P114M Mega lotto, 'na-jackpot' ng negosyante mula Sto. Domingo Nueva Ecija

ni Fely Ng @Bulgarific | January 15, 2023

Hello, Bulgarians! Ang Bagong Taon ay nagdala ng suwerte sa isang negosyante mula sa Sto. Domingo, Nueva Ecija na nag-claim ng jackpot prize na P114,327,454.00 para sa Mega Lotto 6/45 na nilaro noong Disyembre 23, 2022, sa PCSO Main Office, Shaw Blvd., Mandaluyong City na may winning combination 11-21-01-12-17-03.

Ibinunyag ng bagong milyunaryo na siya ay naging regular na manlalaro ng lotto sa loob ng 15 taon at ang kanyang panalong kombinasyon ay binubuo ng kanyang mga paboritong numero. Nabanggit niya na ang kanyang mga naunang panalo ay hanggang sa apat na digit lamang at balik taya. “Lubos po akong nagpapasalamat sa PCSO at sa Panginoon sa pagkapanalo ko sa lotto. 'Di ko po inasahan na sa ganitong panahon ko mapapanalunan ang jackpot, tamang-tama magpapasko pa yun. Hindi ko po maipaliwanag ang aking nararamdaman”, sabi niya.

Ang nagwagi, na ginugol ang karamihan ng kanyang buhay sa negosyo ay nagplano na kung paano niya gagamitin ang kanyang napanalunan. “Sa totoo lang po, naging maayos naman po ang naging takbo ng buhay ko. Nakita ko ang pangangailangan ng aking mga kababayan at napagpasyahan ko po na unahing ipantulong ang makukuha kong premyo mula sa lotto. Ipagpapatuloy ko rin at palalaguin ang aking mga negosyo at syempre mag-iipon para sa kinabukasan ng aking pamilya”, pahayag pa niya.

Nagbigay din ito ng paalala at payo sa publiko na ipagpatuloy ang pagtangkilik sa mga laro ng PCSO. “Payo ko lang po sa mga katulad ko na tumatangkilik sa mga palaro ng PCSO ay ipagpatuloy lang ang kanilang pagtaya sa lotto dahil hindi natin alam kung kailan darating ang ating swerte. Ang bawat perang ginagamit natin sa pagtangkilik ng lotto ay napupunta din sa mga programa ng PCSO para sa mga nangangailangan nating kababayan”, dagdag pa niya.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

GSIS, voters' registration site na rin

ni Fely Ng @Bulgarific | January 14, 2023

Hello, Bulgarians! Ang punong tanggapan ng Government Service Insurance System (GSIS) sa Pasay ay isa na sa mga voters' registration sites para pilot implementation ng Register Anywhere Project (RAP) ng Commission on Elections (COMELEC). Isang memorandum of understanding sa pagtatalaga ng punong tanggapan ng GSIS bilang registration site ang nilagdaan nina GSIS President at General Manager Wick Veloso at COMELEC Chairman George Erwin Garcia sa GSIS Gymnasium sa Pasay kung saan nakatalaga ngayon ang RAP Team.

Ang voters’ registration sa GSIS ay magaganap sa GSIS Gymnasium, GSIS Office sa Pasay, simula Enero 13, at Enero 16 hanggang 20, mula alas-8: 00 ng umaga hanggang alas-5: 00 ng hapon, para sa mga nais magparehistro o ilipat ang kanilang voter registration sa kahit saang lugar sa Pilipinas.

“We fully support initiatives that make the services of the government convenient and accessible to our stakeholders. And RAP is definitely one of these worthwhile programs. We hope that through RAP, Filipinos who are not yet registered voters will take the first step to exercise their right to vote,” pahayag ni Veloso.

Bilang bahagi ng pilot implementation, ang COMELEC ay mag-aalok ng dalawang serbisyo sa ilalim ng RAP, ito ay unang beses na rehistrasyon ng botante at paglilipat ng rehistrasyon, kabilang ang paglilipat mula sa ibang bansa patungo sa lokal. Ang COMELEC ay tatanggap din ng mga aplikasyon mula sa mga kuwalipikadong aplikante na nakatira o pansamantalang naninirahan sa isang lokalidad kung saan matatagpuan ang RAP site at gustong marehistro o lumipat sa ibang lokalidad, kung saan sila ay permanenteng residente at nagbabalak bumoto sa darating na Barangay at Sangguniang Kabataan Election sa Oktubre 2023.

Ang mga aplikante ay maaaring mag-walk in at magsumite ng kanilang application form at photocopy ng isang (1) valid government-issued identification (ID) card kapag naipakita na ang orihinal na ID; kasunod ang pagkuha ng kanilang biometrics sa GSIS Gym sa nakatakdang petsa.

“We thank GSIS for being an avenue for COMELEC's RAP. We hope to achieve our objective of increasing the number of voters and avoid overcrowding at COMELEC offices for last-minute registrations. Applicants as young as 15 years old are encouraged to register and exercise their right to vote in the coming barangay and Sangguniang Kabataan elections,” saad ni Garcia.

Para sa mga aplikanteng naninirahan sa Pasay City District 1, ang mga aplikasyon para sa registration, transfer, reactivation, at correction of entries ay dapat matanggap sa Election Office ng Pasay City District 1 o sa kanilang satellite venues.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Kilalanin ang bagong President at CEO ng SSS

ni Fely Ng @Bulgarific | January 12, 2023

Hello, Bulgarians! Makabuluhang ginanap noong Enero 10, 2023 sa SSS Main Office, Quezon City ang SSS turnover ceremony ng dating Social Security System (SSS) President and CEO Michael G. Regino, kasama ang newly appointed Acting President and CEO Rolando L. Macasaet.

Sa kanyang mensahe, ipinahayag ni Regino ang kanyang suporta kay Acting President and CEO Macasaet at sa SSS, na hinihikayat silang magtakda ng mas mataas na pamantayan ng kahusayan para sa kapakinabangan ng mga manggagawang Pilipino.

Bilang tugon, kinilala ni Macasaet ang mga pagsisikap ni Regino na nagtulak na mas mapabuti ang SSS. Nangako siyang patuloy na bubuo ng landas upang mapaunlad ang institusyon, maghahanap ng mga bagong paraan para sa kabuuan na mapabuti ang institusyon, kabilang ang mga manggagawa nito at magdoble-sikap upang mabigyan ng makabuluhang proteksyon sa social security ang mga miyembro ng SSS at ang kanilang mga benepisaryo sa kasalukuyan at sa hinaharap.

Si Macasaet ang ika-20 Pangulo at CEO ng SSS. Siya na ngayon ang magiging responsable para sa pangkalahatang pagsasagawa ng mga pagpapatakbo at mga tungkulin sa pamamahala ng SSS, pagsasagawa ng mga programa nito at pagpapatupad ng mga patakaran ng Social Security Commission (SSC), ang pinakamataas na namumunong lupon at policy-making body ng SSS. Gayundin, gagampanan niya ang tungkulin bilang Vice-Chairperson ng SSC.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.