Iskandalo sa EDSA busway, huwag na sanang maulit

ni Bong Revilla @Anak ng Teteng | November 20, 2023

Ilang araw na ang nagdaan simula nang makaladkad ang ating pangalan sa walang kakuwenta-kuwentang iskandalo na ang layunin lang naman ay makalusot sa traffic violation ngunit dahil sa halal tayong opisyal ay tila sunog na naglagablab ang balita.

Kung tutuusin ay wala namang ibang grabeng naapektuhan sa pangyayaring ito kung hindi ako na nananahimik at nakatutok sa ating trabaho bilang senador dahil panahon nga ng budget hearing at sinisikap itong matapos bago magwakas ang taon.

Kaya lang, may umiiral ngang kasabihan na kung bubuwenasin o mamalasin ka, kahit natutulog ka ay mangyayari. At may isa pang kasabihan na lahat ng bagay na nangyayari sa mundo ay may dahilan at positibong patutunguhan.

Inaamin ko na labis akong nainis nang gisingin ako nang maagang-maaga ng aking staff sa pamamagitan ng tawag sa telepono para sabihin lang na pinuputakte na ang ako sa social media, radio at telebisyon dahil nga sa nahuli raw akong dumaan sa EDSA carousel busway.

Sino ba naman ang hindi magagalit na isang senador na tulad ko pa ang pasimuno ng pasaway na dapat ay nangunguna sa pagsunod sa mga umiiral na batas. Mabuti na lamang at ito ay FAKE NEWS.

Ang masakit lang, nagising ‘yung mga regular nating basher na mula sa grupo ng mga trolls na kalaban natin sa pulitika at nagkaroon sila ng materyales para banatan na naman ako — hanggang ngayon ay pinalalabas pa nilang ako pa ang mali sa nangyaring ito.

Napakadali naman kasing baligtarin ng mga pangyayari lalo na sa social media na kayang iliko ang mga datalye tulad ng nangyaring suspensyon kay Metro Manila Development Authority (MMDA) Task Force Special Operations Unit Head Col. Bong Nebrija.

Nais kong linawin na hindi ako ang nagsuspinde kay Nebrija at hindi ko rin hiniling na suspendihin siya dahil sa kanyang pagmamalabis sa kanyang trabaho.

Ang nais ko lang ng mga panahong iyon ay ipaliwanag ng MMDA sa tao na hindi ako ang nahuling dumaan sa EDSA busway dahil nag-aalala rin ako sa sasabihin ng aking asawa na baka pagdudahan akong umaalis ng madaling-araw at kung saan-saan ako nagpupunta.

Mabuti na lamang at magkatabi kaming matulog kaya hindi ko na kinailangang magpaliwanag.

Kumbaga, kaladkad na ako sa publiko, kaladkad pa ako hindi lang sa pamilya ko, pati malalapit kong kaibigan ay nagtatawagan at lahat nanghihingi ng update. Ganyan katindi ang naging epekto ng napakasimpleng problema na hindi sana nangyari kung agad inaresto ng MMDA ‘yung mga impostor na nagpakilalang lulan daw ako ng minamaneho nilang sasakyan.

Ang masakit pa, nadamay na tayo, pero parang kontrabida pa tayo sa ilan nating kababayan, dahil sa senador daw ako kaya nasuspinde si Nebrija na ngayon ay kinakaawaan pa ng ilang hindi nakakaintindi na wala naman tayong kinalaman.

Ang totoo, matapos pumutok ang balita ay tumawag sa akin si MMDA Chairman Don Artes at nagtungo sa Senado kasama ang kanyang tauhan na si Nebrija kinahapunan at humingi ng pasensya sa kanilang pagkukulang sa harap mismo ng media.

Ang hirap lang, itong si Nebrija sa kabila ng paghingi ng paumanhin ay iba naman ang inaasta sa social media. Bahala na siya. Alam niya ang totoo!

Ang katunayan ay marami ang nagsasabi sa akin na panahon ngayon ng budget deliberation at tapyasin ko raw ang budget ng MMDA, pero hindi ako nakinig dahil sa hindi kailangang magdusa ang buong ahensya dahil lang sa pagkakamali ng iilan.

Pursigido pa rin tayo na lalo pang palakasin ang MMDA upang hindi na mangyari pa ang mga tulad nito sa mga susunod na panahon at may isang makakaladkad ang pangalan sa pang-aabuso kahit wala namang katotohanan.

