Very good na may ayuda ang tricycle drivers

ni Ka Ambo - @Bistado | December 15, 2022

LUBOG sa utang ang ordinaryong obrero.

Maging ang ordinaryong tricycle driver ay hindi magkandaugaga sa mataas na presyo ng petrolyo.

◘◘◘

MISTULANG nakukuba ang mga tsuper ng pampasaherong sasakyan upang magkamal lamang ng salapi ang mga oil corporation.

Mahirap na buhay ang epekto ng pandemya.

◘◘◘

MALAKING tulong ang fuel subsidy sa tricycle drivers.

At ‘yan ang nagsilbing salbabida sa panahon ng krisis.

◘◘◘

MATALAS ang ulirat ni Senador Alan Peter Cayetano kay Transportation Secretary Jaime Bautista sa confirmation hearing nito sa Commission on Appointments (CA) noong Miyerkules.

Hiniling ng senador sa dating pangulo ng Philippine Airlines (PAL), dalhin niya ang expertise nito sa private sector sa gobyerno.

◘◘◘

MATAPOS ang paggigisa sa Senado, inapura agad ang implementasyon ng fuel subsidy sa mga tricycle driver.

Pero pumapalag si Cayetano dahil 6,000 tricycle drivers pa lang ang nakatatanggap ng subsidy.

◘◘◘

'

INAMIN ng DILG na nasa 600,000 ang kabuuang bilang ng tricycle drivers sa buong bansa.

Naglaan ang gobyerno ng P2.5 bilyon para sa subsidy sa lahat ng public utility drivers—jeepney man, taxi o tricycle.

◘◘◘

IKINAKATWIRAN ni Bautista ay kulang ang listahan ng mga tricycle driver sa LGUs.

Ayon kay Cayetano, puwedeng punan ng mga Tricycle Operators and Drivers Associations (TODA) ang listahan.

◘◘◘

SA meeting noong Biyernes, nagkasundo sina Cayetano at Bautista na idaan sa LGU ang pamamahagi ng subsidy.

Sana ay gamitin ni Bautista ang expertise niya bilang private sector executive para maresolba ang problema sa transportasyon at masaklolohan ang mga pobreng tsuper ng pampasaherong sasakyan.

◘◘◘

BUMABABA ang presyo ng petrolyo.

Hindi ito nakakatuwa.

Indikasyon ‘yan ng mahinang demand at ibig sabihin ay babala ito ng “resesyon” o paghina ng takbo ng ekonomiya.

◘◘◘

BATAY sa “law of supply and demand”, ang mataas na presyo ng mga bilihin ay bunga ng malaking demand.

Ang malaking demand ay sintomas ng malusog na ekonomiya.

◘◘◘

NAGBABALA ang mga eksperto sa napipintong recession sa buong daigdig na mararanasan sa 2023 at 2024.

Pero ang magandang balita, hindi ito gaanong tatalab sa ilang bansa sa Asia-Pacific kasama ang Pilipinas at India.

◘◘◘

MAY malusog na domestic economy ang Pilipinas dahil ito ay archipelago o binubuo ng mga isla.

Hindi lang ‘yan, ang mga OFW ay nakakalat sa iba’t ibang panig ng daigdig—tulad ng mga Jews, Chinese, American at Indian.

‘Yun lang muna.

◘◘◘

ANG bilyun-bilyong dollar remittances ay nagpapasigla ng domestic economy na siyang pondasyon ng sistema ng ekonomiya ng Pilipinas.

Sa ngayon, nagpa-panic ang iba’t ibang bansa dahil sa kakapusan ng ‘labor force’ o ‘human resources’, kung saan ang Pilipinas ay mistulang may “minahan ng mga kuwalipikadong tao”!

Kakambal na ng Republika ng Pilipinas ang graft and corruption, tsk!

ni Ka Ambo - @Bistado | December 8, 2022

USAP-USAPAN ngayon ang Maharlika Sovereign Fund.

Isa itong panukalang batas na maglalaan ng espesyal na pondo, hiwalay na tradisyunal na pondo ng gobyerno.

◘◘◘

ANG P5.3 trillion budget ay tradisyunal na pondo na inilalaan ng Kongreso, taun-taon.

Hindi masasakop ng 2023 budget ang Maharlika Fund—maging ang gugulin na itinakda ay hindi ito magagalaw.

◘◘◘

NAKAPOKUS ang isyu, hindi mismo sa Maharlika Fund, bagkus ay ang panganib na malustay ito o madambong ng mga kroni o mawaldas ng mga kasunod na administrasyon.

Malinaw na ibinababala na dapat matiyak ang pondo na hindi maabuso o magagamit sa “kawalanghiyaan” ng mga kurakot sa pamahalaan.

◘◘◘

TUMPAK ang argumento na “mabuti” ang Maharlika Fund sa pasubaling sa mabuti rin ito gagamitin.

Ganyan din naman ang lahat ng pondo na inilalaan sa General Appropriations Act—ang intensyon ay mabuti lahat, pero saan nauuwi?

◘◘◘

SA totoo lang, ang sagot talaga ay ang kawalan ng “ideolohiya” ng mismong mga lider o opisyal ng gobyerno.

Nag-uugat ang problema, dahil iilan lamang sa mga ito ang nakauunawa ng tunay na kahulugan o esensya ng ideolohiyang maka-Filipino.

◘◘◘

HANGGA’T walang niyayakap o pinaninindigang “ideolohiya” ang mga lider ng alinmang bansa—ang korupsyon ay hindi kailanman masusugpo.

Nakapasok, nakatanim at nakabaon sa ideolohiya—ang “pagmamahal sa bayan, pagsasakripisyo at pagmamalasakit” sa Lahing Kayumanggi, partikular sa pag-ibig sa tinubuang lupa.

