Cheers at suporta ng Pinoy... Lakas ni Eala sa Dubai tilt

ni Gerard Arce @Sports | February 19, 2026

Photo: WTA / Alex Eala at Sorana Cirstea

Damang-dama ni Filipina tennis star Alexandra “Alex” Eala ang ibinibigay na lakas ng suporta ng mga Pinoy na isa sa kanyang naging sandalan upang makaabot sa round-of-16 at makakatapat si World No.32 Sorana Cirstea ng Romania ngayong umaga (oras sa Pilipinas) sa Dubai Tennis Championships sa Dubai Duty Free Tennis Stadium sa United Arab Emirates.

Muling nagpataob ng higher ranking ang 20-anyos na Pinay matapos pasukuin si World No. 45 Hailey Baptiste ng US sa round of 64 sa 6-4, 0-1, sunod nitong dinaig si World No.8 at No.6 seed Jasmine Paolini ng Italy sa bisa ng 6-1, 7(7)-6(5) kahapon ng umaga (oras sa Pilipinas). 

“I think today I came out on fire,” wika ni Eala matapos ang laro. “She’s a great opponent obviously being Top 10. To be able to compete with her at this level is a great achievement for me. She is an incredible fighter, to be sure, but I was very focused and I was able to maintain that throughout the whole match. Every time the opportunity arose, I tried my best to be brave and go for my ball.”

Kinakitaan naman ng mas matinding laban ang Italian tennis star pero muling narinig ang malakas ng cheer at palakpakan ng mga Pinoy sa tiebreak sa loob ng 5000-capacity na stadium para makakuha muli ng motibasyon sa laro.

Sunod na susubukang makalampas ng left-handed Pinay kontra Cirstea, na minsang tumalo rito noong 2024 Madrid Open sa bisa ng 2-6, 7-6, 4-6. Ang 35-anyos na Romanian ay minsan ng napagwagian ang WTA 1000 tournament noong 2024.

Sakaling manaig si Eala ay maaaring sunod na makatapat nito ang mananalo kina No.3 seed at World No. 4 Coco Gauff ng US, na nagwagi ng Grand Slam titles sa 2023 US Open at 2025 French Open, at World Doubles No.1 Elise Mertens ng Germany sa quarterfinals. 

Eala pasok na sa q'finals ng WTA, Sakatsume bigo

ni Gerard Arce @Sports | January 29, 2026

Photo: Ubos lakas na humampas sa bola si Pinay tennis ace Alex Eala upang gibain ang katunggaling si Himeno Sakatsume ng Japan sa ikalawang pagkakataon ng aksyon nila sa kasagsagan ng Philippine Women's Open WTA 125 125 na idinaraos sa Rizal Memorial Tennis Center. (Reymundo Nillama)

Iwinasiwas ni Pinay tennis ace Alex Eala si Japanese Himeno Sakatsume para makapasok sa quarterfinals ng WTA 125 Philippine Women's Open kagabi mula sa pagpapakita ng mahusay na laro sa Rizal Memorial Tennis Center, Manila.  

Sa harap ng napunong Center Court sa Rizal Memorial Center, bumira nang todo si Eala para masiguro ang 6-4, 6-0 na panalo. Nakaresbak ang 20-anyos na si Eala laban sa Japanese foe na tumalo rin sa kanya noong 2023 sa Osaka. Sunod na makasasagupa ni Eala si Camila Osorio ng Colombia sa quarterfinals.

Samantala, ginimbal ni World No. 174 Tatiana Prozorova ng Russia at patalsikin si top seed at World No.42 Tatjana Maria ng Germany sa pagtala ng 7-6 (2), 6-4 panalo sa round-of-16, habang umabante sa q'finals sina 2024 Paris Olympic silver medalists Donna Vekic ng Croatia at mga Southeast Asian tennis player na si Lanlana Tararudee.

Makokonsiderang pinakamataas na ranggo ang German player na si Maria sa lahat ng mga lumahok sa kauna-unahang WTA 125 sa Pilipinas, subalit tila mas nagamit ng mas batang Russian ang katatagan upang matakasan ang 38-anyos na tennis player.

Aminado si Prozorova na naging dikdikan ang kanilang laro ni Maria, kung saan nakita niyang nakaramdam ng mas mabigat na pressure ang German tennis player kaya’t naisakatuparan nito ang tagumpay. Sunod na makakatapat ni Prozorova si World No. 143 Sofia Costulas ng Belgium na tinalo sa round-of-16 si Ye-Xin Ma ng China sa 6-2, 6-4.

Pasok na rin sa quarterfinals ang Croatian tennis player at No. 4 seed Vekic na dinaig si Mariia Tkacheva ng Russia sa 6-1, 6-2 at nakatakdang makaharap si Lin Zhu ng China na tinalo si Mananchaya Sawangkaew ng Thailand sa 6-3, 7-6 (5).

YEAR END: Eala nagtala ng kasaysayan ngayong 2025

ni Gerard Arce @Sports | December 26, 2025

Photo: Alex Eala / IG

Naging makasaysayan ang 2025 para kay Filipina tennis ace Alexandra “Alex” Eala nang magwagi sa mga natatanging ukit sa kanyang karera mula sa mataas na puwesto sa World Rankings, unang Women’s Tennis Association title at pagbura sa 26-taong pagkagutom sa ginto sa Southeast Asian Games.

Matagumpay ang 20-anyos na left-handed sa World Rankings na No.50 noong Nobyembre upang maging kauna-unahang Pinay na nakapuwesto rito matapos ang maningning na pagsabak sa Miami Open semifinal round, pagpasok sa US Open, tungo sa kauna-unahang korona sa WTA.

Malayo sa no. 147 ang simula ng taon kay Eala pero trinabaho ang mga kompetisyon sa pagpasok sa qualifying rounds at paglahok sa WTA 125 events. Unang naka-entra sa Miami Open si Eala noong Marso para makapasok sa main draw sa WTA 1000 bilang wild card hanggang semifinals kasunod ng mga tagumpay sa tatlong Grand Slam champions na sina Jelena Ostapenko, Madison Keys at Iga Swiatek. "I'm in complete disbelief right now. I'm on cloud nine," wika ni Eala matapos talunin sa straight set si Swiatek. Siya rin ang unang Pinay na nakatuntong sa tour-level semifinals at unang manlalarong Pinay na nakapasok sa Top 100.

Nanalasa sa Eastbourne Open Finals at nagwagi ng 2025 Guadalajara WTA Open para sa unang women’s singles title matapos padapain si Panna Udvardy ng Hungary na nagtapos sa 1-6, 7-5, 6-3 sa finals sa Guadalajara 125 Open sa Panamerican Tennis Center sa Zapopan, Mexico. 

Matagal na hinintay ng 5-foot-9 Pinay left-handed ang pagkakataong makamtan ang tagumpay kasunod ng naudlot na pangarap sa nakadismayang runner-up finish sa Eastbourne Open tourney sa United Kingdom nitong Hunyo kontra Maya Joint ng Australia na nagtapos sa dikitang 4-6, 6-1, 6-7 (10-12).