Pero sa huli, kahit masyado tayong naagrabyado sa iskandalong ito ay hindi ko na tinitingnan ang masamang epekto nito dahil nagbunga naman nang mabuti ang lahat dahil natuklasan natin na mayroon palang namimili kung sino lang ang dapat hulihin, na imbes automatic na tiketan ay itatawag pa sa kanya.

Ito ang pinakamalaking leksyon, na kahit iniisip niyang siya ang may kapangyarihan, hindi tamang ganu’n at dapat na ipatupad ang batas nang pantay-pantay.

Pangalawa ay nakatulong tayo para mapalakas ang kampanya ng MMDA na huwag dumaan ang mga hindi awtorisadong sasakyan sa EDSA busway at dapat pantay-pantay talaga ang pagtrato sa lahat ng motorista, kahit opisyal kapag hindi awtorisado ay dapat tiketan.

Ganyan din naman ang pagtrato ni Artes sa kanyang mga tauhan kaya nga niya isinuspinde si Nebrija, hindi dahil sa kumalat na fake news kung hindi dahil sa may pinapalusot pala itong mga government official dahil sa pakikisama at ngayon lang nadiskubre.

Ngayong sumuko na ang dalawang salarin ay maliwanag na ang lahat, tama lang na pagmultahin sila ng MMDA sa nagawa nilang paglabag.

Hinggil sa tanong na kung sasampahan ko ba ng kaso ang dalawang driver na gumamit ng pangalan ko -- bahala na kung ano ang makabubuti sa lahat!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

MMDA, dapat pantay-pantay ang trato sa mga motorista, walang VIP!

ni Bong Revilla @Anak ng Teteng | November 17, 2023

Sirang-sira ang araw ko noong Miyerkules ng umaga nang gisingin ako ng isa sa aking staff ng maagang-maaga gamit ang telepono para lamang sabihing pinuputakte na ako sa social media at iba’t ibang istasyon ng radyo at telebisyon.

Pinagpipistahan na pala ako dahil sa ulat na hinuli raw ako sa paggamit ng EDSA carousel busway na mahigpit na ipinagbabawal at dahil sa senador ako ay tila napakaabusado ng aking dating dahil pinalusot daw ako. Talaga namang magagalit ang publiko sa balitang ito, kaya lang ‘FAKE NEWS’.

Ang hirap maging biktima ng mga ganitong balita na wala namang katotohanan at ito ay dahil lang sa iresponsableng pagganap sa tungkulin ng isang MMDA enforcer na nagbigay ng pahayag kahit hindi niya sigurado ang sinasabi.

Nakakalungkot lang dahil noong nakaraang Martes ay maghapon at magdamag kaming dumalo sa budget hearing sa Senado at inabot kami ng alas-2 na ng madaling-araw kinabukasan -- bale Miyerkules na kaya umaga na akong nakauwi sa amin sa Bacoor.

Ibig sabihin, natulog lang ako at paggising ko ng umaga ng Miyerkules ay ambigat na ng kinakaharap kong problema dahil galit na galit na sa akin ang mga tao na nakaalam ng balita na ako raw ay dumaan ng EDSA busway.

Naalimpungatan ako dahil hindi naman nangyari ang lahat ng ito kasi nga tulog na tulog ako ng panahong ‘yan dahil puyat nga kami sa budget hearing kaya hindi ko maisip kung paano lumaki ang istorya.

‘Yun pala ang salarin ay itong si Metro Manila Development Authority (MMDA) Task Force Special Operations Unit Head Col. Bong Nebrija na siyang pinagmulan ng walang katotohanang kuwento na ayon sa kanya ay hindi naman niya akalaing kakalat sa media.

Kaya heto dahil sa kanya, hanggang ngayon ay tuloy pa rin ang upak sa akin, pero okay lang dahil hindi naman totoo.

Dahil sa matinding epekto ng balita ay mariin nating itinanggi ang wala namang katotohanang pangyayari nang kapanayamin tayo ng media lalo pa’t napakaiinit ng usapin tungkol sa EDSA busway na halos araw-araw ay may mga nasasakoteng pasaway na government employee at ang iba ay kaanib pa ng Philippine National Police (PNP).