◘◘◘

KAPAG walang ideolohiya—ang mga lider at opisyal, ang mga ito ay nababahiran ng pagkamakasarili, pagiging gahaman sa materyal at salapi at pagiging ganid sa posisyon.

Pero, kapag may ideolohiya—ang matataas na opisyal, partikular ang mga “kokontrol sa Maharlika Fund”, ito ay magagamit ng mabuti para sa kapakanan ng bawat Pinoy.

◘◘◘

NGAYON, tanungin natin ang mga promotor.

Sino sa inyo ang nakauunawa ay yumayakap sa tunay na “ideolohiyang maka-Filipino”?

Nakahalukipkip lang.

Huh, namutla kayo ano?

◘◘◘

ANG graft and corruption ay kakambal ng Republika ng Pilipinas.

Kapag sinabing graft and corruption, direktang tinutukoy ay ang mandarambong sa loob ng pamahalaan.

Walang debate riyan.

◘◘◘

ANG problema, maging ang pribadong korporasyon o kahit teknokrat ay may mga pusakal ding “kurakot”.

Ang pagkakaiba lang sa korporasyon, ninanakaw nila ay pondo ng “pribadong tao”.

◘◘◘

PARE-PAREHO lang may “kurakot” sa publiko at pribadong sektor.

Ito ay ganun din ang dahilan: Walang ideolohiya ang mga lintek!

Wala sanang ‘fraternity at pulitika’ sa pagpili ng next up president

ni Ka Ambo - @Bistado | December 5, 2022

Alam ba ninyong magbobotohan ngayong linggo ang Board of Regents (BOR) ng University of the Philippine (UP) upang mapili ang susunod na UP president?

May 11 miyembro ng BOR—at tinukoy na ang mga nominado o aspirante sa posisyon.

◘◘◘

SA mga nagdaang buwan, may nagdududa sa kakayahan ng UP system na maging No.1 unibersidad sa bansa karibal ang Ateneo at DLSU.

Dahil d’yan, ang botohan ng BOR ay maselang isyu ngayon.

◘◘◘

KAILANGANG makakuha ng majority vote o anim na boto mula sa 11 miyembro ng BOR—upang maideklarang panalo na papalit sa outgoing UP President na si dating Kabataang Barangay Valenzuela City Federation President na si Atty. Danny Concepcion.

Tulad sa ordinaryo o tradisyunal na eleksyon, hindi maiiwasang mabahiran ng pulitika ang paghahalal sa UP President.

◘◘◘

SANA ay makalaya ang 11 miyembro ng BOR sa bahid pulitika, kung saan mayroong ding lihim na “manok” ang ilang pulitiko.

Sa kabilang panig, malakas din ang tradisyunal na impluwensya sa naturang halalan ng “fraternity o brotherhood” lalo pa’t UP ang pinag-uusapan.

◘◘◘

ALAM nating kapag ang nagdikta sa eleksyon ay “fraternity” o “pulitika”—naisasakripisyo nito ang pinakakuwalipikadong nominado.

Ang tradisyunal na impluwensya ng “fraternity” at “pulitika” sa UP system ay dapat maiwasan—at nakasalalay ito sa kamay ng 11 miyembro ng BOR.

◘◘◘

MAS mainam sana ay magkusa ang 11 BOR na talikdan ang impluwensya ng “fraternity” at “pulitika”—alang-alang mismo sa pinakamamahal nilang Unibersidad ng Pilipinas.

Mahalagang maghalal ng pinakakuwalipikadong nominado ang BOR ngayong linggo.

◘◘◘

TULAD sa tradisyunal na pagpili ng Santo Papa sa Vatican City, kailangan ang anim na boto mula sa 11 BOR bago ideklarang panalo ang nominado.

Hindi puwede ang plural vote, tulad ng boto na tinanggap ni dating Pangulong FVR, kung saan higit na marami ang hindi bumoto sa kanya, kaysa sa bilang ng direktang bumoto.

◘◘◘

KUNG sakaling sa unang bugso ng botohan ay walang kandidato na nakakuha ng sapat na anim na boto, uulitin ang pagboto hanggang sa makuha ang mayorya.

May natanggap tayong impormasyon na mahigpit ang girian ng mga nominado, kung saan lalaro sa tatlo hanggang apat na boto ang manok ng “fraternity”; tatlo hanggang apat na boto ang posibleng sumuporta sa “lihim na pulitika”—at tatlo hanggang apat na boto rin sa neutral o nominado na hindi nababahiran ng “fraternity o pulitika”.

◘◘◘

KUNG sakaling mag-deadlock at ulitin ang botohan, ipagdasal nating mamulat ang mayorya ng BOR at suportahan ang pinakakuwalipikadong kandidato na “professor emeritus” na may sapat na karanasan sa pagtuturo sa UP at sa ilang unibersidad sa ibang bansa.

May karanasan sa industriya o praktisado sa kanyang propesyon.

◘◘◘

ANO’NG ibig sabihin ng “professor emeritus”?

Sa Ggoogle, ito ang lalabas na kahulugan: “A lifelong designation that recognizes achievements of those with meritorious records”.

Sino ba sa mga nominado ang ginawaran mismo ng BOR ng “professor emeritus” ?

◘◘◘

HINDI ba dapat magkaisa ang mga taga-UP na suportahan ang may Professor Emeritus upang mapasigla at magkaroon ng ibayong inobasyon sa UP system—batay sa akademya, bihasa sa pagtuturo at pagkadalubhasa sa propesyon?

Talikdan na natin ang impluwensya ng fraternity at pulitika sa pagpili ng UP President—maawa tayo sa ating mga apo at apo ng mga apo natin na mag-aaral sa mahal nating unibersidad!