Malabo ang depensa ng PNP sa "kaduda-dudang pagbisita" sa mga taga-press

ni Ka Ambo - @Bistado | October 17, 2022

MAY ulat na dinadalaw ng mga parak ang mga aktibong journalist.

Aba’y magdala man lang kayo ng sariling ninyong “kape”.

Pero nang may magreklamo, itinigil na ang aktwal na pagdalaw.

Hindi kaya “under surveillance” na lang?

Hindi na magpapakape si Kunay.

He-he-he!

◘◘◘

HINDI malinaw ang paliwanag o depensa ng PNP kaugnay ng “kaduda-dudang pagdalaw”, lalo na’t maselan ang sitwasyon sa seguridad ng mga mamamahayag.

Alam natin, hindi lahat ng naka-uniporme o may ID ng PNP—ay lehitimo ang aktibidad.

Dapat nating maunawaan, ng ilang taga-PNP ay nasasangkot ng aktuwal na krimen.

◘◘◘

MAHALAGANG maging transparent ang PNP—dapat silang magbigay ng katanggap-tanggap na paliwanag.

Hanggang ngayon, kakaunti ang nakauunawa sa kahalagahan ng “pamamahayag” at kung ano ang sustansya ng katagang “Freedom of the Press”.

◘◘◘

NAMAMAHINGA na si Digong.

Pero, nananatili pa rin siyang popular.

Bakit?

Ito ay dahil sa kanyang estilo ng pagsingit ng “joke” sa kanyang mga pormal at hindi pormal na talumpati.

◘◘◘

SISTE ang katumbas ng “joke”.

Ibig sabihin, ma-“siste” si Digong.

'Yan ang paglalarawan ng mga Tagalog sa Bisayang si Digong.

'Yan mismo, kaya’t minahal siya ng masa.

Ganun lang kasimple.

◘◘◘

SA tingin natin, ganyan din ang estilo ng kanyang nakatandem na si Sen. Peter Alan Cayetano.

Masiste rin si Sen. Alan, pero medyo pormal ang kanyang siste kompara kay Digong na pang-masa talaga.

◘◘◘

MAS angkop na gamitin ang “hugot’ kaysa siste sa mga sinasabing joke ng senador.

Ginagamit ng senador ang kanyang “hugot” upang bigyang-diin ang isyu at 'yan ay isa niyang teknik.

◘◘◘

TULAD noong Huwebes sa budget hearing ng DPWH sa Senado, pahapyaw niyang binanggit na “padadalhan niya ang mga opisyal nito ng vitamins para gumanda ang memory nila”.

Pa-“hugot” pero may patama.

◘◘◘

BINIBIGYANG-DIIN lamang dito ay ang pag-iwas ng away-away o salungat sa gitna ng krisis.

Kailangan ang “Solomonic solution”, kailangan magtagpo-tagpo at magkaisa ang lahat—anuman ang kulay pulitika o ideolohiya—alang-alang sa ating bansa.

Ganun lang!

Bigyan muna ng hanapbuhay ang mga trabahador ng POGO bago tuluyang ipasara

ni Ka Ambo - @Bistado | October 15, 2022

ISA tayo sa mga natutuwa dahil nilagdaan na ang pagpapaliban ng barangay at SK election.

Sa totoo lang, puwede nang “mangampanya”.

◘◘◘

DAHIL mayroon nang malinaw na batas, aktuwal nang magmamaniobra ang mga aspirante.

'Yun nga lang, huwag sanang ipagpaliban muli ang eleksyon sa Oktubre 2023.

◘◘◘

MAGKAKAROON muli ng voter’s registration.

At dahil may malinaw nang petsa ang eleksyon, walang duda, marami ang maghahakot ng kani-kanyang “flying voters”.

Matatadtad na rin ang social media ng kung anu-anong post at “fake news”.

'Yan na ang isang maselang sitwasyon na mahirap makontrol.

Kumbaga, free-for-all.

◘◘◘

MAGKAKAMPANYAHAN ang mga aspirante kahit wala pang official election calendar.

At magaganap ito sa gitna ng krisis na nararanasan.

◘◘◘

MARAMI ang walang trabaho at ang ilan na masuwerteng nakabalik sa trabaho.

Pero nanganganib ding “masisante” ang ilang may trabaho na dahil sa krisis at sanhi ng pagbaba ng halaga ng piso kontra dolyar.

◘◘◘

KABILANG dito ang maselang sitwasyon ng mga nagtatrabaho sa lehitimong Philippine Offshore Gaming Operators (POGOs).

May nagyayabang na nakabalik na raw sa dating porma ang ekonomiya kaya’t puwede nang palayasin ang mga POGO operators.

Eh, paano 'yung mga Pinoy na nagtatrabaho rito?

◘◘◘

ANG mga anti-POGO ay karaniwang nagmula sa hanay ng mga ilustrado at elitista.

Alam ba ninyong aabot sa 23,000 POGO workers ang mawawalan ng pantustos sa kanilang pamilya?

Ilang bibig ang magugutom, ilang sanggol ang mawawalan ng pambili ng gatas?

