4 Malaysian, timbog sa pagpatay sa kasama

ni Janice Baricuatro @News | August 1, 2026

Photo: File

Arestado ang apat na Malaysian national na umano’y sangkot sa brutal na pagpatay sa kanilang kasamahan na natagpuang duguan at tadtad ng saksak sa Sitio Ilayang Pulo, Brgy. Iba, Silang, Cavite.

Ayon sa imbestigasyon, matapos ang pananaksak ay tumakas ang mga suspek sakay ng Toyota Fortuner ngunit nahulog umano ang sasakyan sa kanal, kaya iniwan nila ito. Sumakay sila ng tricycle at nag-book umano ng Grab patungong Pasay City upang makatakas. 

Natunton sila ng pulisya sa tulong ng CCTV footage, pagkilala ng tricycle driver, at pakikipag-ugnayan sa Pasay City Police.

Inamin umano ng mga suspek ang kanilang pagkakasangkot sa krimen. 

Lumabas din sa paunang imbestigasyon na posibleng nasa impluwensya ng ilegal na droga ang mga ito nang gawin ang pananaksak.

Pares vendor pinagsasaksak ng kostumer, dedbol

ni Levi Gonzales @News | July 27, 2026

Photo: Batangas City Police Station - Circulated

Patay ang isang pares vendor matapos na umano'y pagsasaksakin ng hindi pa nakikilalang suspek sa Brgy. Tinga Labak, Batangas City.

Kinilala ang biktima na si “Anthony,” nasa hustong gulang, binata, tubong Mabini, Batangas at residente ng Brgy. Santa Rita Karsada, Batangas City.

Batay sa paunang imbestigasyon, nagtitinda ng pares ang biktima nang lapitan ng ilang kalalakihan na umorder ng pagkain. Matapos kumain, nagreklamo umano ang mga ito dahil wala umanong karne ang inihain na nauwi sa pagtatalo.

Sa kasagsagan ng komprontasyon, isa sa mga suspek ang umano'y bumunot ng balisong at ipinagsasaksak ang biktima na kanyang ikinasawi.

Patuloy ang imbestigasyon upang maaresto ang suspek.

19-anyos na student leader, kinatay sa inuman

ni Jeff Tumbado @News | July 17, 2026

Photo: File

Patay ang isang 19-anyos na estudyante matapos pagsasaksakin ng edad 23 na lalaki rin sa kalagitnaan ng inuman sa Cagayan, madaling-araw ng Miyerkules.

Kinilala ang biktima na si Zanter Troy Dela Cruz Soriano, student leader at miyembro ng Boys of M3 Cagayan Valley Zone Skating Team.

Ang suspek naman ay si Vincent Danga, ng Iguig, Cagayan.

Nagkakasiyahan ang biktima at suspek kasama ang ilang kalalakihan sa bahay ng isang kaibigan sa Atulayan Norte nang magkaroon ng pagtatalo ang dalawa na nauwi sa rambulan.

Sa gitna ng kaguluhan, dito na pinagsasaksak ni Danga ang biktima.

Mabilis na tumakas ang suspek sakay ng motorsiklo ngunit naaresto rin makalipas ang ilang oras sa bayan ng Iguig.

Isinugod naman si Soriano sa San Raphael Hospital ngunit idineklara siyang dead-on-arrival.

Sinampahan na ng pulisya ng kasong murder ang suspek.