Matatandaan na inanunsyo ng MMDA na itataas na ang multa sa sinumang hindi awtorisadong daraan sa EDSA busway na mahuhuli upang matakot umano ang pasaway na motorista na paulit-ulit sa paglabag.

Nagkasundo na umano ang Metro Manila Council (MMC) at naglabas ng resolusyon na P5,000 ang ipapataw na multa sa first offense; sa second offense ay multang P10,000, isang buwan na suspensyon ng driver’s license, at pagdalo ng road safety seminar.

Nasa P20,000 naman sa third offense, na may kasamang isang taong suspensyon ng driver’s license at P30,000 na penalty naman sa fourth offense, bukod pa sa rekomendasyon ng LTO na i-revoke ang lisensya ng driver.

Noong Nobyembre 13, sinubukan ng MMDA kung epektibo ang pagtataas ng multa sa mga lumalabag na dumaan sa EDSA busway ngunit ang resulta ay mahigit umano sa 300 pasaway na motorista ang nahuli sa bahagi ng Megamall sa Mandaluyong City.

Limang pulis, isang kawani ng Philippine Atmospheric Geophysical and Astronomical Services Administration (PAGASA) at isang empleyado mismo ng MMDA ang kabilang sa mga nahuling pasaway na lahat ay inisyuhan ng violation ticket.

Kaya sobrang tindi ng galit ng tao nang mapabalitang pati tayo ay nagpasaway sa paggamit ng EDSA busway ngunit hindi tayo tinuluyan dahil isa tayong senador.

Nakarating sa tanggapan ng MMDA ang naging reaksyon natin kaya nag-abiso itong si MMDA Chairman Don Artes at kanyang tauhan na si Nebrija na agad namang nagtungo sa Senado noong Miyerkules ng hapon para humingi ng pasensya sa kanilang pagkukulang.

Sa harap ng media ay inamin ni Nebrija ang pagkakamali dahil tawag lamang umano ng isa sa kanyang enforcer ang kanyang natanggap at hindi naman niya personal na nakita na ako ay lulan ng sinasabi nilang sasakyan na dapat ay mahanap sa lalong madaling panahon at makasuhan.

Nagkataon umano na may kasamang media si Nebrija na naulinigan ang naturang tawag kaya kumalat ang balita kahit hindi pa nakukumpirma at nang imbestigahan ay wala palang katotohanan ang tawag kaya maging si MMDA Chairman Artes ay nagtungo sa ating tanggapan at sa harap ng media ay humingi rin ng tawad sa kanilang malaking pagkakamali kasabay ng pagpataw ng suspensyon kay Nebrija.

Sino ba naman tayo para hindi magpatawad, hindi naman dapat madamay ang buong ahensya dahil lang sa pagkakamali ng iilan.

Sa isang banda, kung may magandang ibinunga ang pangyayaring ito ay natuklasan nating may mga lumalabag pala sa EDSA busway na pinatatawad base lang sa desisyon ng nakatalagang opisyal kung tutuluyan o hindi.

Sana pantay-pantay ang maging trato ng MMDA sa lahat ng gumagamit ng lansangan, walang VIP treatment, basta nagkamali ay tiketan at wala sanang palakasan at pakisamahan pagdating sa pagpapatupad ng batas maliban sa mga awtorisado na iilan lang naman.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com

Online fixers nagkalat, OFWs ‘wag magpapaloko

ni Bong Revilla @Anak ng Teteng | November 15, 2023

Noong nakaraang Lunes ay nagbigay tayo ng manifestation sa gitna ng deliberasyon ng FY 2024 budget ng Department of Migrant Workers (DMW) hinggil sa ginagawang pambibiktima ng mga fixer sa ating mga overseas Filipino workers (OFWs).

Nadiskubre kasi natin na sa rami ng mabibiktima ng mga manloloko ay mga OFW pa na wala nang inisip kundi ang suungin ang hirap at kung paano matatagalan ang pagiging homesick sa ibang bansa para lamang matustusan ang kani-kanilang pamilya tapos sasamantalahin lang ng mga oportunista online.

Mabuti nga at nadiskubre natin ang panlolokong ito ng mga fixer online dahil kung hindi ay tiyak na marami pang OFW ang mabibiktima dahil na rin sa kapabayaan at kakulangan ng tamang impormasyon.

