Dengue cases, tumaas

ni Mai Ancheta | June 6, 2023

Umabot na sa halos 1,000 ang naitalang kaso ng dengue sa Quezon City mula Enero hanggang Mayo 27.

Ito ang inihayag ng Quezon City Epidemiology and Surveillance Unit sa harap ng patuloy na pagtaas ng bilang ng mga tinatamaan ng nabanggit na sakit, partikular na sa mga bata.

Batay sa record ng CESU, mayroon ng 917 na kaso ng dengue, tumaas ito ng 100.22 %, kumpara sa naitalang kaso noong nakalipas na taon na 459.

Lumitaw sa record ng city government na ang District 4 ang may pinakamaraming record na umabot sa 212, at ang pinakamababa ay District 2 na 97 kaso.

Isa lamang ang naitalang namatay sa lungsod dahil sa dengue.

Ngayong tumataas na ang bilang ng mga kaso… Mga dapat kainin at inumin kapag na-dengue, alamin!

ni Mharose Almirañez | July 17, 2022

Laganap na naman ang dengue ngayong tag-ulan. Ready ka na ba?

Batay sa datos ng Department of Health (DOH), umabot na sa 64,797 dengue cases ang naitala sa bansa mula Enero 1 hanggang Hunyo 25, 2022, at tinatayang may 90% increase sa bilang ng mga kaso kumpara sa naitala noong nakaraang taon. Bagay na talaga namang nakakaalarma dahil ilang indibidwal na ngayon ang ina-admit sa mga ospital.

Una nang ipinaalala ng DOH sa publiko na i-practice ang tinatawag na “4S behavior” para labanan ang dengue, kabilang dito ang Search and destroy breeding places; Secure self-protection; Seek early consultation; at Support fogging o spraying in hotspot areas.

Dagdag pa rito, ang dengue ay may 4 stages, kaya bago pa tuluyang umabot sa pinakamalalang stage, sundin ang mga sumusunod na payo, mula sa isang dengue survivor:

1. UMINOM NG MARAMING TUBIG. Isa ito sa mga paraan upang mapataas ang platelet count at maging hydrated. Mainam ding uminom ng electrolyte drinks tulad ng Pocari Sweat at Gatorade dahil bukod sa nakakatanggal ng uhaw, nakatutulong din itong marekober ang nawalang fluids at electrolytes sa katawan. Iwasan ang mga inuming nakaka-dehydrate kabilang ang tsaa, kape, mga alak at softdrinks.

2. KUMAIN NG PRUTAS. Nakakatulong ang watery fruits, partikular na ang pakwan dahil may taglay itong sustansya na nakakapag-replenish ng lost fluids at nakaka-detoxify ng katawan. Isama na rin ang mga prutas na mayaman sa Vitamin C tulad ng dalandan, ponkan at lemon.

3. UMINOM NG WASTONG GAMOT. Para sa lagnat at pananakit ng kasukasuan, uminom ng mga gamot na may generic name na paracetamol. Iwasan ang mga gamot na ibuprofen, aspirin at mefenamic na puwedeng magpalala ng pagdurugo. Kung nagkakaroon ng pagdurugo, mga pasa o pamamaga habang nagpapagaling mula sa dengue fever, makipag-ugnayan agad sa iyong doktor o nars. Isa sa rekomendasyon ng doktor ang multivitamins dahil may sapat itong bitamina na angkop sa katawan upang mas mabilis makarekober.

4. KUMAIN NG GULAY. Kung magkakaroon ng marahas na pagbaba sa bilang ng platelet, nakatutulong ang mga pagkaing mayaman sa antioxidant, mineral at Vitamin K, partikular na ang broccoli upang ma-regenerate ang platelets.

5. IWASAN ANG FATTY FOODS. Tandaang hindi lamang immune system ang inaatake ng dengue kundi pati na rin ang atay. Pinapataas ng dengue ang liver enzymes ng isang pasyente, lalo’t binibigyan din siya ng iba’t ibang medikasyon, kaya hangga’t maaari ay iwasan muna ang fatty foods.

6. KUMAIN NG ITLOG NG PUGO. Mayaman ito sa protein, Vitamins A at D, at antioxidants. Advisable itong kainin ng mga na-dengue.

Ngayong alam mo na ang mga dapat kainin at inumin tuwing may dengue, ibahagi mo na rin ito sa kilala mong nagpapagaling mula sa naturang sakit.

‘Ika nga, karaniwang sakit na ang dengue at kadalasang tumataas ang bilang ng mga kaso nito tuwing tag-ulan, kaya naman panatilihing malinis ang kapaligiran.

Okie?

Higit 51K, naitala.. Dengue cases, nakaaalarma na — Atienza

ni Lolet Abania | July 4, 2022

Naging nakababahala na ang mga naitatalang bilang ng mga dengue cases sa Pilipinas, ayon kay dating Philippine Medical Association (PMA) President Benito Atienza ngayong Lunes.

“Yes, dapat tayo ma-alarma,” sabi ni Atienza sa Laging Handa briefing. Ito ang tugon ni Atienza nang tanungin tungkol sa 51,622 dengue cases na nai-record mula Enero 1 hanggang Hunyo 18, 2022, kung saan ayon sa Department of Health (DOH) 58% na mas mataas ito kumpara sa mga kaso na nai-report sa parehong panahon noong nakaraang taon na 32,610 cases.

Ayon kay Atienza, mas maraming tao naman ang namamatay sa dengue kaysa sa COVID-19 sa Singapore. “Kaya dapat po tayong mag-ingat ngayon… dapat po tayong mabahala kung ating mga anak o kahit po matanda, kahit nurse, kahit sino po, ay pwedeng mag-dengue sa panahon ngayon,” ani Atienza.

“At saka lagi po natin tandaan na wala pong pinipili ang dengue sa edad kahit po six months lang, meron po kami gano’n,” saad pa niya. Nagbabala rin si Atienza sa publiko laban sa mga water-borne diseases, influenza, at leptospirosis.

Patuloy naman ang paalala ng Department of Health (DOH) sa publiko na sumunod at isagawa ang 4S strategy na search and destroy breeding sites; secure self-protection measures; seek early consultation, at support fogging or spraying in hotspot areas.