Karateka De los Santos, 'di maawat sa 1st gold ng 2021

ni Gerard Peter - @Sports | January 31, 2021

Pambuwena-manong panalo ngayong taon ang ibinulsa ni dating national karateka Orencio James “OJ” De los Santos nang mapagwagian ang kampeonato sa katatapos lang na 2021 Sportsdata eTournament World Series #1 online competition.

Ito ang kauna-unahang gintong medalya ng kasalukuyang World No.1 online karateka para sa taong 2021, matapos ang matagumpay na pagsukbit ng kabuuang 36 gold medals noong 2020.

Winalis ng 30-anyos na dating 2017 Southeast Asian Games Individual kata bronze medalist ang mga kalaban mula France, Norway, Germany at South Africa para magsilbing motibasyon pa sa mga darating na online-virtual meet sa hinaharap.

“Winning my first gold in the most prestigious virtual karate tournament is a great motivator for me to start this year,” wika ng De La Salle University graduate sa panayam ng Bulgar sa online interview.

Unang sinipa nito sa kompetisyon si Frenchman Nicolas Perea sa iskor na 24.9-23 sa Round of 16, sabay sinunod na payukuin si Norwegian Cornelius Johnsen via 24.5-23.1 sa quarterfinals. Nilampaso naman nito sa semifinal match si Bayersicher Karate Bund E.V. representative Nawapon Pattanasakoo sa pamamagitan ng 24.6-23.8, habang kinumpleto nito ang championship match laban sa isa sa mahigpit na katunggali na si South African Silvio Cerone-Biagioni sa final score na 25.3-24.5.

Bago matapos ang 2020 ay nagawa pang kumana nito ng tatlong magkakasunod na Grand Winner Titles sa pamamagitan ng Katana International League #5 – Super Final, Golden League Karate E-Tournament #4 – Grand Final at E-Karate Games Grand Winner 2020.

Ilan sa mga naging kampeonato ng multi-titlist ng Philippine National Games (PNG) nung nakaraang taon ay ang Okinawa E-Tournament World Series #3, 3rd Dutch Open E-Tournament at Athlete’s E-Tournament, 3rd leg ng E-Champions Trophy Series, ang unang hat trick nito na ROME International ENDAS Karate Cup, 2nd Euro Grand Prix at E-Karate Games #3. Ang ika-26th titulo sa Venice Cup 2020 #3 E-kata Tournament ranked event-cash award, Katana Intercontinental Karate League E-Tournament #4 E-Kata Seniors male 16-years and older Top 8, 5th edition ng SportData eTournament World Series, at ang mga tagumpay sa Golden League Karate E-Tournament #3, E-Champions Trophy World Series 2, Okinawa, Nox Dojo Markham City Open eTournament at Athlete’s E-Tournament #2.

Korfball, inaasahang maging demo sports sa SEAG at maging bahagi ng NSA's

ni Gerard Peter - @Sports | January 29, 2021

Plano pang mas palawakin ang kaalaman ng mga Filipino hinggil sa bagong pampalakasan na sinusubukang ipakilala sa madla na may kaparehong istilo ng laro sa sport na maituturing na nangunguna sa bansa, ang basketball.

Isang laro na may pagkakatulad sa basketball at netball, ang larong Korfball ay naitatag sa bansa noong 2007 sa mga miyembrong binubuo ng mga estudyante at faculty members mula sa Institute of Physical Education and Athletics (IPEA) sa University of Santo Tomas.

Umaasa si Philippine Korfball Federation (PKF) President Asst. Prof. Rodrigo Sambuang Jr. na mapapabilang ang kanilang pampalakasan sa mga listahan ng national sports association (NSAs) sa bansa at makakakuha ng pagkilala sa Philippine Olympic Committee (POC) at sa Philippine Sports Commission (PSC) upang mas makatulong ito para mas palawakin at makilala ng husto ng mga Filipino ang kanilang pampalakasan.

“We’re trying to look for some support na sana maging under ang Korfball ng NSA which is our first step to be recognized first by the POC and PSC,” wika ni Sambuang, kahapon ng umaga sa TOPS: Usapang Sports Live on Sports on Air webcast. “Usually our founding comes from our own pocket. Tulong tulong muna kami to produce some budget to compete abroad, kaya we’re are currently looking for support and sponsors to fund our competitions abroad once na matapos na ‘yung pandemic,” dagdag ng sports official at professor sa UST sa porgramang suportado ng PSC, Philippine Amusement and Gaming Corporation (PAGCOR) at Games and Amusement Board (GAB).

