Pagbubukas ng mga sinehan, ‘wag ipilit kung hindi pa handa

ni Korina Sanchez - @Isyung 'K' | February 18, 2021

Umalma agad ang mga alkalde ng iba’t ibang lungsod ng Metro Manila sa desisyon ng Inter-Agency Task Force for the Management of Emerging Infectious Diseases (IATF-EID) na payagang magbukas ang mga sinehan at amusement arcades.

Dalawa hanggang tatlong oras ang bawat sine kung saan ang mga manonood ay mananatili sa kulob na lugar na tila walang dumadaloy na bentilasyon. Kaya kung sila ang tatanungin, hindi na muna papayagang magbukas ang mga sinehan. Kinukuwestiyon na rin ng ilang senador ang desisyon ng IATF na tila mas importante pang buksan na ang mga sinehan at palaruan imbes na ang mga paaralan. Kaugnay nito, nagkasundo na ngayon na lamang Marso ito papayagang magbukas.

Sa totoo lang, magbukas man ang mga ito ay hindi tayo makasisigurong safe tayo sa COVID-19. Hindi pa tapos ang pandemya. Tatlong araw na ngang mahigit isang libo ang nagpositibo sa bansa para sa COVID-19.

Gusto nating bumalik na sa normal ang buhay, pero kailangan nating mag-ingat. Batid nating maraming negosyo ang umaalma na at nais buksan nang husto ang ekonomiya. Pero wala pang bakunang pumapasok sa bansa. Tila mas marami pang pribadong kumpanya at lokal na pamahalaan ang kumikilos para makakuha ng bakuna imbes na ipaubaya na lang sa administrasyon.

Hangga’t hindi pa nababakunahan ang target na sitenta porsiyento ng populasyon ay may posibilidad pa ring kumalat ang virus. Isa pa, marami ang hindi sigurado o ayaw munang magpabakuna dahil sa iba’t ibang dahilan. Kailangan itong matukoy ng gobyerno at ibalik ang tiwala sa publiko sa mga bakunang darating.

Nakakagulat na rin ang dami ng tao na nasa labas ngayon. Maraming lugar ang nagbukas na sa publiko. Sabihin na nating marami ang nagpupursigeng sundan ang physical distancing at ang pagsuot ng face mask at face shield pero kapag dumami na ang tao, mahirap na ipatupad ang distansiya sa isa’t isa.

Janet Lim-Napoles na utak ng pork barrel scam, muling nahatulan

ni Korina Sanchez - @Isyung 'K' | February 13, 2021

Dalawang desisyon ang ibinaba ng Sandiganbayan kamakailan, na malamang ay ikinatuwa ng mga galit sa korupsiyon sa gobyerno. Una ang paghatol ng guilty kay Janet Lim-Napoles, ang utak sa likod ng P10-B pork barrel scam. Hinatulan din ng guilty si ex-Cagayan de Oro Rep. Constantino Jaraula at iba pang empleyado ng gobyerno na sangkot sa nasabing korupsiyon. Unang hinatulan si Napoles noong 2018 para sa pandarambong kung saan 40-taong pagkakakulong ang kanyang sentensiya na madaragdagan pa nitong bagong paghahatol sa kanya kung hindi tayo nagkakamali.

Samantala, kasabay ni Napoles kinasuhan din sina Sen. Juan Ponce Enrile, Jinggoy Estrada at Sen. Bong Revilla ng NBI noong 2013, pero sina Enrile at Estrada ay pinayagang magpiyansa kahit hindi batay sa batas at inabsuwelto naman si Revilla noong 2018.

Nagbaba na rin ng desisyon ang Sandiganbayan laban kay dating AFP comptroller retired Lt. Gen. Jacinto Ligot. Inutusan siyang pakawalan ang ilang pag-aari at pera sa halagang higit P100-M dahil hindi maipaliwanag kung paano niya nakuha batay sa kanyang kinikita. Sumailalim sa matinding lifestyle check si Ligot ang kanyang asawa kung saan naungkat ang lahat ng kanilang pag-aari.

Natatandaan natin ang matinding galit ng tao nang masiwalat ang pinaggagawa ni Napoles. Kung hindi pa nailigtas si Benhur Luy at nagsalita na sa pakana ni Napoles ay hindi pa ito madidiskubre dahil na rin kasabwatan ang ilang mambabatas. Hinihintay ng mamamayan ang magiging desisyon kina Enrile at Estrada.

