Financial system ng 'Pinas, lalakas sa bultu-bultong ginto na nasa Bangko Sentral

at pribadong sektor

ni Ka Ambo - @Bistado | April 28, 2022

PATULOY pa rin ang pagsu-suplay ng Russia sa kanilang mga suki ng petrolyo at gas partikular sa Europe at India.

Ibina-blackmarket pa ang produkto ng Russia.

◘◘◘

ANG rubles o Russian currency ay ikinambal na rin ni Vladimir Putin sa gold.

Iyan ang original na monetary system bago ikinambal sa US dollars ang world financial system.

◘◘◘

NANG nakakambal sa gold ang financial system, nakaaangat ang Pilipinas sa buong Asia dahil ang palitan noon ay dalawang piso (P2) kontra sa isang dolyares.

Ngayon ay higit sa P50 ang palit sa isang dolyar.

Bundok-bundok ang gold sa Pilipinas kaya’t binansagang itong “Ma-I” ng mga Tsino.

◘◘◘

KUNG ikakambal ng Pilipinas ang piso o gagawa ng inobasyon o batas kaugnay ng imbentaryo ng gold bullion na nasa loob ng teritoryo ng Pilipinas bago ito ikambal sa halaga ng piso.

Bultu-bultong ginto ang nasa pangangalaga ng Bangko Sentral at pribadong sektor — kaya’t super-tatag ang piso, at lalakas ang financial system ng Pilipinas.

◘◘◘

ISANG halimbawa ng batas na dapat ipatupad ay eto: ang lahat ng ginto na makukuha sa minahan at ipinoproseso –ay dapat na manatili sa loob ng bansa sa loob ng 12-buwan bago ito ilabas ng bansa.

Ibig sabihin, puwedeng buwisan nang diretso o patawan ng butaw o anumang iskema ang dapat ipatupad kaugnay ng pag-iimbak ng gold sa loob ng Pilipinas.

◘◘◘

MARAMING lumalabas na ulat, at marami ring plataporma tungkol sa ekonomiya, pero bakit walang bumabanggit sa tone-toneladang gold na namimina sa Pilipinas?

Dapat itong busisiin at ilantad sa publiko — lalo pa’t humihiwalay ang world financial system sa dolyares ng US.

◘◘◘

ANG Pilipinas ay isa sa may pinakamaraming ginto kumpara sa ibang bansa.

Mas marami pa ang nakabaon sa lupa at kailangang imina.

Tone-tonelada rin ang ginto na pag-aari ng mga Pinoy na nasalabas ng Pilipinas o naka-deposit sa ilang bangko sa Europe at malalayong lugar.

◘◘◘

PINAG-UUSAPAN ang bigas, simple lang ang solusyon upang maparami ang suplay.

Bungkalin gamit ang modernong heavy equipment ang mga panot na bundok.

Ibig sabihin, gawing rice terraces ang lahat ng bundok na kinakalbo ng mga korporasyon.

Gawing batas na ang gagastos sa pagbubungkal ay ang mismong mga korporasyong kumukuha ng mining permit at mining clearance sa Pilipinas.

◘◘◘

OBLIGAHIN ang lahat ng mining corporation na mag-invest sa rice farming na may industrial capacity — pinakamaliit ay 100 ektarya kada korporasyon.

Sa loob ng isang taon, puwede nang mag-export uli ng bigas ang Pilipinas, kasabay ng pagbaba ng presyo ng bigas sa merkado.

Magkakaroon din ng trabaho at biglang yayaman ang mga magsasaka.

'Pinas, dapat magkaroon ng modernong batas na magre-regulate sa social media

ni Ka Ambo - @Bistado | April 28, 2022

NANGINGIALAM na ang mga espiya ng superpower sa eleksyon sa Pilipinas.

Sinuspinde na ang FB account ng spokesman ni BBM na si Atty. Vic Rodriguez.

◘◘◘

HINDI na nalalayo ang Facebook sa ABS-CBN.

Bahala sila.

Huwag silang magrereklamo kapag sinuspinde ang FB bago matapos ang taong ito.

◘◘◘

ISANG polluted source ng impormasyon ang Facebook.

Hindi nagdaraan sa editor ang mga impormasyon na ipino-post dito ng mga tao dahil kanya-kanyang diskarte lang.

◘◘◘

ANG daloy ng impormasyon sa social media ay tulad ng napakalawak na karagatan.

Marami rito ay nakalutang na “polluted content”.

Dapat itong linisin ng bawat gobyerno — hindi lang ng Pilipinas.

◘◘◘

PERO kapag kinastigo at dinisiplina ang Facebook, papalag at reresbak ang superpower na may kontrol sa negosyo.

At ang karugtong nito ay posibleng kaguluhan.

◘◘◘

MODERNONG batas ang kailangan sa Kongreso.

Dapat ay ihalal ang mga batambatang pulitiko.

Sila ang nakakaunawa sa nagbabagong henerasyon na kinokontrol ng teknolohiya.

◘◘◘

SA pagbabago sa Malacañang, dapat ay nakatuon ang mga bagong opisyal sa pagbabago at pakikiangkop sa bagumbagong lipunan.

May bago nang kultura ang umiiral sa lipunan.

