Mga tao naglabasan na, paninda 'nilalangaw' pa rin?!

ni Ka Ambo - @Bistado | April 8, 2022

MARAMI na ang nababahala sa gumagrabeng giyera ng Russia at Ukraine.

Nakakarimarim ang eksena sa pagkamatay ng libo-libong sibilyan na nasawi.

Inilalarawan na isang genocide ang nagaganap sa Ukraine.

◘◘◘

Sa ilang ulat sinasabing natatalo ang puwersa ni Vladimir Putin.

Pero ang mga ulat na ito ay nagmumula sa international press na kapanalig ng US at NATO.

◘◘◘

Ibig sabihin, limitado ang mga impormasyon na nailalathala sa buong daigdig.

Itinatanggi ng Russia ang naturang impormasyon.

◘◘◘

NAIS palabasin ng mga kritiko na isang bagong Hitler si Putin.

Ang akusasyong ito ang nagpapalala ng sitwasyon.

Nahihirapan ang mga mediator na makausap si Putin.

◘◘◘

LUMABAS na ang mga tao pero ramdam pa rin ang matumal na negosyo.

Bakit kaya?

◘◘◘

MATAAS ang presyo ng

Mga bilihin kaya’t kakarampot ang mga kostumer.

Kumbaga, nilalangaw ang mga paninda.

◘◘◘

TINATAYA na lalong gagrabe ang sitwasyon matapos ang eleksyon.

Malaking sakit ng ulo ang mararanasan ng magwawaging pangulo.

◘◘◘

DAPAT ay iutos ni Digong ang exemption sa pagbabayad ng buwis ng maliliit na negosyante upang sumigla ang ekonomiya.

Pagbayarin lamang ng buwis ang mga danbuhalang korporasyon.

◘◘◘

MARAMING may sariling sasakyan ang sumasakay na lang sa public vehicles.

Mataas kasi ang presyo ng petrolyo.

Isang dahilan 'yan ng maluwag na trapiko.

◘◘◘

SAKALING mag-face-to-face classes, tiyak na tataas din ang singil ng mga school service.

Panibagong parusa sa mga magulang.

◘◘◘

MATAAS na rin ang presyo sa mga karinderia.

Lalaki ang halaga ng “baon” ng mga bata sa iskul.

Nakakanerbiyos ang mga eksena sa mga susunod na buwan.

‘Pinas, walang ligtas sa ibinabalang pagbagsak ng ekonomiya

ni Ka Ambo - @Bistado | April 6, 2022

IBINABALA na ang pagbagsak ng ekonomiya sa buong daigdig.

Hindi makakaligtas dito ang Pilipinas.

◘◘◘

SA mga presidential debate, dapat ay itinatanong sa mga kandidato kung anong espesipikong programa ang ipatutupad upang sagipin ang bansa sa krisis na ito.

Apektado ng krisis mismo ang US, China, Europe partikular ang maliliit na bansa.

◘◘◘

MAHALAGANG makontrol ng gobyerno ang aktibidad ng mga dambuhalang korporasyon.

Kasabay n’yan, saklolohan ang maliliit na negosyante.

At maglagay ng feeding center sa lahat ng sulok ng barangay upang walang mamamatay o magkakasakit sa gutom.

Ganu’n lang kasimple.

◘◘◘

DUMADAING ang lahat ng sektor, maging ang hanay ng obrero, maliliit na negosyante at dambuhalang komprador.

Ano ang solusyon?

Simple lang ang payo ng matatanda, magsinop at magtipid.

◘◘◘

ANG pagsisinop ay ang pag-iwas gumastos sa walang kuwentang aktibidad at magsikap na gamitin nang todo kung anong resources ang hawak mo.

Ang pagtitipid ay aktuwal na pagtatabi, pag-aalkansiya at pagtatago ng ilang halaga o porsiyento ng nahahawakang cash.

◘◘◘

NATUTUWA tayo sapagkat ‘yan mismo ang ipinapanukalang batas ni dating Speaker Alan Peter Cayetano, ang pagtatakda ng savings sa lahat ng kagawaran at sangay ng pamahalaan.

Ibig sabihin hindi lang ang sibilyan ang dapat magtipid, bagkus ay gawing isang mandato o obligasyon sa sangay ng gobyerno na magtipid.

◘◘◘

ITINAKDA ng panukalang batas ang 5 percent savings na siyang target para maayudahan ang 20 milyong Pinoy.

Noong Huwebes March 31, inihain ni Cayetano ang HB 10832 o Mandatory Savings Act para makalikom ng P250 bilyon.

◘◘◘

KABILANG sa mga may akda sina Congresswoman Lani Cayetano, Camarines Sur Rep. Lray Villafuerte, Batangas Rep. Raneo Abu, at Laguna Rep. Dan Fernandez.

