'Pinas, damay 'pag gumamit ng nuclear weapons ang Russia, dasal pa more!

ni Ka Ambo - @Bistado | March 28, 2022

NASORPRESA ang lahat nang biglang lumayas si Bebot Alvarez ng Partido Reporma mula sa kampo ni Sen. Ping Lacson.

Tila dagang walang masulingan si Bebot.

◘◘◘

IMBES makatulong sa kampo ni VP Leni, nagbinhi lang siya ng intriga.

Kasi naman, ilang oras lang matapos ihayag ang paglipat, pumalag agad ang mga Kakampink ni VP Leni.

◘◘◘

KASI naman, kapag nag-search sa Google tungkol sa mga ulat kay Alvarez, bubungad agad ang mga report kung paano niya inupakan si VP Leni nang kontrolado pa nito ang Kamara bilang Speaker.

Ibig sabihin, tinangka niyang patalsikin si VP Leni at ito ay kinumpirma niya nang humingi siya ng paumanhin.

◘◘◘

SA pagbibitiw ni Lacson mula sa Partido Reporma ni Alvarez, napingasan ito ng mga matitigas na lider at mga miyembro.

Kumalas na rin kasi sa Partido ang mga opisyales mula sa Cavite.

◘◘◘

MALINAW na walang patol si Alvarez at maging si Robredo.

Paano mapagkakatiwalaan ng kampo ni Robredo si Alvarez na naging mortal nilang kaaway?

◘◘◘

SA katindihan ng intriga noong 2017, narito ang patutsada ni Alvarez kay Robredo : “Kauna-unahan sa kasaysayan ng Pilipinas na mayroong isang napakakapal ng mukha na isang official ng gobyerno ay nagpadala ng [video] clip... para sirain ang ating bansa”.

Hindi ito malimutan ng mga diehard Leni.

◘◘◘

TINUTUKOY dito ni Alvarez ang pagbatikos ni Robredo sa war on drugs ni Pangulong Rodrigo Duterte — na kaibigan at kaalyado rin ng mga panahong iyon ng dating House Speaker.

Binalak din noon ni Alvarez na maghain ng impeachment complaint laban sa bise presidente pero walang nangyari.

◘◘◘

TATAAS muli ang presyo ng petrolyo sa linggong ito.

Parang roller coaster ang ekonomiya ng bansa.

Matagal pa kasi bago matapos ang giyera ng Russia at Ukraine.

◘◘◘

SA Pilipinas, nagbalikatan sa isang joint military exercise ang AFP at US troops.

Ginanap ito sa iba’t ibang panig ng bansa.

◘◘◘

MAY ulat kasi na umaali-aligid sa karagatang sakop ng Pilipinas ang military ship ng US.

Parehong nasa karagatan ng Taiwan at China ang battleships ng US at China na nagpapatindi ng tensiyon.

◘◘◘

AKTUWAL na ibinabala ni Digong na sakaling gumamit ng nuclear weapons ang Russia, walang duda na madadamay na mismo ang Pilipinas.

Inamin ni Digong na walang dahilan para hindi makipagtulungan ang Pilipinas sa US dahil sa mutual defense treaty.

◘◘◘

MALINAW ngayon na sa kabila ng pagkawala ng COVID, mas grabe ang krisis na naghihintay.

Ito ay ang ikatlong digmaan pandaigdig.

Magdasal tayo nang walang patid.

P-Digong at BBM nag-usap na, imposible nang matalo sa bilangan

ni Ka Ambo - @Bistado | March 26, 2022

AKTUWAL nang inendorso ng isang paksiyon ng PDP- Laban si ex-Sen. Bongbong Marcos.

Lalong nag-peak si BBM.

◘◘◘

MAHAHATAK nang todo si Mayor Sara sa deklarasyon ng PDP-Laban kung saan lalo nang nagiging irreversible ang pagiging llamado sa Mayo.

Ibig sabihin, ang naunang 55-60 percent ranggo sa mga nakaraang survey ay hindi pa totoong “peak” , bagkus ito ay umaangat pa.

◘◘◘

KUNG susumahin, maaaring maabot ang unprecedented 70 percent na suporta kay BBM kapag lumabas ang mga susunod pang survey.

Dapat nating maunawaan na hindi pa aktuwal na ineendorso ni Digong si BBM.