Ang kaso naman ni Ligot ay kabilang sa AFP Corruption Scandal noong 2011 o ang “pabaon” sa mga magreretirong AFP Chief of Staff. Si dating budget officer George Rabusa ang nagsilbing whistleblower sa nasabing korupsiyon. Dito na rin lumabas ag mga kaso laban kina AFP comptroller Gen. Carlos Garcia at Ligot na sangkot sa nasabing korupsiyon. Si Garcia ay nakalusot dahil nakipag-areglo sa gobyerno at tila mahina ang kaso.

Bagama’t mabagal, umaandar pa rin ang gulong ng hustisya. Sa kinatapusan ay binayaran nila Napoles, Ligot at iba pa ang kanilang kasakiman. Pera ng mamamayan ang ibinulsa kaya dapat lang silang maparusahan.

Pangmamaton ng China sa karagatang sakop ng ‘Pinas, sobra na!

ni Korina Sanchez - @Isyung 'K' | February 5, 2021

Kaliwa’t kanan ang paglabag ng mga barkong Tsina sa mga karagatang sakop ng ating teritoryo, tila wala silang pakaialam o takot kung masita.

Una ay ang barkong MV Zhonhai 68 na dredging ship. Nahuli ang barko na ilegal na nasa loob ng karagatan ng Bataan at naghuhukay.

Ang parehong barko ay namataan na rin sa karagatan ng Zambales noong isang taon. Dapat nakaalis na ng bansa ‘yan. Bakit ngayon lang inaaksiyunan ang barkong ito? Kaya ba malakas ang loob ng barko na pumasok sa karagatan natin ay dahil pinapayagan naman sila?

Ayon sa Philippine Coast Guard (PCG), pormal na maghahain ng seizure order laban sa barko na hindi makapagpakita ng mga tamang dokumento at nakapatay pa ang transponder. Ang transponder ang nagpapakilala sa barko at ipinaaalam ang lokasyon nito sa lahat ng makatanggap ng signal. Malinaw na pinatay para hindi mabantayan ang kanyang paglalayag at lokasyon.

Sa silangang bahagi naman ng bansa, ang barkong panunuri Jia Geng ang nakaangkla sa karagatan ng Bato, Catanduanes. Humingi raw ng pahintulot na manatili muna sa nasabing karagatan mula Jan. 28 hanggang Feb. 2 dahil “sa mga kondisyon ng karagatan at ng panahon” pero Jan. 25 ay nasa loob na ng ating exclusive economic zone.

Wala namang namataang masamang panahon sa nasabing karagatan. Hindi na bago ang mga ganyang dahilan ng mga barkong Tsino. Natatandaan ba ang barkong Yuemaobinyu 42212 na bumangga sa Gem Ver 1 dahil “hinahabol daw sila ng mga Pilipinong barkong-pangisda”? Lumabas na wala naman batay sa mga imaheng satellite.

Nagdahilan lang sila para itago ang kanilang masamang ginawa. Hindi rin ito ang unang beses na pumasok ang barkong Jia Geng sa ating karagatan. Umangkla rin sa may Cagayan noong Septyembre “dahil din daw sa masamang panahon”.

Hindi rin pinayagan ng kapitan ng Jia Geng ang mga tauhan ng PCG na magsagawa ng inspeksiyon dahil daw sa COVID-19. Lumayag na rin ang barko noong Lunes at sinundan ng eroplano para mabantayan kung talagang aalis na mula sa ating karagatan. Wala pang balita kung nasaan na ang barkong ito, baka umaaligid lang sa labas ng ating teritoryo?

Malinaw na lumabag na naman sila at wala naman tayong nagawa. Wala talagang katapusan ang panghihimasok ng mga barkong Tsina sa buong bansa. Ano ang interes nila sa silangang bahagi ng karagatan natin na ubod na ng layo sa China? Tila wala silang pakialam kung pumasok sila nang walang pahintulot.

Kailan lang ay binigyan ng “go signal” ng Beijing ang lahat ng kanilang coast guard na gumamit na anumang paraan para ipagtanggol ang kanilang soberenya sa buong karagatan. Kasama na riyan ang paggamit ng mga armas. Ganyan sila magsalita pero wala naman silang respeto sa ating mga batas-karagatan. Bukod sa kinakayod ang iba’t ibang karagatan ay sinusuri naman ang napakalayong karagatan sa kanila para malaman kung ano’ng meron na kanilang mapakikinabangan. Pang-aabuso na ng pagkakaibigan ‘yan o pangmamaton sa isang mas maliit na bansa.