Hepe ng DOE, dapat eksperto at may sapat na karanasan

ni Ka Ambo - @Bistado | May 29, 2022

Marami ang nag-aantay kung sino ang itatalaga ni P-BBM bilang hepe ng Department of Energy (DOE).

Mahalaga kasi na matupad ang plataporma na mapababa ang presyo ng petrolyo at mapaliit din ang singil sa konsumo ng elektrisidad.

◘◘◘

MAIPATUTUPAD lamang nang maayos ang plataporma kung eksperto at may sapat na karanasan sa DOE ang maitatalagang hepe rito.

Siyempre, alam at mulat siya sa diskarte at pasikot-sikot.

◘◘◘

KAMAKAILAN kasi ay tinalakay ng isang energy official ang sitwasyon sa buwanang singil sa elektrisidad at maging ang walang humpay na pagtaas sa presyo ng petrolyo.

Napakalinaw ang ibinigay na paliwanag hinggil dito.

◘◘◘

AYON mismo kay Energy Undersecretary Benito Ranque, kayang kaya naman pababain ora-mismo ang presyo ng langis hanggang P3.26 kada litro.

Mapababa rin agad ang buwanang singil sa konsumo ng elektrisidad ng mga pobreng Pilipino nang hindi na kailangan pang suspendihin ang excise at value-added tax na ipinapataw ng gobyerno.

Napakaganda n'yan.

◘◘◘

SA pagtataya ni Ranque, posibleng matapyasan agad ng P3.26 ang presyo kada litro ng gasolina at P1.40 naman sa krudo kung didinggin ng Kongreso ang kanyang panawagang pagbalangkas ng isang joint resolution ng Kongreso.

Itinatadhana sa joint resolution ang suspensyon ng Biofuels Act of 2006 na nagtatakda ng ‘additives’ sa mga produktong petrolyo.

◘◘◘

BINIGYAN-DIIN ni Ranque na dagdag-pasakit lang sa mga sektor ng public transportation at mga industriya ang bio-ethanol na inihahalo sa mga produktong petrolyo sa merkado.

Sa pagsasaliksik, hindi talaga kailangan ng mga pampasaherong jeep at bus ang additive na ginagamit lang para itaas ang antas ng road performance ng mga “high-end cars”.

◘◘◘

“THOSE additives should be made an option. Hindi naman talaga kailangan ng mga pampasaherong dyip at bus ang additives. Those additives are meant to induce performance ng mga mamahaling sasakyan,” wika ni Ranque.

Ibig sabihin, hindi kailangan magtanggal ng buwis para lamang mapababa ang presyo ng petrolyo.

◘◘◘

SA elektrisidad, dapat na palawakin lang ang mekanismo ng lifeline subsidy tungo sa P800 mula sa P400 para sa mga konsiyumer na kumokonsumo ng 100 kilowatts kada buwan.

Malaking tulong 'yan sa hanay ng mga ordinaryong Pinoy.

◘◘◘

MALINAW na may solusyon at diskarte si Ranque kumpara sa dalawang pumopostura bilang energy chief na sina Rep. Mikey Arroyo at ERC boss Agnes Devanadera.

Sana’y masapol ni P-BBM ang epektibo at angkop na kalihim sa DOE na magpapatupad ng kanyang plataporma-de-gobyerno.

Kumakalat na si Rep. Mikee ang itatalaga sa DOE, pinalagan

ni Ka Ambo - @Bistado | May 21, 2022

MAY inilabas na mga pangalan na itatalagang bagong miyembro ng gabinete sa ilalim ng BBM Administration.

Ilan dito ay kinumpirma pero ilan ay nanatili pa rin sa status ni ‘Marites’.

◘◘◘

PINAKAKONTROBERSIYAL na pangalan ngayon ay si Rep. Mikey Arroyo na anak ni ex-PGMA.

Nababahala kasi ang ilang sektor ng ekonomiya sa ulat na itatalaga ang batang Arroyo sa Department of Energy (DOE).

◘◘◘

AYON sa United Filipino Consumers and Commuters (UFCC), dapat pag-isipang mabuti ni incoming President Ferdinand 'Bongbong' Marcos, Jr. ang paghirang kay Mikey sa DOE.

Inilalarawan ng pangulo ng UFCC na si RJ Javella na “bad news” ang ulat na itatalaga si Mikey sa DOE dahil nakataya ang kapakanan at interes ng mga konsyumer at komyuter.

◘◘◘

HAMON ng UFCC sa susunod na Pangulo, tupdin ang Article 12, Section 17 at 18 na mag-aalis ng kontrol ng mga oligarko sa serbisyo ng kuryente, tubig, toll roads at iba pa.

Sa pamamagitan ng naturang batas, maipatutupad ni BBM ang kanyang plataporma na pababain ang singil sa elektrisidad at presyo ng petrolyo.

◘◘◘

NAGDUDUDA ang ilan kung paano maipatutupad ni Mikey ang plataporma ni BBM gayung wala siyang expertise maliban sa pagiging pulitiko tulad ni DOE Secretary Alfonso Cusi.

Dapat ay makumbinse ni Mikey ang taumbayan na mayroon siyang sapat na karanasan at kaalaman hinggil sa naturang responsibilidad.

