ni Fr. Robert Reyes - @Patakbo-Takbo | September 13, 2020
Noong Biyernes, ika-11 ng Setyembre, binasa natin ang ebanghelyo mula kay Lucas 6:39-42.
“Tinanong sila ni Jesus nang patalinghago: maaari bang maging tagaakay ng bulag ang isa ring bulag? Kapwa sila mahuhulog sa hukay kapag ginawa ang gayun. Walang alagad na higit sa kanyang guro, ngunit kapag lubusang naturuan, siya’y magiging katulad ng kanyang guro.”
Maraming halimbawa ng mga bulag na namumuno sa mga nagdaang taon. At dahil sa mga bulag na namumuno na kayang pasunurin ang marami, napalalaganap nito ang kanyang ‘kabulagan’. Noong ika-3 ng Setyembre, inaprubahan ng 198 miyembro ng Kongreso ang House Bill 7137 o ang panukalang gawing Local Holiday ang ika-11 ng Setyembre, ang kaarawan ng dating diktador na si ex-P-Ferdinand Marcos.
Ayon kay Senate President Vicente ‘Tito’ Sotto III, hindi malayong maaprubahan ang ganitong panukala kung ito ay makarating sa Senado. Malinaw itong pagbabadyang gawin ding pambansang pagdiriwang ang kaarawan ng nasirang diktador.
Isa na namang nakalulungkot na pagtatangkang baguhin ang kasaysayan. Ginawa na nila ito noong payagang ilibing ang nasirang diktador sa Libingan ng mga Bayani. Meron kayang kaugnayan ang dalawang panukalang-batas?
Napakalinaw na ‘rebisyonismo’ (revisionism) ito. Ito ang pagbabago ng kasaysayan upang pagandahin ang ‘pangit’ o ituwid ang baluktot na katotohanan tungkol sa isang tao o pangyayari.
Paniguradong limpak-limpak na salapi ang iikot upang gawin ito. At sa pag-ikot nito, napakaraming masisilaw at mabubulag.
Naglabasan ang sari-saring pagbatikos sa HB 7137. Ang nakalulungkot, kakambal ng bulag ang bingi kaya’t hindi makita o marinig ng maraming mambabatas ang lantarang pagtutol at nakabibinging sigaw ng marami.
Maraming ang nagtataglay ng mga mata ngunit bulag. At maraming bulag na natuklasan ang liwanag ng katotohanan sa kanilang kalooban. Mula sa kanilang mulat na kalooban, nakikita, nauunawaan nila ang lahat.
Nakakalungkot na sa halip hanapin ng mga namumuno ng ating bansa ang tunay na guro na magtuturo at mag-aakay tungo sa katotohanan, patuloy ang kanilang pagkasilaw sa salapi at kapangyarihan. Sapat nang tumanggap sila ng salapi at kapangyarihan at walang kahirap-hirap na magbulag-bulagan, bingi-bingihan at pipipipihan.
Nakalulungkot isipin kung paano sa kabila ng matinding suliranin ng COVID-19, sa halip na makita nila ang tahilan sa kanilang mga mata, patuloy nilang pinag-iinitan ang mga walang halagang puwing sa mata ng iba.
Sa dami ng mga nagkasakit, namatay at tuluyang naghirap dahil sa pandemya, tuloy pa rin ang kababawan ng pagkasilaw at hibang na paghahanap sa salapi at kapangyarihan.
Nakalulungkot ang pagsunod ng marami sa mga bulag na namumuno. Kailan at paano darating ang araw ng pagsunod ng marami sa mulat at gising sa liwanag ng katotohanan? Idagdag pa natin ang pangatlong elemento, sino o sinu-sino ang aakay sa marami sa landas ng liwanag, katotohanan at kalayaan upang makalaya ang mga bulag na mamamayan at bulag na bansa… sa mga bulag na namumuno?