Nais malaman ng mga senador kung sino ang padrino ng kumpanyang ito at nakuha ang malaking kontrata. Pinagtutuunan ng pansin ng mga senador si dating PS-DBM chief and Budget Undersecretary Lloyd Christopher Lao.

Dahil iniimbestigahan na ng Senado, nagpahayag si Pangulong Duterte na wala namang nangyayari sa mga imbestigasyon at pumupostura lamang ang mga senador. Ito ang tatak ng administrasyong ito. Ang Palasyo lang ang may lubos na kapangyarihan. Walang silbi ang Senado, walang silbi ang Kongreso, walang silbi ang Korte Suprema o COA o CHR maliban na lang kung sumusunod sa mga utos ng pangulo.

Tama lang na itaguyod ng Senado at COA ang kanilang tungkulin ayon sa Konstitusyon. Tama lang na umangal, tumutol ang mga senador sa pahayag ng pangulo. Hindi puwedeng Palasyo lang ang masusunod at wala nang magtatanong, wala nang mag-iimbestiga, wala nang audit-audit pa. Nasaan ang “checks and balance” sa gobyerno kung ang Palasyo lamang ang masusunod?

Mahigit isang taon na ang pandemya, mahigit isang taon na ang kalbaryong nararanasan ng bansa, inaasahan natin ang malinis na sistema. Sa panahon ngayon, gobyerno lamang ang inaasahan at sinasandalan ng mamamayan.