Naglabas kasi ang DMW ng Mobile APP-para sa OFW Pass na kasalukuyang isinasagawa na ang pilot test run sa 10 bansa na kinabibilangan ng Kingdom of Saudi Arabia, United Arab Emirates, Singapore, Hong Kong, Malaysia, Qatar, Oman, Taiwan, Japan, at United Kingdom.

Ang DMW App ay isang makabagong solusyon na idinisensyo para sa mga OFWs, ito ay isang komprehensibong mobile platform para mapahusay ang paglalakbay sa ibang bansa sa pamamagitan ng pagbibigay ng mahahalagang serbisyo gaya ng pagkuha ng OFW Pass.

Ang OFW Pass ay magsisilbing patunay bilang isang OFW at kinakailangang hakbang sa pagkuha ng Exit Clearance para sa OFWs na may aktibong kontrata. Bukod sa ‘tamper-proof’, isa rin sa ginhawang hatid ng digital identification na ito ay katiyakang magiging mas maayos ang pakikipag-ugnayan sa mga employer, ahensya ng pamahalaan at mga service provider. Magiging kapalit ito ng kasalukuyang OEC.

Ang pagkakaiba ng OEC ay kailangang pisikal na pumila upang makakuha nito, mayroon din itong 60 days na validity para magamit, kailangan ding magbayad ng P100 para sa pagproseso ng OEC at itinuturing itong Proof of OFW legitimacy.

Hindi tulad ng OFW Pass na puwedeng kunin online at QR-code generated, ang validity nito ay base sa haba ng kontrata ng isang OFW, higit sa lahat ay libre at proof of OFW legitimacy din ito ngunit may karagdagang mas madaling connectivity sa iba pang government apps.

Ibig sabihin, kahit may umiiral na panuntunan na dapat sundin ay tila may kahirapan at kalituhan sa panig ng mga OFW na nakita ng mga oportunistang fixer kaya nagkaroon sila ng ideya na pagkakitaan.

Dahil hindi naman lahat ng OFW ay basta-basta na lamang maloloko kaya nakatanggap tayo ng mga sumbong hinggil sa talamak na bentahan ng OFW Pass at nang minsan nating sinubukang makipag-usap sa mga fixer ay napatunayan nating totoo ang mga sumbong.

Maganda kasi ang layunin ng programang ito na pinangunahan pa noon ng namayapang si dating DMW Secretary Toots Ople na kailangang mag-isyu ng OEC para sa mga rehires o ‘Balik-Manggagawa’ ng walang bayad.

Maging ang tanggapan ng DMW mismo ay inuulan na rin ng reklamo kaya nga nakipag-ugnayan na sila sa National Bureau of Investigation Cybercrime Division at Department of Information and Communications Technology (DICT) para masakote ang mga nasa likod nito.

Sa isang banda ay binibigyang pansin din natin ang naging hakbang na ito ng DMW dahil sa kitang-kita naman ang napakabuti nilang hangarin na mapabilis ang serbisyo para sa kapakanan ng mga OFWs.

Ang problema lamang ay hindi nila napaghandaan na may butas pala ang kanilang pinaiiral na panuntunan at nagkaroon tuloy ng ideya ang mga masasamang loob online at pinagkakitaan pa ang ating mga OFWs.

Tutal nabulgar na ang problemang ito, sana lang ay pag-aralang mabuti ng DMW ang kanilang panuntunan, gawing mas simple at lawakan ang kamalayan hinggil dito para maiparating sa lahat ng OFW na ito ay walang bayad na serbisyo ng pamahalaan.

Sa panig naman ng NBI at ibang ahensya ng pamahalaan, hindi sana manatiling nakabinbin lang sa kani-kanilang tanggapan ang reklamo hinggil sa napakaraming OFW na naloko dahil dapat ay masugpo ang ganitong sistema sa lalong madaling panahon.

Kailangang may masampolan, kailangang may maipakita tayo sa publiko na may nasakote ang pamahalaan upang hindi na maulit pa ang mga ganitong panloloko at kung kailangang iharap sa media ay gawin natin.

Sampahan dapat ng kaukulang kaso ang sinumang masasakote na nambibiktima ng OFW online at kayang-kayang gawin ‘yan dahil talamak ngayon ang operasyon ng mga fixer online na ito.

Upang hindi maloko ang ating mga OFW ay mabuting diretsong magtungo sa www.dmw.gov.ph at basahing mabuti at sundin ang guidelines at mapapatunayang wala itong bayad.

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com