Kulong, multa sa lalabag — DOE... Rollback at price hike sa langis, may limit na

ni Mylene Alfonso @News | April 21, 2026

Photo: File

Obligado na ang mga kumpanya ng langis na sumunod sa minimum at maximum na halaga na itatakda ng gobyerno hinggil sa pagbabago sa presyo ng mga produktong petrolyo sa gitna ng idineklarang state of national energy emergency.

Sa press briefing, sinabi ni Energy Secretary Sharon Garin na ipinatupad ang naturang polisiya matapos lagdaan ni Pangulong Ferdinand “Bongbong” Marcos Jr. ang Executive Order No. 110, na nagdedeklara ng state of national energy emergency.

“Because of that declaration, it triggered the additional powers from government to prescribe the price. Hindi tayo nagka-cap sa presyo mismo, pero kina-cap natin ‘yung adjustments,” pahayag ni Garin.

“So under that issuance, DOE is now subscribing the price increase limitation. May limit na tayo, may minimum na tayo rollback tapos may maximum din tayo sa price increase. So both ways,” ayon sa kalihim.

Nabatid na ilang kumpanya ng langis ang nag-anunsyo na magbabawas sila ng presyo kada litro ng diesel ng P24.94 at ng gasolina ng P3.41.

Babawasan din ang presyo ng kerosene ng P2.00 kada litro ngayong araw.

Dagdag pa ni Garin na kailangang sumunod ang iba pang lokal na kumpanya ng langis sa itinakdang price adjustments ng Department of Energy (DOE).

“‘Pag rollback siya, dapat kung P24.94 ‘yan dapat ‘yung rollback will be equal or more than the P24.94. So pwede siyang maging P25, pwede siyang maging P26, pero hindi siya pwedeng P20 lang. So kailangan sundan ng oil companies.”

“Pero ‘pag increase siya, ‘pag sinabi ng DOE na P10 lang halimbawa ang increase, hindi pwedeng sumobra,” diin pa niya.

Kaugnay nito, ang sinumang lalabag ay maaari umanong maharap sa kaso at multa.

Matatandaang hinikayat ni Marcos ang mga kumpanya ng langis na ipatupad nang buo at agad ang rollback sa presyo ng diesel at gasolina, kasabay ng inaasahang malaking bawas sa presyo sa mga gasolinahan.

Hubaran ng maskara ang umano’y sabwatan sa DOE at oil companies

ni Pablo Hernandez @Prangkahan | April 13, 2026

PAGTALAGA KAY MAYOR BASTE DUTERTE BILANG PDP-LABAN, MASAMANG PANGITAIN SA MARCOS ADMIN KASI MALAMANG SIYA ANG LUMABAN SA PAGKA-PRESIDENTE ‘PAG NA-IMPEACH SI VP SARA – Pormal nang itinalaga si Davao City Mayor Sebastian “Baste” Duterte bilang bagong pangulo ng PDP-Laban, habang ang kanyang amang si dating Pangulong Rodrigo Roa Duterte ay nananatiling chairman emeritus ng partido.

Ang naturang hakbang ay itinuturing na mahalagang pagbabago sa liderato ng PDP-Laban, kasabay ng patuloy na paghubog ng direksyon ng partido para sa mga susunod na halalan.

May mga nagsasabing maaari itong magbukas ng panibagong dinamika sa pulitika sa bansa, lalo na sa mga susunod na eleksyon, ngunit sa ngayon ay wala pang pormal na pahayag na nag-uugnay dito sa anumang partikular na planong elektoral sa 2028. Period!

XXX

MGA PROPAGANDISTA NG MARCOS ADMIN, TINATALO NG MGA FAKE NEWS VLOGGERS SA SOCIAL MEDIA – Humihingi ng tulong ang Presidential Communications Office (PCO) sa Meta, ang kumpanyang nagpapatakbo ng Facebook, upang makatulong sa pag-alis at pag-block ng mga pekeng balita na kumakalat laban kay Pangulong Ferdinand “Bongbong” Marcos Jr. at sa Malacañang.

Ayon sa PCO, layunin nitong mapigilan ang pagkalat ng disinformation sa social media at maprotektahan ang publiko mula sa maling impormasyon. Boom!

XXX

HUBARAN NG MASKARA ANG MGA BUWAYA SA DEPT. OF ENERGY – Nais ni Manila 2nd District Rep. Rolan Valeriano na imbestigahan ng Kamara ang umano’y sabwatan ng Department of Energy (DOE) at mga kumpanya ng langis.

Ayon kay Valeriano, may sapat pa umanong stock ng krudo ang mga oil company bago sumiklab ang tensyon sa Middle East, ngunit agad silang nagtaas ng presyo kinabukasan matapos ang giyera. Aniya, nakapagtataka rin na tila walang naging malinaw na aksyon ang DOE sa naturang pagtaas.

Dagdag pa ng kongresista, sa kasalukuyan ay bumababa ang presyo ng langis sa international market kasunod ng ceasefire sa pagitan ng Estados Unidos at Iran, ngunit hindi pa rin agad nagre-rollback ang mga kumpanya ng langis sa bansa. Kung may bawas man, aniya, ito ay minimal lamang kumpara sa inaasahang pagbaba ng presyo.

