Jinggoy, nagpiyansa ng P90K sa kasong graft

ni Jeff Tumbado @News | May 30, 2026

Photo: File / Jinggoy Estrada - FB

Personal na nagtungo si Senador Jinggoy Estrada sa Sandiganbayan upang pormal na maglagak ng P90,000 piyansa, ilang oras matapos ilabas ang warrant of arrest laban sa kanya.

Ang paglalagak ng piyansa ay para sa kinakaharap nitong kasong graft sa Sandiganbayan kaugnay ng umano’y anomalya sa mga proyekto ng Department of Public Works and Highways (DPWH) partikular sa flood control projects.

“Iginagalang ko ang rule of law at ang ating mga institusyong panghukuman, kaya ako ay nagpiyansa at personal na nagpapasailalim sa hurisdiksyon ng Sandiganbayan,” saad ni Estrada sa kanyang pahayag.

“Ang pagpiyansa ay isang legal na remedyo na nakasaad sa ating justice system, at gagamitin ko ang lahat ng naaayon sa batas upang ipagtanggol ang aking sarili at linisin ang aking pangalan,” dagdag pa niya.

Muli ring itinanggi ni Estrada ang mga akusasyon laban sa kanya.

Samantala, wala pang inilalabas na hiwalay na arrest warrant ang Sandiganbayan 5th Division na humahawak sa kasong plunder ni Estrada.

Tinuluyan sa plunder at graft – Ombudsman... Kulong kay Jinggoy

ni Jeff Tumbado @News | May 29, 2026

Photo: Jinggoy Estrada -Senate PH

Pormal na naghain ang Office of the Ombudsman ng kasong plunder at graft laban kay Sen. Jinggoy Estrada sa Sandiganbayan nitong Huwebes.

Kasunod ng pagsasampa ang inaasahang paglalabas ng warrant of arrest laban kay Estrada anumang oras.

Ang kasong plunder ay walang piyansa at may kaparusahang habambuhay na pagkakakulong.

Sa ilalim ng batas, maaari lamang payagan ang piyansa kung mapapatunayan ng korte na hindi matibay ang ebidensya ng pagkakasala.

Isinampa ng anti-graft body ang kaso ilang linggo matapos nitong matanggap ang rekomendasyon mula sa Department of Justice (DOJ).

Bukod kay Estrada, kasama rin sa kakasuhan si dating DPWH Secretary Manuel Bonoan at iba pang DPWH engineering officials na sina Asst. Engineer Denryl Caesar Cortuna, Engineer Manny Bulusan, at Engineer Arturo Gonzales, Jr.

Isa si Estrada sa umano'y nagmanipula para paglaanan ang P355 milyon sa pamamagitan ng budget insertions sa unang distrito ng Bulacan kapalit umano ng 30 porsyentong komisyon, ayon sa naging pagbubunyag ni dating DPWH Assistant District Engineer Brice Hernandez sa pagdinig ng House infrastructure committee noong Setyembre ng nakaraang taon.

Una nang itinanggi ni Estrada ang alegasyon. Iginiit din ng senador na ayon sa Legislative Budget Research and Monitoring Office ng Senado, wala umano siyang anumang budget insertions.

Hirit niyang itago ang CCTV sa Senado, nabulgar… SEN. JINGGOY, SINISI ANG MEDIA, TINAWAG NA IRESPONSABLE AT BINABALUKTOT ANG KATOTOHANAN

ni Mercy Lejarde @Talkies | May 17, 2026

Photo: Sen. Jinggoy Estrada - FB

“Itago n’yo ‘yung CCTV,” ang naging pahayag ni Sen. Jinggoy Estrada matapos ang pamamaril sa Senado noong Mayo 13, 2026, na agad nag-viral sa social media.

Kasunod nito ay nagpahayag si Sen. Jinggoy ng kanyang saloobin upang linawin ang tunay na konteksto ng kanyang sinabi.

Nilinaw ni Sen. Jinggoy na ang ibig niyang sabihin ay itago o i-secure ang CCTV (Closed-Circuit Television) footage upang magsilbing mahalagang ebidensiya sa insidente ng pamamaril, at hindi para itago ito nang walang dahilan.