Kasalukuyang nasa malayong posisyon na 45th sa buong mundo ang Pilipinas, na patuloy na pinamumunuan ng World No.1 Netherlands, kasama ang Belgium, Chinese Taipei, China, Germany at Portugal, habang ang kapitbahay nating Southeast Asian Games countries na Thailand Indonesia at Malaysia ay nasa ika-35th, 36th at 44th place, ayon sa pagkakasunod.

Bukod sa pagnanais na maging parte ng NSA, plano ring maitulak ng PKF, na opisyal na kinikilala ng pandaigdigang samahan nito na International Korfball Federation (IKF), ang makapasok sa UAAP, na nagsimula na bilang PE curriculum sa UST, gayundin ang pagpapakilala sa mga kolehiyo at unibersidad gaya ng Polytechnic University of the Philippines (PUP), Technological Institute of the Philippines (TIP), Philippine Normal University at mga lugar gaya ng Cavite, Quezon City at Zamboanga, habang nakapila na ring ilatag ito sa mga elementary at high schools bilang parte ng grassroots program sa oras na mawala na ang pandemic.

Bukas din sila sa posibilidad na makakuha ng mga atleta sa basketball, volleyball at football players na likas ng may talent, skills at tangkad na kinakailangan sa kanilang sports. Malaki rin umano ang tsansa na maging demonstration sport ang Korfball sa 33rd SEA Games sa Thailand na patuloy na itinutulak ng pinuno ng Korfball Association of Thailand na si Assoc. Prof. Dr. Supranee Kwaboonchan, kung saan inaasahang lalahok dito ang Pilipinas, Indonesia, Malaysia, Singapore, Vietnam, at host country na Thailand.

“We’re hoping na sana ma-include siya sa UAAP and I think we need to form 3-4 schools to start a demo. We’re in talks with different athletic directors sa mga university,” saad ni Sambuang, na tumatayo ring Athletic Moderator ng IPEA-UST. “With regards naman sa pag-push sa SEA Games ay very aggressive ang Thailand na mapasama bilang demo sport ito sa kanilang hosting sa SEA Games.”

Rigodong rematch nina Donaire, Rodriguez at Gaballo sa U.S.

ni Gerard Peter - @Sports | January 28, 2021

Pagpapatunay o Pagtatama? Pagpapanatili o Pagbabalik? Ito ang mga salitang kailangang hanapan ng solusyon ng apat na magkakaibang boksingerong may kinalaman sa isa’t isa.

Inatasan ng World Boxing Council (WBC) na magkaroon ng rematch sa pagitan nina interim bantamweight champion Reymart “Assassin” Gaballo at dating 118-pound titlist Emmanuel “Manny” Rodriguez ng Puerto Rico kasunod ng kontrobersyal 12-round split decision na ibinigay sa undefeated Filipino noong Disyembre 19, 2020 sa Connecticut, U.S.A.

Isang pagkakataon upang mapatunayan na karapat-dapat para sa 24-anyos mula Polomolok, South Cotabato-native ang nakuhang panalo, habang ang kagustuhang maitama ang pagkakamali umano ng dalawang huradong sina John Mackie at Don Trella na nagbigay ng 115-113 at 116-112 na iskor pabor kay Gaballo (24-0, 20KOs).

Nauna ng hiniling ng kampo ni Rodriguez (19-2, 12KOs) sa Mexico City-based group na muling pahintulutang maulit ang tapatang sa mga mata at pananaw ng Puerto Rican ay siguradong nanaig ito laban sa unbeaten Pinoy champ at malaki ang paniniwalang mula sa unang pitong rounds ay kanyang nakuha, habang naibulsa rin nito ang 9-12 rounds. “After a formal appeal was received by the WBC a committee of ring officials completed a thorough analysis and review of the match, resulting in the order of free negotiations for an immediate rematch between Gaballo and Rodríguez,” saad ng WBC sa inilabas na anunsyo nitong Lunes.

Binibigyan ng 30-araw ang dalawang panig para mag-usap sa mga itatakda para sa laban upang maiwasan ang ‘purse bid hearing.’

“Pag-uusapan pa lang namin ‘yung mga dapat gawin tungkol dito,” wika ni Sanman Promotions CEO JC Manangquil sa panayam ng Bulgar sa online interview.

Ang may tunay na nagmamay-ari naman ng titulo ng WBC bantamweight title na si Nordine Oubaali (17-0, 12KOs) ng France ay nahaharap naman sa responsibilidad na panatilihin ang kanyang titulo laban sa mandatory challenger na si four-division World titlist “Filipino Flash” Nonito Donaire Jr. na umaasang makakabalik sa rurok ng tagumpay sakaling maagaw ang kampeonato para sa kanilang title match na itinakda ng WBC sa Marso sa hindi pa nabanggit na eksaktong petsa at lugar.