◘◘◘

DUMARAING pa rin ang mga tsuper at operator ng public transport.

Gumagapang na sila sa hirap.

◘◘◘

BAGAMAN, isang napakasopistikadong ahensiya ang DOE, pero sakaling mahusay ang maitatalaga dito, milyun-milyong Pinoy ang masasaklolohan nila kapag napababa nang todo ang singil sa elektrisidad at presyo ng petrolyo.

Pinagsususpetsahan kasi na ang DOE ay mas kumakampi sa mga korporasyon kaysa sa konsyumer.

◘◘◘

NAGWAGI si BBM dahil siya na lang ang tanging nakakaunawa sa kapakanan ng ordinaryong mamamayan.

Alalahanin natin na ang bulto ng boto ni BBM ay mula sa hanay ng mga ordinaryong mamamayan at mula sa mga nagdarahop.

◘◘◘

SANA’Y hindi magkamali si BBM sa pagtatalaga ng mga tao sa lahat ng sangay ng burukrasya.

Kapag nagawa niya 'yan, iyan na mismo ang radikal na pagbabago mula sa “gitna” na ang tinutukoy ay ang mismong pamahalaan.

Barangay at SK Elections, ituloy para sa ekonomiya

ni Ka Ambo - @Bistado | May 18, 2022

TUTOK naman ngayon ang lahat kung sino ang itatalaga ni BBM sa gabinete.

Nauna na nang inihayag si VP-elect Inday Sara sa DepEd at MMDA Chairman Benhur Abalos sa DILG.

◘◘◘

MAHALAGANG matitino at may malinaw na track record at kuwalipikasyon ang mga dapat na maitalaga ni BBM.

Kasi’y kapag kaduda-duda ang personalidad at walang maayos na reputasyon, ikasisira ito ng Marcos Administration II.

◘◘◘

IMINA-MARITES naman ang anak ni ex-PGMA na si Rep. Mikee Arroyo na itatalaga sa Department of Energy (DOE).

Marami ang nagtaas ng kilay, si Mikee sa DOE?

Kinukuwestyon dito ang kredibilidad at kakayahan ni Mikee na pamunuan ang isang “highly sophisticated agency” tulad ng DOE.

Ano ang gagawin niya dun?

◘◘◘

KRISIS sa enerhiya at ekonomiya ang responsibilidad ng mamumuno sa DOE lalo’t maselan ang isyu sa oil price at mataas na singil sa elektrisidad.

Ang kuwalipikasyon lang ni Mikee ay pagiging anak ni ex-PGMA.

◘◘◘

DIREKTANG kinokontra ng mga opsiyal ng ECOP, PCCI at PHILEXPORT ang tsismis na italaga ang isang pulitiko sa DOE.

Isang pulitiko si DOE Secretary Alfonso Cusi, wala siyang landmark achievement sa larangan ng energy, uulitin na naman ba ang ganyang diskarte?

◘◘◘

AYON sa lider ng Employers’ Confederation of the Philippines (ECOP), Philippine Chamber of Commerce (PCCI) at Philippine Exports Confederation (PhilExport) na si Sergio Ortiz- Luis, Jr., isang teknokrat dapat ang maitalaga sa DOE.

Sopistikadong departamento ang DOE — pero direktang may kaugnayan ito sa produksyon at distribusyon ng petrolyo, elektrisidad, LPG at iba pa — paano magagampanan ito ng isang pulitiko?

◘◘◘

MAS okey sana, sakaling maipit si BBM ay humugot na lang siya ng isang “career-based” executive sa loob mismo ng DOE na kabisado na agad ang pasikot-sikot sa problemang pang-enerhiya.

Isang malaking paghamon ito kay BBM na maipatupad niya ang pangakong ibaba ang singil sa elektrisidad.

◘◘◘

USAP-USAPAN na agad ang Barangay at SK election sa Disyembre, 2022.

Hindi na ito dapat ipagpaliban pa, dahil ilang beses na itong kinansela.

◘◘◘

ANG eleksyon ang kaluluwa sa demokratikong gobyerno, No.1 prayoridad ito dapat sa pagpopondo.

Pinasisigla ng eleksyon ang demokrasya na nagpapatibay sa Republika.

◘◘◘

SA Pilipinas, ang eleksyon ay nagpapasigla rin ng ekonomiya dahil sa aktibong pakikilahok ng mga lider.

Kung itutuloy ang eleksyon sa Disyembre, mula ngayong Mayo at Hunyo — didiretso ang sigla ng ekonomiya sa higit na 43,000 barangay sa buong bansa.

◘◘◘

MAGKAKAROON ng oportunidad ang ordinaryong mamamayan na hatulan o husgahan ang performance ng kani-kanilang lider sa barangay batay sa response sa pandemic.

Ibig sabihin, bigyan natin ng pagkakataon ang ordinaryong mamamayan na ipahiwatig o iparamdam ang kanilang desisyon at emosyon sa performance ng kanilang mga lider.

◘◘◘

KAPAG may eleksyon, hindi lamang, sisigla ang demokrasya, sisigla ang ekonomiya, bagkus ay sisigla ang pagkilos ng mga tao sa barangay.

Isang iskema rin ito upang maibsan ang depresyon ng mga tao sa gitna ng krisis.