Saad ni Sen. Jinggoy, “Kung pagbabasehan ang real-time footage na kuha matapos ang shooting incident, malinaw na ang aking sinabi ay pagsang-ayon sa naging usapan na i-secure at pangalagaan ang CCTV footage na maaaring magsilbing mahalagang ebidensiya sa insidente ng pamamaril.

“Sa gitna ng kaguluhan, agarang ipinag-utos ni Senate President (SP) Alan Peter Cayetano ang pag-secure ng CCTV footage, habang maririnig din sa video ang pagtatanong ni Sen. Loren Legarda kung nahagip ng CCTV ang pangyayari. Ang konteksto ng usapan ay malinaw, direkta, at walang anumang bahid ng ibang kahulugan.

“Nakakalungkot na may ilang media outlets at online platforms na sadyang binaluktot ang aking pahayag upang lagyan ‘to ng malisya at maghasik ng maling interpretasyon sa publiko. Mariin kong kinokondena ang ganitong uri ng iresponsableng pamamahayag at tahasang pagbaluktot sa katotohanan para lamang makalikha ng intriga, ‘clicks’, at pansamantalang ingay sa social media.”

Samantala, sa isang bahagi ng post ni Sen. Jinggoy ay nanawagan siya sa lahat ng miyembro ng media na maging patas sa pamamahayag.

Saad ni Sen. Jinggoy, “I call on all members of the media to uphold the highest standards of fairness, accuracy, and professionalism. Journalism carries with it the solemn responsibility of presenting facts truthfully and in proper context. Hindi dapat gawing negosyo ang paninira, at lalong hindi dapat gawing libangan ang pagpapakalat ng maling impormasyon.”

So, ‘yun na!

---

SUNUD-SUNOD na makapigil-hiningang performances ang mapapanood sa engrandeng pagbubukas ng ASAP XP sa pangunguna ng global pop group na BINI at rock legend na si Bamboo ngayong Linggo (Mayo 17) sa panibago nitong timeslot na 5:30 PM sa ABS-CBN sa ALLTV2, A2Z, Kapamilya Channel, at iWant.

Isang engrandeng homecoming ang handog ng ASAP sa BINI sa kanilang kauna-unahang performance matapos ang kanilang Coachella stint. Makakasama ng BINI sa pangmalakasang opening number sina Martin Nievera, Gary Valenciano, Regine Velasquez-Alcasid, Zsa Zsa Padilla, Erik Santos, Angeline Quinto, Robi Domingo, Darren Espanto, Maymay Entrata, Kyle Echarri, Alexa Ilacad, Kai Montinola, Carmelle Collado, AC Bonifacio, Sofronio Vasquez, Jona, Klarisse De Guzman, Jason Dy, JM Dela Cerna, Marielle Montellano, Jeremy Glinoga, Khimo Gumatay, pati na ang MNRVS Ignite, Legit Status, at G-Force. 

Abangan din sa pasabog na opening number ang bagong theme song ng ASAP XP.

Malupit na energy ang mararamdaman ng manonood sa libreng mini-concert ni Bamboo kasama ang SPI.

Tuluy-tuloy ang selebrasyon sa pasabog na biritan ng new gen divas na sina Alexa, Kai, Esang de Torres, Carmelle, at Elha Nympha kasama ang power diva na si Angeline.

Samahan ang ASAP OG (original) na si Zsa Zsa na ipagdiwang ang kanyang kaarawan sa isang pangmalakasang birthday number kasama sina Alexa, Kai, Esang, Elha, at Carmelle.

Damhin naman ang kilig at kasiyahan sa party na dala ng Kapamilya love teams na sina Kai at Kyle, JM Ibarra at Fyang Smith, Alexa at Gelo Rivera, at Francine Diaz at Seth Fedelin.

Walang bibitaw dahil punumpuno rin ng kasiyahan ang kantahan nina Regine, Marko Rudio, JM Yosures, Khimo, at Reiven Umali. 

Magsisilbing hosts ngayong Linggo sina Martin, Robi, Darren, Kyle, at Alexa.

‘Yun lang, and I thank you.