◘◘◘

KINUMPIRMA ni Sen. Bong Go na nag-usap nang matagal sina BBM at Digong bago nagdeklara ang PDP- Laban.

Kumbaga, nakatimpla pa rin ang “peak” ni Marcos.

Kapag ganyan, imposible siyang matalo sa bilangan.

◘◘◘

DAPAT nating maunawaan na nagwagi rin sa aktuwal na Comelec canvassing ang matandang Marcos at naiproklama ito.

Maraming posibleng gawin ang mga anti-Marcos para hindi makabalik sa Malacañang.

◘◘◘

ANG mga anti-Marcos ay hindi lang ang maka-VP Leni, bagkus ay kasama d'yan ang mga “naapektuhan ng deklarasyon ng Martial Law”.

Pinakamalaking naapektuhan ay ang Vatican City kung saan ipinamigay ni Marcos sa mga magsasaka ang mga rice lands at lupain ng Simbahang Katoliko batay sa Land Reform Act.

◘◘◘

HALOS kasabay ng endorsement ng PDP-Laban, inendorso naman ng Partido Reporma ang kandidatura ni VP Leni.

Pero, hindi si BBM ang tinamaan ng latay, bagkus ay si Sen. Ping Lacson.

◘◘◘

NAIIWANAN na nga sa resulta ng survey, kinangkong pa ni VP Leni ang kakarampot na suporta kay Lacson.

Dahil nakabase sa Mindanao ang Partido Reporma ni Pantaleon Alvarez, kasabay na tinamaan nito si Sen. Manny Pacquiao.

◘◘◘

SA kabilang panig, bigo si Mayor Isko na makuha ang suporta ng PDP-Laban, kaya’t siya ang tinamaan ng pagsuporta ni Alfonso Cusi kay Marcos.

Sa equation, mas malaki ang makokopo ni Marcos mula kay Isko kaysa sa makukuha ni VP Leni mula kina Lacson at Pacquiao na kapwa nasa laylayan.

Nabulgar, taas-presyo ng petrolyo, hula-hula at hokus-pokus lang!?

ni Ka Ambo - @Bistado | March 23, 2022

MARAMI ang naniniwala na maaaring pigilin ng gobyerno gamit ang DOE ang sobra-sobrang taas ng presyo ng petrolyo.

Espekulasyon lamang umano ang batayan sa pagtataas ng presyo. Kumbaga, hula-hula lang at hokus-pokus sa datos.

◘◘◘

MAKIKITA natin na totoong buwitre ang mga oil distributor sa bansa dahil pinatungan ng presyo ang mga nakaimbak na petrolyo.

Kumbaga, ngayon nila binabawi ang nalugi sa kanila sa panahon ng pandemya.

◘◘◘

INUTIL ang gobyerno na proteksyunan ang mga consumer sa kuko ng mga buwitre.

Ilan lamang ang mga oil distributors na dapat bantayan at disiplinahin ng pamahalaan sa panahon ng krisis.

◘◘◘

BINASTED ng Malacañang ang pagtanggal sa excise tax sa petrolyo. Isang pro-rich na desisyon.

◘◘◘

DAHIL sa pagdarahop, nabuhay ang isyu sa P10,000 ayuda na isinusulong ni dating speaker Alan Peter Cayetano.

Iginigiit ni Cayetano na may sapat na pondo ang gobyerno sa P10K ayuda kada pamilya.

◘◘◘

PINARANGALAN sa Caloocan City ang mga natatanging frontliner kaugnay ng selebrasyon ng Frontliners’ Day sa lungsod.

Iginawad ni Mayor Oca Malapitan ang parangal kaugnay sa ordinansang iniakda ni Sangguniang Kabataan Federation (SKF) president Councilor Vince Hernandez.

◘◘◘

SUPORTADO ni ex-Sen. Bongbong Marcos ang pagkilala sa ambag ng mga frontliners sa buong bansa.

Kabilang sa mga nagbigay ng serbisyo at sakripisyo ang mga doktor, pulis, bumbero, emergency responder, security guard, vaccination personnel, swabbing personnel, tricycle driver, at media practitioner.

◘◘◘

KABILANG sa tumanggap ng pagkilala si GMA-7 senior reporter Mark Salazar.

Ayon kay Caloocan City Administrator Engr. Oliver Hernandez, maraming mamamahayag ang naging katuwang ng pamahalaang lungsod sa pagbibigay ng tamang impormasyon.