◘◘◘

ANG bilang ng apektado ng pagsisante ay mula lamang sa Association of Service Providers and POGO (ASPAP) na galing sa 16 Philippine Amusement and Gaming Corp. (PAGCOR)-licensed POGOs at 68 service providers.

Pero, higit na marami ang apektadong “indirect workers” na nakadikit sa POGO operations, tulad ng mga nasa transport industry, karinderya, restaurant at iba.

◘◘◘

AYON sa Senado, economic manager at NEDA—marami ang pwedeng ipalit sa POGO, pero “kuwento-kuwento” lang.

Dapat espesipikong kunin ang datos o mga pangalan ng mga mawawalan ng trabaho—at ilipat o aktwal silang bigyan ng bagong trabaho—bago isarado ang POGO.

◘◘◘

IWASAN sana ang imahinasyon, espekulasyon at “pangako”, dapat kongretong datos, aktwal na trabaho at sitwasyon ang pagbabatayan ng mga desisyon.

Ibig sabihin, bigyan muna ng trabaho ang mga masisisante at saka magdesisyon.

◘◘◘

Tandaan: Patuloy ang paghina ng piso kontra dolyar, hangga’t wala pa ang binabanggit na “alternatibong industriya”, aba’y huwag muna ninyong tanggalin ang POGO.

Kumbaga, tiyakan ngayon dapat ang mga desisyon at wala munang “emosyon” at haka-haka.

Hindi ba puwedeng hinay-hinay muna alang-alang sa sikmurang kakalam-kalam?

PhilHealth, kailangang sabayan ang inflation sa pagbibigay ng ayuda sa miyembro

ni Ka Ambo - @Bistado | October 8, 2022

Nilinaw ng PNP sa Senado na wala nang krimen na iniuugnay sa operasyon ng Philippine Offshore Gaming Operators (POGO).

Mainam naman.

◘◘◘

BATAY ang impormasyon sa datos mula nang isagawa ang pagdinig ng Senate Committee on Public Order and Dangerous Drugs noong September 15.

Inihayag ito sa joint hearing ng nasabing komite at ng Committee on Ways and Means noong Lunes.

◘◘◘

IBINASURA ng naturang datos ang opinyong nagiging grabe ang kriminalidad dahil sa POGO.

Inamin ni NCRPO acting Regional Director PBGen. Jonnel Estomo, na mas pinaigting nila ang police visibility at wala nang naitalang krimen kaugnay sa POGO sa NCR, Regions 3 at 4.

◘◘◘

KINATIGAN ang naturang report nina Region 3 ARD PBGen. Cesar Pasiwen at Region IV-A ARD PBGen. Jose Melencio Nartatez, Jr.

Naniniwala si Estomo na posibleng may nananabotahe lamang dahil ang mga krimeng binabanggit ay naganap noon pang Hulyo.

◘◘◘

NANG tanungin ni Sen. Sherwin Gatchalian, nanindigan ang NCRPO chief na kayang solusyunan ang krimen sa Kamaynilaan at sa buong bansa.

Hindi rin makatwiran na gamiting dahilan ang krimen para pigilin ang lehitimong operasyon ng POGO na nagpapasok ng buwis sa bansa at nagbibigay ng trabaho sa mga tao.

◘◘◘

SA gitna ng krisis, maraming tao ang dumaranas ng depresyon at sakit—hindi maayos na maipaliwanag ng mga eksperto.

Mahalaga ang tulong ng PhilHealth sa sitwasyong ito ng mamamayan ngayon.

◘◘◘

MAY kasabihan, ang sakit sa puso ay sakit “pang-mayaman”, paano na ang ordinaryong mamamayan?

Alam mo bang kailangan ang halos isang milyon piso sa coronary artery bypass graft surgery?

Buwan-buwan ay kinakaltasan ang suweldo ng mga obrero ng PhilHealth at umaasang makakatulong ito kung sakaling magkasakit nang grabe ang mga miyembro.

◘◘◘

SA isang briefing ng PhilHealth para sa Senate Committee on Government Corporations and Public Enterprise noong October 5, ibinunyag ni committee chairman Senator Alan Peter Cayetano, na ang package ng PhilHealth para sa nabanggit na procedure ay P550,000 lamang pero ang actual cost sa ospital ay aabot sa P907,000.

Ibig sabihin, kailangan pang magdelihensya ng dagdag-P357,000 para maoperahan.

◘◘◘

MARAMING Pinoy ang namamatay nang hindi na nagpapaopera at nagagamot.

Nabatid na anim sa bawat sampung Pilipino ay namamatay na lang nang hindi man lang nakapagpapatingin sa doktor.

◘◘◘

SA isang survey noong 2019, aabot sa 99% ng mga Pilipino ang hindi bumibili ng gamot na inirereseta.

Aabot sa 44.7% ng gastos sa healthcare ay ang mamamayan mismo ang gumagastos imbes na ang PhilHealth o ibang insurers.

◘◘◘

NANINIWALA si Cayetano na kailangang i-adjust na rin ang serbisyo ng PhilHealth.

Ito ay dahil na rin sa inflation o mataas na presyo ng bilihin at serbisyo.

Kapos ang ayuda na ibinibigay ng PhilHealth kaya’t dapat i-review at i-update ang benefit packages ng PhilHealth.