Naiwang campaign fund ng mayayamang Kakampink, uubusin naman sa protesta, hmmm

ni Ka Ambo - @Bistado | May 14, 2022

BISTADO na ang supporters ni VP Leni ay mula sa mga exclusive villages.

Pero ang masang Pinoy ay bumoto kay BBM.

◘◘◘

DAHIL ubod nang yayaman ng supporters, may naiwan pang campaign fund.

‘Yan ang uubusin sa street protest.

Nasadlak sila sa Plan B.

◘◘◘

KAHIT ang overseas Pinoy workers o OFWs ay higit sa 80 percent ang pabor kay Marcos.

Pero, hindi ‘yan mapaniwalaan ng mga kritiko ni Marcos.

◘◘◘

HANGGANG ngayon diretso pa rin ang black propaganda kontra Marcos.

Tapos na po halalan, sige ituloy n’yo lang ang habit ninyo.

◘◘◘

MALINAW ang abiso ng mga eksperto.

Nasa kumunoy ang ekonomiya.

Ibig sabihin, ang gulong ay nababaon sa pusali, habang kumikilos, lalong nababaon.

◘◘◘

PAANO sasaklolohan ang mga gumagapang sa hirap?

Isang paghamon ‘yan kay BBM.

◘◘◘

SA panahon ng Ministry of Human Settlements, nagpautang si Madame Meldy nang walang interest sa mga munting negosyo.

Iyan ay binansagang KKK — Kilusang Kabuhayan para sa Kaunlaran.

◘◘◘

LAHAT ng bansa ay magugumon sa krisis sa ekonomiya.

Walang solusyon dito kundi ang magdasal nang walang patid.

◘◘◘

ANG mga sinaunang Tagalog ay may pangontra sa krisis.

Ito ay ang sipag, tiyaga at sinop.

◘◘◘

TANGING si Robin Padilla lamang ang may malinaw na plataporma de gobyerno.

Ito ay ang pagbabago sa istruktura, sistema at konsepto ng gobyerno.

Iyan ay ang Federalismo gamit ang Charter Change.

Napakalinaw n’yan.

◘◘◘

ISA tayo sa naniniwala na kailangan ang malawakang pagbabago sa sistema ng gobyerno upang maresolba ang problema.

◘◘◘

ANG plataporma ng ibang kandidato ay pare-parehong pambobola lang.

Kumbaga, generic lang, maliban sa espesipikong plataporma ni Binoe.

Iyan ang dahilan kung bakit siya naging No.1.

Higit siyang matalino kaysa kahit sinumang senador.

Comelec, dapat kumilos sa mga palpak na VCM kahit walang pormal na reklamo

ni Ka Ambo - @Bistado | May 10, 2022

SARI-SARING aberya ang naranasan kahapon.

Normal lang ‘yan sa halalan.

◘◘◘

MAY ilang lugar nakaranas ng brownout.

Dapat ay pinaghandaan na ‘yan.

◘◘◘

MAY dispalinghadong VCMs.

Siyempre, may mga nagkakadiperensiya.

◘◘◘

DAPAT ay bantayan ang resulta ng mga presinto na nagkaroon ng aberya gaya ng power supply at dispalinghadong VCMs.

Ikumpara ito sa resulta ng mga VCMs na hindi nakaranas ng aberya.

Sino ang nagwagi sa mayorya ng mga VCMs na nagkaaberya?

◘◘◘

HINDI na dapat maghintay ang Comelec ng complaint o reklamo bago suriin ang mga nagka-aberyang VCM.

Dapat ay may technical group na sumusuri sa kalidad at awtentikasyon ng VCMs na nagkaaberya.

Ganun lang.

◘◘◘

ANG pagbagsak ng bilang ng boto ni BBM sa huling vice presidential race ay naganap matapos, magkaaberya o magpalit ng “command” ang mga computer.

D’yan nagpokus dapat ang imbestigasyon.

◘◘◘

BAGUMBAGO na ang mga tao sa Kamara ng mga Representante at Senado sa taong ito.

Sana ay matanggal na ang mga uugod-ugod at beterano.