Kailangan dito ay bagumbagong batas na “wala pang precedent”.

◘◘◘

DAPAT ay hindi mangopya ang mga Pinoy sa ibang bansa.

Ang Pilipinas ay dapat magpatiuna sa pagpapatibay ng mga modernong batas na magre-regulate sa mga social media platforms at applications.

◘◘◘

NAIIWANAN sa pansitan ang Pilipinas, sapagkat mga bopol at korup ang inihahalal sa Senado at Kamara.

Mga multi-milyonaryong may pambayad sa political ads ang nasa Magic 12 pero sila ay mangmang sa paggawa ng modernong batas.

◘◘◘

PAULIT-ULIT ang plataporma, panay “generic” — trabaho, hanapbuhay, edukasyon, kalusugan o iba pang kabulastugan.

May narinig na ba kayong bago tungkol sa plataporma sa gadgets, internet protocol, digital operation, at software applications?

Waley?

◘◘◘

BAKIT walang bumabanggit sa e-public administration?

Walang naglalatag ng online government system, pagpapabuti ng online classes, online payment at online work system.

Bultong ginto sa Bangko Sentral, magsasalba sa 'Pinas

ni Ka Ambo - @Bistado | April 27, 2022

KINANSELA na ng Comelec ang town hall debates. Pinaiimbestigahan nila kung may kabulastugan na naganap sa pagporma ng mga nakaraang debate.

Sa totoo lang, hindi nauunawaan mismo ng Comelec ang sitwasyon ng “election debates”.

◘◘◘

HUMINGI ng opinyon sa publiko si Comelec George Garcia upang makatulong sa imbestigasyon.

Nais nating ipaalam sa Comelec na ang iniyayabang nilang “election debates” ay isang klase ng “financial ventures” dahil mayroong potential income.

◘◘◘

DAHIL tipong negosyo, siyempre, posibleng malugi ang organizer tulad ng naganap.

Kung may potential na malugi, siyempre, may potential din itong “magkamal ng salapi” — gamit ang mismong kandidato bilang “content”.

◘◘◘

HINDI simpleng “public service” ang kontrobersyal na presidential debates, bagkus ito ay mas nasa porma ng negosyo.

Dapat ay isinubasta ng Comelec ang “special project na ito”.

Sino sa Comelec ang nagdesisyon sa pagpasok sa kasunduan sa mga “organizers” na may kaakibat na financial transactions sa mga sponsors?

◘◘◘

DAPAT ay nauunawaan ng Comelec ang kahulugan ng “patas na debate”.

Ang tunay na patas na debate, ang mga kasali ay co-organizers din.

Ibig sabihin, kasama sila mismo o ang kanilang representante sa paghubog o paglikha ng programa — kasama na ang pag-aayos ng format.

◘◘◘

KASOSYO o kasama bilang “co-organizers” ang mga mismong kandidato na siyang “main content” ng programa.

Ibig sabihin, hindi puwede na kinukumbida ang mga “kandidato” tulad ng ginawa ng organizers na may bendisyon ng Comelec.

◘◘◘

SA simula pa lamang ay dapat nang kasama sa mga nag-uusap ang representante ng mga kandidato na dadalo.

Sa totoo lang, sakaling kumita mula sa sponsors, dapat ay hinahatian o may karapatang-legal sa pondo ang mga kandidato — dahil sila mismo ang “content”.

◘◘◘

NAPAGDUDUDAHAN ang Comelec na “biased” dahil nagpapadikta sila sa pribadong grupo na nais pagkakitaan ang “presidential debates”.

Dahil wala ang “main content” na sina dating Sen. Bongbong Marcos at Davao City Mayor Sara Duterte, nabangkarote ang organizers.

Siyempre, nadamay ang Comelec.

Iyan ang dapat imbestigahan.

◘◘◘

NAGPAGAMIT ang Comelec, pero hindi nagpagamit sina Marcos at Duterte kahit binabato sila sa “programa”.

Kailangan ng mga naiiwanan sa survey ang “programa” at magtatangka silang gamitin ang presidential debate upang makahabol.

Pero, hindi dumalo ang “main content” kaya’t mabibisto ang lihim na motibo sa loob ng alingasngas.

◘◘◘

NAGKAKAISA ang lahat ng nagmamasid na magtatagal ang giyera ng Russia at Ukraine.

Kinumpirma ni Vladimir Putin na wala nang pag-asa pa ang peace talk at ceasefire.

◘◘◘

ANG lahat ng bansa ay apektado kabilang ang US, China at Europe.

Ang ekonomiya ng buong daigdig ay nahaharap sa hindi maiiwasang krisis na hindi pa nararanasan sa kasaysayan.

◘◘◘

SA Pilipinas, isang malaking paghamon sa mauupo sa Malacañang kung paano maisasalba ang bansa sa isang matinding krisis.

Ang bulto ng ginto na nasa pangangalaga ng Bangko Sentral at pribadong grupo ang magsasalba sa Pilipinas.

◘◘◘

KAILANGANG magpatibay ng batas ang Kongreso at Malacañang nang may kaugnayan sa “transaksiyon” sa gold.

Tatawagin itong “Gold Act of 2022”.