‘Wag pakampante sa bakuna, mag-ingat pa rin!

ni Korina Sanchez - @Isyung 'K' | March 11, 2021

Nakapagtataka na kung kailan dumating ang pinakahihintay na bakuna mula sa Tsina at COVAX at pinasimulan na ang programa ng pagbabakuna ng gobyerno ay sumisipa naman ang dami ng kaso sa bansa.

Mga frontliners at mataas na opisyal ng gobyerno ang mga unang makatatanggap ng mga bakuna. Minabuti ng gobyerno na magtawag ng press release at photo-op kung saan mataas na opisyal ng PGH at ilang opisyal ng gobyerno ang tumanggap ng bakuna mula Sinovac, maliban sa Pangulo. Ito ay para maitaguyod ang muling pagtitiwala sa bakuna.

At mukhang gumana ito sapagkat maraming doktor ang nagpasyang tumanggap ng Sinovac at ang katwiran ay mabuti na ito kaysa wala na ang tinutukoy ay ‘yung mababang efficacy rate ng bakuna.

Ang bakuna ng AstraZeneca naman ay may mas mataas na efficacy rate na higit 70% ngunit ang mga ulat kung saan hindi raw epektibo laban sa South African strain ay nagiging sanhi ng pag-aalala ng ilan. Dumating na rin ang ilang bakuna ng AstraZeneca mula sa COVAX ng World Health Organization o WHO.

Sa loob ng apat na magkakasunod na araw, humigit sa 3, 000 ang naitalang positibo sa COVID-19, pinakamataas mula nang lumuwag ang mga hakbang ng quarantine noong Hunyo.

Ang pagraranggo ng bansa sa mundo para sa dami ng kaso ng COVID-19 ay bumalik sa ika-30 posisyon mula sa ika-31 sa loob ng ilang araw. Nagbabala rin ang OCTA sa posibilidad ng pagdagsa ng bilang ng mga kaso dahil sa pagiging kampante ng mga tao.

Kailangan pa ring sundin ang mga protocol tulad ng pagsuot ng face mask, pag-disinfect ng mga kamay at physical distancing. Sa totoo nga tila wala nang quarantine sa dami ng tao sa labas.

Isang ehekutibo ng St. Lukes Medical Center ay nag-ulat ng pagdoble ng bilang ng mga kaso ng COVID-19. May ilang ospital ang nagpahayag na dumarami ang kanilang kaso. Marahil ay dahil nagsimulang lumabas nang mas madalas o ang paglalakbay dahil nabawasan din ang mga paghihigpit. Maaaring ang pagdating ng bakuna ay nauwi sa pagiging kampante dahil iniisip na mababakunahan na rin sila. Wala pa ring katiyakan kung kailan mababakunahan ang publiko.

Sa ngayon ang prayoridad ay ang frontliners kasama na ang mga pulis at sundalo, siyempre.

Habang nagpapasalamat tayo sa pagdating ng bakuna, kailangang malaman ng bawat isa na baka matagal pa ang pagbabakuna ng publiko. Hangga’t wala pang bakuna ang mga frontliners, wala pang schedule para sa publiko.

Nasa paligid pa rin natin ang COVID-19. Nakababahala na mas mabilis lumabas ang mga bagong variants ng virus kumpara sa paglikha ng bakuna. Matagal-tagal pa ang laban, ‘wag maging kampante.

Pambubugbog ng mga pulis sa mga PDEA agent, buking!

ni Korina Sanchez - @Isyung 'K' | March 7, 2021

Unti-unti nang lumalabas ang mga detalye ng naganap na “misencounter” sa pagitan ng Philippine National Police (PNP) at Philippine Drug Enforcement Agency (PDEA) noong nakaraang linggo. May CCTV kung saang nakitang nagpapakilala na umano ang mga ahente ng PDEA nang magkaroon ng sandaling tigil-putukan pero patuloy pa rin silang pinagbabaril ng mga pulis ng Quezon City Police District (QCPD).

Ngayon, nagsalita na rin ang ilang ahente ng PDEA na noong sumuko na sila sa mas maraming pulis na dumating, pinagbubugbog pa umano sila ng halos kalahating oras. Dinala pa sa ibang lugar at doon itinuloy ang pambubugbog.

