DND, pumalag... Batanes, inaangkin ng China

by Jeff Tumbado @News | September 5, 2026

Photo: File / Department of National Defense

Mariing kinondena ng Department of National Defense (DND) nitong Biyernes ang isang artikulo ng Chinese state media na nagsasabing hindi kabilang sa teritoryo ng Pilipinas ang Batanes.

Ang pahayag ng DND ay kasunod ng inilathalang opinion piece ng state-run Global Times noong Setyembre 3 na may pamagat na “History shows that Batanes Islands do not belong to the Philippines.”

Isinulat ito ni Wang Yuanyuan, assistant research fellow sa National Institute for South China Sea Studies – Center for South China Sea History and Culture.

Sa artikulo, iginiit ni Wang na batay umano sa kasaysayan at batas, bahagi ng Taiwan ang Batanes at walang legal na batayan upang isama ang mga isla sa teritoryo ng Pilipinas.

Iginiit din ng Global Times na may mga Chinese na nanirahan umano sa Batanes “mula pa noong sinaunang panahon” at may kasaysayan at kultural na ugnayan ang mga residente nito sa Taiwan.

Bilang tugon, tinawag ng DND ang naturang artikulo na “state-sponsored propaganda” at sinabing isa itong halimbawa ng patuloy na pagpapakalat ng China ng mga baluktot na naratibo sa buong mundo.

Binigyang-diin ng kagawaran na hindi kailanman naging bahagi ng China ang Batanes o alinmang teritoryo ng Pilipinas, at hindi nito hahayaang maapektuhan ang soberanya at teritoryal na integridad ng bansa.

“Mariing kinokondena ng Department of National Defense ang state-sponsored propaganda na nag-aangking bahagi ng Tsina ang Batanes. Patunay lamang ito sa patuloy na pagpapakalat ng Tsina ng mga baluktot na naratibo sa buong mundo,” pahayag ng DND.

Pag-aangkin ng China sa Batanes, pinalagan

ni Mylene Alfonso @News | July 11, 2026

Photo: Ang mga bangkang pangisda sa Zambales sa pamamagitan ng aerial view sa makasaysayang sea formation sa pagbuo ng watawat ng Pilipinas sa karagatan na sakop ng Subic bilang paggunita sa ika-10 anibersaryo ng 2016 Arbitral Award na pumabor sa Pilipinas sa usapin ng West Philippine Sea (WPS). (Jeff Tumbado)

Tinutulan ni Dr. Jose Antonio Goitia ang umano’y pag-aangkin ng ilang iskolar na Tsino sa Batanes at iginiit na matagal na itong kinikilalang bahagi ng teritoryo ng Pilipinas batay sa kasaysayan, batas at tuloy-tuloy na pamamahala ng bansa.

Ayon kay Goitia, walang internasyonal na kasunduan o desisyon ng alinmang pandaigdigang hukuman na kumikilala sa Batanes bilang bahagi ng China, kaya walang batayan ang naturang pahayag.

Sinabi rin niya na nanatiling nasa ilalim ng pamamahala ng Pilipinas ang Batanes mula pa noong panahon ng mga Espanyol at Amerikano hanggang sa kasalukuyang Republika ng Pilipinas.

Binigyang-diin pa ni Goitia na ang soberanya ng isang bansa ay hindi nakabatay sa lapit ng teritoryo o mga propaganda, kundi sa kasaysayan, batas at matatag na pamamahala.

Nagbabala rin siya laban sa paggamit ng mga mapa at iba pang naratibo upang baluktutin ang kasaysayan at impluwensiyahan ang pananaw ng pandaigdigang komunidad.

Batanes niyanig ng magnitude 5.2 na lindol

ni Jasmin Joy Evangelista | March 27, 2022

Niyanig ng magnitude 5.2 na lindol ang Basco, Batanes nitong Sabado ng gabi, ayon sa Philippine Institute of Volcanology and Seismology (PHIVOLCS).

Ayon sa PHIVOLCS ang epicenter ng lindol, na tumama bandang 9:53 p.m., ay 40 kilometers northeast ng Basco.

Ito ay tectonic na may lalim na 29 kilometers, at naramdaman ang Intensity III sa Basco.

Nagpaalala naman ang ahensiya na posibleng makaranas ng aftershocks matapos ang naturang lindol.

Sa panayam sa Super Radyo dzBB ngayong Linggo, sinabi ni PHIVOLCS Director at Science Undersecretary Renato Solidum Jr. ang ang lindol ay dulot ng nabuong fault dahil sa pagtama ng kontinente ng Asya sa tip ng northern Luzon.

"Sa Batanes kasi maraming fault sa lupa, at ito ay dulot ng collision ng kontinente ng Asia doon sa dulo ng northern Luzon. Ang Batanes at Taiwan island ay collision zone, binabangga, kaya paminsan-minsan ay may lindol sa dagat na nararamdaman ng mga isla malapit sa Batanes," ani Solidum.