Nalipasan na kasi sila ng panahon.

◘◘◘

BIGYAN sana ng pagkakataon ang mga kabataan na hawakan ang maseselang komite sa Kongreso.

Ituon ang mga batas sa modernong teknolohiya at inobasyon sa public administration.

◘◘◘

KRISIS sa ekonomiya ang dapat No.1 priority.

Tanggalin ang pork barrel na ang badyet ay ninanakaw gamit ang infrastructure projects.

Alam ng lahat na nagbubulsa ng milyong komisyon ang lahat ng signatories sa kontrata kasama ang mambabatas.

Mahirap bang isipin ‘yan?

◘◘◘

MASYADONG napagod ang mga bayarang taga-showbiz.

Mawawalan na sila ng “special show” sa mga lalawigan.

◘◘◘

TITIGIL na rin ang maliliit na negosyo na nakadikit sa kampanya.

Balik sa krisis ang bansa.

◘◘◘

MAAARING biglang mag-tag-ulan.

Ano ang contingency measures?

Wala.

Bumoto mula sa konsensya

ni Ka Ambo - @Bistado | May 9, 2022

‘ETO na, election day na.

Bumoto po tayo mula sa konsensya.

◘◘◘

WALANG mali sa inyong iboboto kung ito ay personal ninyong desisyon.

Mali lamang ang pagpili ninyo, kapag may nag-impluwensiya sa inyo.

◘◘◘

KAHIT ang mga magulang ay hindi dapat dinidiktahan ang kanilang mga anak kung sino ang iboboto.

Sa madaling salita, huwag ipagpalit sa salapi, material o anumang pabor ang inyong boto.

Ang marka sa balota, ay siyang magiging marka ng iyong buhay sa susunod na anim na taon.

◘◘◘

HUWAG maniniwala sa negatibong impormasyon nang hindi ninyo personal na sinasaliksik gamit ang teknolohiya at panayam nang personal sa mga may aktuwal na karanasan.

Huwag maniwala sa mga lider ng sekta at relihiyon kung sino ang iboboto, simpleng nagrerekomenda lamang sila ng “personal nilang choice”.

◘◘◘

ANG talamak na korupsiyon ay nag-uugat mula sa ibinentang boto ng mga mamamayan.

Ang nagwawagi sa eleksyon ay nakasandal lamang kung sino ang may pinakamalaking budget sa eleksyon.

◘◘◘

NAGWAWAGI ang mga opisyal ng gobyerno sapagkat gumamit ng malaking cash ang winning candidate.

Pero, ang mga cash na ito ay mula sa illegal, immoral at dinambong sa pamahalaan.

◘◘◘

LAGANAP ang vote buying sa buong bansa, aminado ang Comelec na wala silang kakayahan na sugpuin ito.

Ito ay dahil ang mga “nagbebenta” ay co-criminal din ng mga namimili ng boto.

Paano mo kakasuhan ang isang criminal kung nagkukusa ang biktima na maging biktima?

◘◘◘

ANG biktima ng krimen sa vote buying ay hindi ang mga mamamayang mismong nagbebenta, bagkus ay ang mismong Republika ng Pilipinas.

Ang biktima ay ang inyong anak mismo, dahil masisira ang kanilang kapalaran sa palpak na lider na utak ng pagbili ng boto.

◘◘◘

IMBES na sisihin ang Comelec at mga awtoridad, saklolohan sila na magkaroon ng malinis, maayos at ligtas na halalan sa araw na ito.

Ang katatagan at pag-unlad ng ating bansa ay nakasalalay ngayong araw na ito sa kamay ng higit sa 70 milyong botante.

Isa ka sa may hawak ng isang pipit sa loob ng iyong kamao — kung papatayin mo ang pipit o pakakawalan ito upang makatikim ng kalayaan at magdurugtong sa kanyang buhay ay nakasalalay sa iyong kamay sa araw na ito, Lunes, araw ng halalan.

◘◘◘

BUMOTO ayon sa iyong konsensya.

Walang nakakasilip kung sino ang iyong imamarka, ikaw lamang at ang Dakilang Lumikha.