Bawas-singil sa kuryente

ni Mai Ancheta @News | July 11, 2023

Magbabawas ng singil sa kuryente ngayong Hulyo. Ayon kay Joe Zaldariaga, Meralco Corporate Communications Head, tatapyasan ng P 0.7213 kada kilowatt hour ang singil sa kuryente ngayong buwan kaya ang magiging overall rate sa bill ay lalabas na lang na P11.1899 per kilowatt hour.

Kung ang isang consumer ay kumukonsumo ng 200 kilowatt per hour kada buwan, lalabas na P144 ang mababawas sa bill ngayong Hulyo.

Sinabi ni Zalderiaga na bumaba ang singil sa generation charge ng 64 centavos kada kilowatt hour ngayong buwan, pangalawang straight na buwan na ito.

Mananatili ring suspendido hanggang Agosto ang pangungolekta ng feed-in tariff allowance kaya bumaba ang singil sa taxes charge ng Meralco.

Bawas-singil sa kuryente sa Hulyo

ni Gina Pleñago | June 30, 2023

Posibleng bumaba ang singil sa kuryente ngayong Hulyo.

Ayon sa Meralco, ito'y dahil tapos na ang tag-init at humihina na ang konsumo sa kuryente.

Bumaba na rin umano ang presyo ng kuryente sa spot market kumpara noong mga nakaraang buwan.

"May posibilidad na bumaba ang generation charge dahil lang noong June, nagsimula na ang tag-ulan at pangalawa, bumaba na ang presyo ng coal sa market, na inaasahan naming magre-reflect na sa billing ng aming suppliers," ani Meralco regulatory affairs head Ronald Valles.

Apela sa mga kumpanya ng kuryente.. Bill deposit, ibalik sa konsyumer

ni Mylene Alfonso | June 9, 2023

Pinuri ni Iloilo Rep. Jam Baronda ang naging inisyatibo ng More Electric and Power Corporation (More Power) na kusang ibalik sa mga customers nito ang kanilang bill deposit na hindi karaniwang ginagawa ng mga Distribution Utilities (DUs).

Ang bill deposit ang paunang binabayad ng mga customer sa pag-a-apply ng linya ng kuryente.

Alinsunod sa Article 7 ng Magna Carta for Residential Electric Consumers, may obligasyon ang mga DU na isauli ito kung sa loob ng tatlong taon ay nagbabayad sa oras at hindi naputulan ng kuryente ang isang customer.

Gayunpaman, sa probisyon ng batas ay hindi ito kusang ibinibigay ng mga DU bagkus ay kailangan na i-apply ang bill deposit refund mismo ng mga customers.

Kaugnay nito, hinimok ni Baronda ang iba pang DUs na gayahin ang pinasimulan ng More Power na hindi na naghintay na magsumite pa ng aplikasyon ang kanilang mga customers bagkus sila mismo ang tumawag sa mga “eligible customers” at pinapunta sa kanilang tanggapan para tanggapin ang refund.

Sinabi ni Baronda na may oversight power ang Kamara para silipin kung nakakasunod ang mga DUs sa pagpapatupad ng bill deposit refund.

Una nang sinabi ni More Power President at CEO Roel Castro na nasa P5 million bill deposit refund ang nakatakda nilang isauli ngayong taon sa mga eligible customers na nagbabayad sa tamang oras.

Samantala, pumasok na sa isang joint venture agreement ang More Power sa pamamagitan ng subsidiary nito na Primelectric Holdings, Inc. para sa pagpapalakas ng supply ng kuryente sa lalawigan ng Negros.