Layon ng "Mandatory Savings Act of 2022" na hikayatin ang lahat ng sangay ng gobyerno kasama ang government financial institutions (GFIs), at instrumentalities na magtabi ng limang porsiyento ng kanilang budget bilang savings.

Sa totoo lang, sobra-sobra pa nga ang P250 bilyon na malilikom mula sa hakbang na ito.

◘◘◘

PUWEDENG bigyan ng tig-P10K ayuda ang bawat isa sa 20 milyong pamilyang Pilipino.

Maaaring gamitin ang matitirang P50 bilyon sa ibang sektor na pinadapa rin ng pandemya.

◘◘◘

HINDI dole-out ang ayudang ito, bagkus ito ay asiste upang makapagtayo ng munting negosyo ang kada pamilya.

Ito na mismo ang pagkukunan ng kanilang ikabubuhay sa gitna ng krisis.

Kumbaga, hindi isda ang ibinigay sa mga tao, bagkus ay pamingwit at bangka na magagamit sa paghuli ng isda.

BBM-Sara mas lumalakas pa, mga nasa laylayan lalong nabobokya

ni Ka Ambo - @Bistado | April 5, 2022

NANGANGANIB na rin ang operasyon ng International Space Station (ISS) na magkakatuwang na itinataguyod ng US, Russia, Europe, Japan at iba pang bansa.

Kumalas na ang Russia kaya’t maaaring magsibagsak na ang ilang satellite.

◘◘◘

KASI naman ay aktuwal na apektado ang ekonomiya ng US at walang duda na apektado siyempre ang kanilang space technology.

Ang Russia ba ng dapat sisihin?

◘◘◘

TUMATANGGI ang buong Europe na magbayad ng Russian currency na ruble kapalit ng suplay ng gas.

Halos 40 porsiyento ng suplay ng gas ng Germany at iba pang bansa sa Europe ay nagmumula sa Russia.

Anumang araw ay magkakaroon sa Europe ng energy crisis. Kasalanan ba uli ng Russia?

◘◘◘

LAGING sinisisi ng international press ang Russia gayong kapitbahay na Ukraine lang ang in-operate nila at hindi naman sila kasama sa sumakop sa Afghanistan, Iraq, at Libya at nagmasaker ng mga sibilyan dito.

Mahilig manisi ang mga kritiko.

◘◘◘

HINDI na ngayon nagkakalayo ang buhay-pulitika nina ex-Sen. Bongbong Marcos at Manila Mayoralty candidate Atty. Alex Lopez.

Ang kasalanan ba ng tatay ay kasalanan ng anak?

Paano makakadepensa ang isang namatay nang tao sa isang akusasyon na hindi naman niya kailanman ginawa?

◘◘◘

SINISISI ang tatay ni BBM na si dating Pangulong Ferdinand Marcos pero hindi naman siya kandidato sa Mayo at matagal na itong yumao.

Sinisisi naman ng Asenso Manilenyo ang matagal nang naglingkod sa Maynila at matagal na ring yumao na si Manila Mayor Mel Lopez sa bentahan ng Divisoria Market.

◘◘◘

INAAKUSAHAN si Meyor Lopez na masyadong mababa ang halaga ng siningil ng city hall sa mga vendors kaya nalulugi ang Divisoria Market. Maliit ang singil, kasi ‘yun ang kalakarang presyo ng mga panahong iyon.

Dahil maliit ang singil sa vendors, ibinenta na lang ni Yorme ang palengke sa pribadong korporasyon.

◘◘◘

KINONDENA ni Atty. Lopez ang pagdawit ng Asenso Manilenyo sa pangalan ng yumaong ama.

Nakabababa umano ito ng moralidad at hindi angkop para sa isang sibilisadong lipunan.

◘◘◘

LIHIM na sinisira ngayon ng ilang grupo ang pangalan ng dating alkalde na nagsilbi noon pang 1986 hanggang 1992.

Marami pang alkalde ang naupo sa Maynila mula noon kaya’t hindi siya dapat idawit sa bentahan ng Divisoria Mall sa panahon ng pandemic.

◘◘◘

BUMALIKTAD na rin ang haligi ng Nationalist Peoples Coalition (NPC) sa Tarlac dahil sinuportahan ang tandem nina BBM at Sara.

Inendorso ng mag-asawang sina Rep. Apeng Yap at Gov. Susan Yap ang UniTeam kaya’t namula ang dating kulay rosas na lalawigan nina Kristeta, Noy at Tita Cory.

◘◘◘

HABANG lumalapit ang eleksyon, lumalakas pa ang BBM-Sara tandem.

Ang mga naiiwanan naman sa laylayan ay lalong nabobokya.

Normal lang ‘yan, kahit sa karera ng bisikleta ay ganyan din.

Mahalaga ay makaabot lang sa finish line, nakakahiya naman kasi sa sponsors.