Monopolyo sa motorcycle taxi, hmmm…

ni Ka Ambo - @Bistado | November 18, 2022

BALIK-TRAPIK na naman.

'Yan na mismo ang normal.

◘◘◘

NAKAPUNDASYON ang pagrekober ng ekonomiya sa public transport sector.

Pero, marami ang walang kakayahang magbayad sa traditional taxi.

◘◘◘

NAGTITIIS ang mga obrero na magpalipat-lipat sa bus, dyip, tricycle o pedicab.

Mabuti na lang at nagkaroon ng inobasyon sa motorcycle taxi tulad ng Angkas, JoyRide at Move It.

◘◘◘

SA pinakahuling balita, may isang grupo na nagnanais maimonopolyo ang bagong inobasyon na kinopya sa “Habal-Habal” ng Bangkok.

Isinusulong ang batas upang mai-regulate ang operasyon ng motorcycle ride-hailing apps.

◘◘◘

NAKAHAIN na ang panukalang batas sa “Motorcycle-for-Hire Act.”

Pero nagbabahala ang Bantay Konsyumer, Kalsada, Kuryente; at Citizen Watch Philippines, na maaaring maligwak ang Congressional probe.

◘◘◘

IPINAPAIN ang imbestigasyon sa investment deal sa pagitan ng Grab at Move It.

Pabor naman ang Department of Transportation at Philippine Competition Commission, pero itutuloy pa rin ng House Committee on Metro Manila Development ang pagdinig sa November 23.

◘◘◘

HINDI ba dapat ang House Committee on Transportation ang magsagawa ng pagdinig?

Inuupakan ang investment deal pero tila may minamanok pabor sa motorcycle taxi service.

◘◘◘

NAAAMOY natin nais lang ng isang grupo na monopolyo-hin ang inobasyong ito.

Maging ang Land Transportation Franchising and Regulatory Board ay matagal nang tutol upang magkaroon ng opsyon ang mga konsyumer.

Ipagdasal nating magkaroon ng seryoso at maayos na batas hinggil dito para sa ikabubuti ng operators at komyuter.

◘◘◘

TAGUMPAY ang biyahe ni Pangulong Ferdinand "Bongbong" Marcos, Jr. sa iba't ibang bansa kabilang ang APEC sa Thailand.

Makatutulong ito sa pagrekober ng ekonomiya.

◘◘◘

GAYUNMAN, mahalagang mapababa pa rin ang presyo ng mga bilihin, magkaroon ng trabaho at mapasigla ang maliliit na negosyo.

Sana ay maganap ito bago mag-Pasko.

◘◘◘

UMATRAS na ang Russia sa sinakop na rehiyon sa Ukraine.

Makatutulong ito para mapababa ang mataas na presyo ng petrolyo.

◘◘◘

KINUMPIRMA ng US na hindi sinasadya ng Russia ang bomba na bumagsak sa Poland.

Naghahanda na ng giyera ang NATO pero isa itong “false alarm”.

‘Di maka-move on ang mga Pinoy sa P10-K ayuda ni Cayetano

ni Ka Ambo - @Bistado | November 14, 2022

BUKAMBIBIG pa​​ rin hanggang ngayon ang P10-K ayuda na pinauso ni Sen. Peter Alan Cayetano.

Diretso kasi ito sa bulsikot ng mga benepisaryo.

◘◘◘

BUNGAD pa lamang ng 19th Congress, inihain ulit ng senador ang panukalang batas para rito.

Hinikayat niya ang mga kapwa senador at DBM na ibigay na ito sa mga pamilyang Pilipino.

Pero walang talab, bakit kaya?

◘◘◘

BIGLANG nagtaasan ang presyo ng mga bilihin, saan kaya makakarating ang P10-K ayuda?

May inilaan na P200 bilyon ang Kongreso para sa ayuda—pero puta-putakti ang pinaglalaanan at halos walang direksyon ang pagba-budget.

◘◘◘

KUMBAGA, tipong miyembro ng “United Nations” ang paglalaanan, imbes na ipokus ito nang sistematiko—tulad ng P10-K kada pamilya.

Tapos sana ang kuwento—at diretsong makatutulong agad sa pag-ahon sa krisis.

◘◘◘

SA totoo lang ay may milyones ang DSWD na hindi na-claim ng dapat sana’y benepisaryo.

