Pangarap na Olympics ng Gilas, nilusaw ng South Sudan

ni Anthony E. Servinio @Sports | August 31, 2023

Paalam Paris Olympics 2024. Naglaho ang pangarap ng Gilas Pilipinas na mapabilang sa pinakamalaking palaro sa buong mundo at lumasap ng 87-68 talo sa Timog Sudan sa Classification Round ng 2023 FIBA World Cup Huwebes ng gabi sa Araneta Coliseum.

Pinagbayaran ng mga Pinoy ang kanilang malamyang simula kung saan tumalon sa maagang 12-2 bentahe ang mga bisita. Mula doon ay hindi nakatikim ng lamang o kahit tabla ang Gilas sa gitna ng matinding shooting at pisikal na depensa ng Timog Sudan na naglalaro sa kanilang pinakaunang World Cup.

Sinubukan pa rin pumalag ng Gilas at ipinasok nina Jordan Clarkson, AJ Edu at Kai Sotto ang unang anim na puntos ng fourth quarter at naging apat na lang ang agwat, 56-60.

May nakahandang sagot ang Timong Sudan at sabay gumana ang laro nina Carlik Jones, Wenyen Gabriel at Nuni Omot at lumobo muli ang agwat bago ang last two minutes, 78-63.

Pinatunayan ni Jones bakit siya ang MVP ng NBA G League at kinulang ng isang rebound para sa triple double sa kanyang 17 puntos, siyam na rebound at 14 assist. Sinuportahan siya nina Omot at Majok Deng na parehong may tig-13 puntos.

Si Jordan Clarkson muli ang nanguna sa Pilipinas na may 24 puntos. Nasayang ang 20 puntos at 12 rebound ni Dwight Ramos habang ipinasok ni Edu ang 10 ng kanyang kabuuang 12 puntos sa first quarter na may kasamang 14 rebound.

Kasabay ng laro ay nagwagi ang co-host Japan sa Venezuela, 86-77, sa Okinawa Arena at literal na isara ang pinto ng Olympics sa Gilas. Ito na ang ikalawang panalo ng mga Hapon na humugot ng 23 puntos kay Makoto Hiejima.

Hindi rin nakatulong sa mga wala pang panalong Pinoy ang tagumpay ng isa pang Asyano Lebanon sa Cote D’Ivoire, 94-84, sa Jakarta. Tanging ang numero unong Asyano lang ang tutuloy sa Pransiya at imposible na ito kahit magwagi ang Gilas sa Tsina sa huli nilang laro sa Sabado.

Italya sakalam kontra Gilas

ni Anthony E. Servinio @Sports | August 29, 2023

Hindi nakisama ang tadhana sa Gilas Pilipinas at lumasap ng mapait na 83-90 talo sa bisita Italya at masarahan ng pinto sa Round Two ng 2023 FIBA World Cup Martes ng gabi sa Araneta Coliseum. Nagtapos ang mga Pinoy sa ilalim ng Grupo A na walang panalo sa tatlong laro.

Bitbit ang layunin na magwagi ng 12 o higit na puntos, isang ganadong Gilas ang lumabas para sa first quarter at itinayo ang 23-20 bentahe sa likod nina Roger Pogoy, Dwight Ramos at Jordan Clarkson. Subalit nagising ang Italya at naagaw ang lamang sa halftime, 48-39, sa pagbida ni Simone Fontecchio na kakampi ni Clarkson sa Utah Jazz. Mula doon ay inalagaan ng Italya ang kanilang lamang na lumobo hanggang 80-62 sa dunk ni Nicolo Melli na may 6:55 sa orasan.

Nabuhayan ang Gilas at nagawang lumapit ng pito, 81-88, sa saksak ni Jamie Malonzo subalit na nabura ng mga free throw Alessandro Pajola at 32 segundo sa orasan. Nanguna sa Italya si Fontecchio na nagbagsak ng 18 at Giampaolo Ricci na may 14 puntos. Nagpaulan ng kabuuang 17 three-points ang Italya kumpara sa 10 lang ng Gilas. Hindi sumapat ang 23 puntos ni Clarkson. Tanging si Ramos ang kakamping may higit 10 na 14 puntos.

Ang Dominican Republic (3-0) at Italya (2-1) ang kakatawan sa Grupo A sa Round Two. Sasamahan ng Angola (1-2) ang Pilipinas (0-3) sa labanan para sa ika-17 hanggang ika-32 puwesto.

Haharapin sunod ng mga Pinoy ang mga ikatlo at ika-apat na koponan ng Grupo B sa Round Two ngayong Huwebes at Sabado. Kailangan din nila walisin ang mga ito upang mapanatili ang pag-asa na makapasok sa 2024 Paris Olympics bilang pinakamataas na bansang Asyano.

Gilas 'di pinaporma ng Angola

ni Anthony E. Servinio @Sports | August 27, 2023

Naubusan ng lakas ang Gilas Pilipinas sa huling mga minuto at pabayaan ang bisitang Angola na maukit ang 70-80 na tagumpay sa pagpapatuloy ng 2023 FIBA World Cup sa Araneta Coliseum, Linggo ng gabi.

Kahit hindi nakuha ang inaasam na resulta, may pag-asa pa rin ang mga Pinoy na makapasok sa sunod na yugto ng torneo papasok sa huling araw ng group stage sa Martes.

Lamang lang ng 56-52 ang Angola at biglang napalaki nila ito sa 73-57 na may 3:39 nalalabi. Subalit hindi basta sumuko ang Pinoy at hinimok ng 12,784 tagahanga at rumatrat ng 11 sunod-sunod na puntos upang magbanta sa mga free throw ni Kai Sotto, 68-73, at 1:12 sa orasan.

Biglang pinatay ng three-points ni Gerson Domingos ang sunog, 76-68, at ito na ay sapat sa huling 47 segundo. Kinapos sa oras ang Gilas sa gitna ng mga pahabol nina Jordan Clarkson at AJ Edu.

Limang Angolan ang nagtapos na may 10 o higit na puntos sa pangunguna ni Gerson Goncalves na may 17 at Domingos na may 15. May 14 puntos si Bruno Fernando na namayani laban sa mga higante ng Gilas.

Nanguna sa Gilas si Clarkson na may 21 puntos. Walang nakaabot ng 10 puntos at siyam lang si Edu at tig-walo sina Sotto, Dwight Ramos at Roger Pogoy.

Maaaring tumabla ang Pilipinas, Italya at Angola sa 1-2 at gagamit ng FIBA quotient upang malaman kung sino sa kanila ang tutuloy. Para mangyari ito, dapat manalo ang Gilas sa Italya at parisan ng talo ng Angola sa Dominican Republic.

Nanaig ang mga Dominicano sa mga Italyano sa pambungad na laban, 87-82, upang buksan ang pinto para sa mga Pinoy. Tumira ng tig-24 puntos sina Karl-Anthony Towns at Andres Feliz.