Marami ang nagtamo ng mga sugat sa ulo na siguradong hindi maitatago. Lima ang naospital at may kinailangan pang operahan. Hindi raw makapagbigay ng maayos na salaysay sa mga imbestigador ng National Bureau of Investigation (NBI) dahil sa trauma at takot.

Sana ay gumaling na sila para makapagbigay na ng kanilang salaysay sa pangyayari. Kung may mga nakasaksi nang matapos ang putukan, dapat magsalita na rin sila, kung hindi sila natatakot. Kailangan ng NBI ng lahat ng tulong para sa malaman ang mga pangyayari nang sa gayun ay hindi na rin maulit — sana.

Wala talagang kupas ang PNP. Tapos na ang putukan, mukhang nagpakilala na ang PDEA pero nakuha pang mambugbog ng halos kalahating oras? Mukhang agrabyado ang mga taga-PDEA. Ano naman kaya ang magiging paliwanag ng liderato ng PNP sa rebelasyong ito? Naiintindihan nating may namatay sa hanay ng PNP pero gayundin naman sa PDEA. Hindi ba dapat ang ginawa ay kinumpirma kung talagang mga taga-PDEA sila at hindi binugbog na lang?

Sana, may mga detalye pang madiskubre ang NBI. Hindi ito maliit na insidente. Maaaring mga haka-haka ang lumalabas na sa social media kung bakit nagkaroon ng barilan na sana nga ay tumigil muna at bigyan ng pagkakataon ang imbestigasyon maungkat ang katotohanan. Sana lang ay hindi pagtakpan ang pagkakamali ng sinumang grupo.

Imbestigasyon sa ‘misencounter’ sa pagitan ng PDEA at PNP, hayaan sa NBI

ni Korina Sanchez - @Isyung 'K' | March 2, 2021

Ilang beses na nating narinig ang salitang “misencounter” sa panig ng Philippine National Police (PNP), Armed Forces of the Philippines (AFP) at iba pang ahensiya tulad ng Philippine Drug Enforcement Agency (PDEA).

Kamakailan, may naganap na namang “misencounter” umano sa pagitan ng Quezon City Police District (QCPD) at PDEA sa Ever Gotesco mall sa Commonwealth Avenue. Hindi nawawala ang mga usyoso kaya may mga lumalabas na amateur video ng barilan.

Sa video, tila ‘gera’ ang nangyari sa sunud-sunod na putok mula sa magkaibang panig. Nang matapos ang putukan, dalawang pulis ang unang kumpirmadong patay. Pero sa pagsusulat nito, isang ahente ng PDEA at isang informant ang nasawi na rin—apat na patay sa madugong misencounter. Ano ang nangyari?

Sa ngayon ay iniimbestigahan pa ang dahilan ng insidente. Akala umano ng magkabilang grupo ay mga nagbebenta ng ilegal na droga ang kanilang kausap. Pero sa mga unang ulat ay tila may bumunot at nagpaputok kaya naganap ang barilan. Hindi ba nagpakilala agad ang magkabilang grupo para tumigil muna ang putukan? Kung “duly-coordinated” ang operasyon ng dalawang panig, bakit hindi nagbarilan? At mabanggit na rin nating higit isang bilyong piso ang pinagsamang intelligence funds ng PNP at PDEA. May naitulong ba ang pondong ‘yan o pondo lang talaga at walang ‘intelligence’?

Samantala, dapat unang gagawa ang PNP at PDEA ng joint investigation sa naganap na enkuwentro at pananagutin ang may sala. Hindi natin alam kung aamin ang sinumang grupo na tauhan nila ang may sala, lalo na’t may mga namatay sa hanay nila kaya inutos na ni Pangulong Rodrigo Duterte na tanging ang National Bureau of Investigation (NBI) ang mag-iimbestiga ng insidente. Tama lang ‘yun at ahensiya na walang kinalaman sa insidente ang mag-iimbestiga dahil mahirap na.

Bagama’t walang sibilyang namatay pero hihintayin pa ba nating mangyari ‘yun?