Mahaba at masalimuot ang proseso, kaya’t ang nakinabang ay ang “’remittance agency”, kung saan ito itinengga.

◘◘◘

ISIPIN mong may kung anu-anong gimik ang ayuda—may 4P’s, TUPAD, AICS, benepisyong bigay ng LTO sa mga drayber at iba pang tulong na mula sa gobyerno.

Inirerekomenda ni Cayetano na pag-isahin o ikonsolido o simplehan lang ang pagbibigay ng ayuda.

◘◘◘

DAPAT P10-K ayuda na lang—at sakop na ang lahat ng sektor—magsasaka, mangingisda, laborer, tsuper, operator at estudyante.

Ganun lang kasimple.

***

LUMANTAD na si Gerald Bantag.

Maghahalo nang aktwal ang “balat sa tinalupan”.

◘◘◘

MAGPUPULONG ang G20 sa Bali, Indonesia kung saan dadalo ang maunlad sa pinakamauunlad na bansa sa daigdig.

Umaatikabong balitaktakan ‘yan.

◘◘◘

BABABAD sa media ang “G20” ngayong linggo.

Kapag naghuramentado ang heneral, makakaagaw siya ng eksena.

Huwag sana siyang mag-G-string.

◘◘◘

NAGSISIMULA na ang proseso sa seleksyon sa magiging UP president.

Isang isyu ngayon ay kung bakit “two-and-half times” na may mas malaking tsansa ang mayayaman na ma-admit sa UP kumpara sa maliit na tsansa ng mahihirap mula sa liblib na lugar sa bansa.

◘◘◘

KUMAKALAT sa TikTok ang tanong sa University of the Philippines (UP) ng nominadong veteran professor na si Dr. Benito M. Pacheco: Paano kaya kung may makakapasok na freshman mula sa bawat bayan at siyudad sa UP taun-taon?

Paano ba mangyayari ‘yun, UP?

◘◘◘

DAPAT iluklok bilang UP President ang pinakakuwalipikadong nominado, tulad ni Dr. Benny na mula sa isang bayan sa Bulacan.

May sapat siyang karanasan sa akademya sa Pilipinas at maging sa ibang bansa.

WW III kapag naghuramentado si Putin

ni Ka Ambo - @Bistado | November 11, 2022

Umaatras na ang Russia mula sa sinakop na rehiyon sa Ukraine.

Ibig sabihin, malapit nang matapos ang digmaan.

Pero, 'yan ay kung magpapakumbaba ang Russia at tatanggapin ang mapait na katotohanang mahihirapan silang makubkob ang Ukraine.

◘◘◘

HINDI na Ukraine ang isyu ngayon, bagkus ay ang personalidad ni Russia strongman Vladimir Putin.

Kung sakaling maghuramentado si Putin, masasadlak ang daigdig sa ikatlong digmaang pandaigdig—pero 'yan ay kung sasangga ang China sa Russia.

◘◘◘

KAPAG hindi sinaklolohan o nakipag-alyansa ang China sa Russia, walang giyera-mundial na magaganap.

Walang bansa na nagnanais ng giyera—dahil walang magwawagi, bagkus ay daranas ang buong daigdig ng ibayong hirap—marami ang mamamatay, maging sa mamamayan ng superpower.

Sino ang magbubunsod ng giyera-mundial?

Wala.

◘◘◘

ANUMANG pagbabarumbado ay maaaring ipakahulugan sa digmaang pandaigdig, pero mabilis itong maaapula.

Mas dapat paghandaan ay ang pagtatapos ng kaguluhan—kung saan, mabilis na makakarekober ang buong daigdig.

◘◘◘

IMBES na pagkawasak, matitikman ng daigdig ang kaunlaran hindi pa nating nararanasan.

Imbes na maubos ang tao sanhi ng mga sakit, hahaba ang buhay na tao nang higit sa 100 edad—dahil sa inobasyon ng siyensya at mediko.

◘◘◘

MAGIGING mas masaya ang buhay ng tao dahil sa teknolohiya at imbensyong magpapagaan at magpapabilis ng komunikasyon at pagkilos.

Ang bawat rehiyon ay magiging tulad ng bansa na masiglang nag-uugnayan sa negosyo at turismo.

'Yan ang dapat paghandaan.

◘◘◘

SA ayaw o sa gusto ng mga Pinoy—sa malaon at madali, riyan makaaangat ang ating bansa.

Maganap sana ito na parang panaginip lamang.