Hinihiling ngayon ni Valeriano ang agarang pag-apruba ng Speaker sa isinusulong na imbestigasyon upang matukoy ang katotohanan sa isyu. Period!

XXX

DAPAT ‘WAG LANG SA SMUGGLED YOSI MAGPAPABIDA ANG CUSTOMS, MAGPABIDA RIN SILA SA PAGKUMPISKA NG MGA SMUGGLED AGRI-PRODUCTS – Panay pabida ang Bureau of Customs (BOC) sa mga nakukumpiska nitong mga smuggled na sigarilyo.

Sana, ipagpatuloy din ni Customs Commissioner Ariel Nepomuceno ang mas mahigpit na kampanya laban sa mga smuggled na produktong agrikultural na sinasabing may kinalaman kina “Gerry T.” at “Leah C.” Mas mahalaga ang mga ito dahil maaari pa sanang ipamahagi sa mga mahihirap, lalo na sa gitna ng kasalukuyang krisis, kumpara sa mga sigarilyo na hindi naman maaaring ipamigay sa publiko.

Sa ganitong paraan, mas magiging kapaki-pakinabang ang mga nakukumpiskang produkto para sa mga mamamayan. Boom!

US at Iran ceasefire na, krudo sa world market bumaba... Taas-presyo, tuloy pa rin — DOE

ni Mylene Alfonso @News | April 9, 2026

Photo: Sharon S. Garin - Department of Energy

Naniniwala si Department of Energy (DOE) Secretary Sharon Garin na mahirap pa rin matukoy kung paano maaapektuhan ng inanunsyong tigil-putukan sa pagitan ng Estados Unidos at Iran ang pandaigdigan at lokal na presyo ng langis.

“I think the problem will stay longer than the war itself. If it ever goes down to P100 or below, it will take some time,” pahayag ni Garin sa pagdinig ng House ways and means committee.

“We don’t have visibility where this will go,” sabi ni Garin kung saan hindi rin niya inaalis ang posibilidad na umabot sa P200 kada litro ang presyo ng gasolina.

Ayon sa DOE briefer na ipinamahagi sa mga miyembro ng komite, may inilatag na senaryo—na posibleng tinatayang 40% kung saan maaaring bumaba ang presyo ng diesel sa P90-P105 kada litro, at ang gasolina sa P72-P82 kada litro, kung magkakaroon ng tigil-putukan at bahagyang muling mabubuksan ang Strait of Hormuz.

Gayunpaman, hindi ipinakita ng DOE ang mga slide sa naturang pagdinig.

“Today, there was an announcement of [a] two-week ceasefire but anything can happen. Supply can go up – it’s beyond our control – or it can go down; the war can escalate or de-escalate,” wika ni Garin sa kanyang presentasyon. 

Agad namang bumaba ang presyo ng krudo sa world market matapos ianunsyo ang nasabing dalawang linggong ceasefire. Mula sa dating mataas na presyo dahil sa banta ng giyera, bumaba ang West Texas Intermediate (WTI) crude ng halos 9% patungong $91.64 kada bariles dahil sa pag-asang magiging normal na muli ang daloy ng suplay ng langis sa Strait of Hormuz.

Ayon sa mga analyst, asahang magiging pabagu-bago pa ang presyo habang naghihintay ang mga negosyante sa pormal na pag-uusap ng dalawang bansa sa Abril 10. 

Samantala, inihayag ni Pangulong Ferdinand Marcos, Jr. na sasamantalahin ng Pilipinas ang dalawang linggong tigil-putukan sa pagitan ng Estados Unidos at Iran upang matiyak ang suplay ng langis, mapababa ang presyo ng produktong petrolyo sa bansa at maging ang kaligtasan ng mga Pilipinong seafarer.

Sinabi ni Marcos na ang muling pagbubukas ng Strait of Hormuz ay magpapahintulot sa mga naipit na sasakyang pandagat na makabiyahe, magbibigay-daan sa pagdaan ng mga kargamento ng langis, at magpapatupad sa kasunduan ng bansa at Iran para sa mga Philippine-flagged vessels.

Ayon pa kay Marcos, layunin ng pamahalaan na palakasin ang suplay ng petrolyo sa panahong ito, bagama’t ang anumang pagbaba ng presyo ng langis ay maaaring nakadepende kung mapapalawig ang tigil-putukan.

“Kung kasama sa agreement na nabubuksan ang Strait of Hormuz… magagawa nila 'yung kanilang trabaho,” ani Marcos.

“We will take full advantage of the two weeks to increase our supply as much as possible,” wika ng Pangulo.

Umaasa rin ang Chief Executive na magtutuluy-tuloy ang tigil-putukan kung magiging maayos ang negosasyon dahil hangad ng lahat ng panig na matapos na ang kaguluhan.

“We are all hoping and praying that the two-week ceasefire will extend further,” hirit ng Pangulo.

Samantala, sinabi ni Marcos na posibleng makaapekto ang ceasefire sa pagbaba ng presyo ng langis, bagama't aminado siyang maaaring hindi sapat ang dalawang linggo upang agad itong maramdaman dahil sa pabagu-bagong sitwasyon ng merkado.

Kung magpapatuloy naman aniya ang tigil-putukan at gaganda ang sitwasyon, inaasahang susunod din ang pagbaba ng presyo ng petrolyo.