Balik-eskwela, bantay-sarado sa 55K pulis

ni Jeff Tumbado @News | June 8, 2026

Photo: PNP

Habang milyun-milyong estudyante ang muling magbabalik sa kanilang mga paaralan ngayong Lunes, tiniyak ng Philippine National Police (PNP) na handa at nakapuwesto na ang kanilang mga tauhan upang matiyak ang kaligtasan ng mga mag-aaral sa buong bansa.

Sa isang pahayag nitong Linggo, sinabi ni PNP Chief General Jose Melencio Nartatez Jr. na nananatiling pangunahing prayoridad ng PNP ang pagprotekta sa mga estudyante, kung saan mahigit 55,000 personnel ang nakatalaga sa ilalim ng Oplan Balik-Eskwela.

Ayon kay Nartatez, kasama sa komprehensibong deployment ang mga pulis na magsasagawa ng high-visibility patrols sa paligid ng mga paaralan, pamamahala sa trapiko, at pagmamando ng mga police assistance desk, na susuportahan ng auxiliary forces at mga community partners.

Naglatag din ang PNP ng 9,319 police assistance desks sa mga paaralan at clustered campuses sa buong bansa. 

Magpapakalat din ng 9,525 mobile patrol units upang palakasin ang presensya ng pulisya at mapabilis ang pagtugon sa anumang emerhensiya sa mga school zones.

Tiniyak din niya na ang mga operasyon laban sa krimen, intelligence operations, at mga programang pangseguridad sa mga komunidad ay mananatiling ganap na aktibo at hindi maaantala sa kabila ng malawakang deployment para sa pagbubukas ng klase.

Para sa paghahanda sa muling pagbubukas ng klase, mga mamimili nagdagsaan

ni Jeff Tumbado @News Photo | August 22, 2023

Tila box office hit sa sinehan ang mahaba at mabagal na usad ng mga customer sa isang kilalang bookstore sa mall sa Quezon City dahil na rin sa nagdagsaan ang mga mamimili ng school supplies para sa kani-kanilang mga anak para sa paghahanda sa muling pagbubukas ng klase sa Agosto 29.

Brigada eskwela sa EMBO barangays, umarangkada

ni BRT @News | August 15, 2023

Napuno ng bayanihan ang simula ng Brigada Eskwela ng pamahalaang lungsod ng Taguig at mga stakeholder ng edukasyon sa mga paaralang nasa EMBO barangays.

Masigla naman ang pagtanggap kay Mayor Lani Cayetano ng mga opisyal ng Kagawaran ng Edukasyon, mga principal, guro, estudyante, magulang at volunteer sa panimula ng programa.

Simula sa Makati Science High School, ang kick-off ceremony ng Brigada Eskwela ay naging matagumpay matapos magkaisa ang grupo ng mga boluntaryo, kabilang ang mga mula sa Taguig City Police Station, National Capital Region Police Office, Southern Police District, Bureau of Fire Protection, pati na rin mga kinatawan mula sa iba't ibang mga grupo at organisasyon sa mga barangay.

Tiniyak naman ng lokal na pamahalaan ng Taguig na susuportahan ang mga paaralan sa mga EMBO barangay sa kanilang pagbubukas ng school year.

Siya ay humiling sa mga opisyal at miyembro ng General Parents Teachers Association na magkaroon ng pang-unawa at pasensya habang nagaganap ang transisyon o ang proseso ng paglipat

Kasama rin sa kick-off ceremony si Dr. Cynthia Ayles, Taguig-Pateros School’s Division Superintendent. Ipinunto niya na ang Brigada Eskwela ay tutulong sa layunin ng DepEd na palakasin ang komunidad para sa mga estudyante nito at itanim ang pagmamahal sa bayan.