Epekto ng pagpapatawad sa legal na hiwalayan

ni Atty. Persida Rueda-Acosta - @Magtanong Kay Attorney | September 24, 2022

Dear Chief Acosta,

Inabandona ako ng aking asawa nang walang dahilan isang buwan bago ako manganak. Bumalik siya matapos ang mahigit dalawang taon pagkatapos kong manganak. Pinatawad ko siya sa pag-abandona niya sa akin at nagsama kami ulit bilang mag-asawa, pero napansin kong hindi na namin mahal ang isa’t isa. Posible bang maging legal ang paghihiwalay naming mag-asawa dahil inabandona niya kaming mag-ina noon? - Tita

Dear Tita,

Ang sagot sa iyong katanungan ay makikita sa Artikulo 55 (10) at 56 (1) ng Family Code of the Philippines na nagsaad na:

“ARTICLE 55. A petition for legal separation may be filed on any of the following grounds:

xxx

(10) Abandonment of petitioner by respondent without justifiable cause for more than one year.

ARTICLE 56. The petition for legal separation shall be denied on any of the following grounds:

(1) Where the aggrieved party has condoned the offense or act complained of; xxx (Binigyang diin)

Malinaw na nakasaad sa batas na ang pag-abandona sa asawa nang walang makatwirang dahilan nang higit sa isang taon ay isa sa mga batayan sa pagsasampa ng kasong legal na paghihiwalay (legal separation). Gayunman, ang petisyon para sa nasabing kaso ay dapat i-deny kapag ang naagrabyado na partido ay pinatawad (condoned) ang pagkakasala. Samakatwid, ang pagpapatawad sa nagawang kamalian ay balakid sa kasong legal na paghihiwalay.

Sa iyong sitwasyon, may posibilidad na hindi igawad ng hukuman ang iyong hiling na legal na paghihiwalay kapag nalaman nito na pinatawad mo na ang iyong asawa sa pag-abandona sa inyo ng iyong anak at nagkabalikan pa kayong mag-asawa.

Sana ay nabigyan namin ng linaw ang iyong katanungan. Ang payong aming ibinigay ay base lamang sa impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Kaalaman tungkol sa serbisyong legal ng PAO

ni Atty. Persida Rueda-Acosta - @Magtanong Kay Attorney | September 23, 2022

Dear Chief Acosta,

Nais ko sanang humingi ng tulong para sa nobyo ko na kinasuhan ng nanay ng kanyang anak. Ano ba ang kailangan niyang ipresenta sa inyong tanggapan para mabigyan siya ng legal na tulong? Wala kasi siyang trabaho sa ngayon. Magkakaroon din kaya ng problema kung sakaling nakalapit na ang nanay ng kanyang anak sa inyong opisina? - Nimpha

Dear Nimpha,

Ang aming Tanggapan na Public Attorney's Office (PAO) ay nagbibigay ng libreng serbisyong legal para sa mga maralita at iba pang mga kuwalipikadong tao. Upang mabigyan ng kagyat at angkop na legal na tulong ang iyong nobyo kaugnay sa kaso na isinampa laban sa kanya ng nanay ng kanyang anak, magsadya lamang kayo sa pinakamalapit na sangay ng PAO sa inyong lugar.

Karaniwang matatagpuan ang PAO district offices sa loob o malapit sa munisipyo, kapitolyo, city hall o mga hall of justice ng bawat bayan, siyudad o probinsya. Pinakamainam na dalhin ninyo ang mga dokumento na mayroong kaugnayan sa nabanggit ninyong kaso upang ito ay mapag-aralan ng abogado na maitatalaga sa iyong nobyo.

Maliban sa nabanggit, magiging mainam din na magdala kayo ng katibayan ng kinikita ng iyong nobyo sa inyong pagbisita sa PAO district office upang matingnan kung siya ba ay kwalipikado upang maging kliyente ng aming opisina. Ito ay alinsunod sa Artikulo 3, Chapter II ng aming 2021 Binagong Manwal Para sa Operasyon ng Tanggapan ng Abogado ng Bayan o Public Attorney's Office (PAO) [2021 Binagong Manwal]:

“x x x

Upang matiyak na iyon lamang mga kwalipikado ang mabibigyan ng libreng serbisyong legal at representasyon sa mga hukuman at iba pang mala-hukumang ahensya (quasi-judicial bodies), at upang magbigay ng gabay nang matiyak ang uri ng mga kaltas, ang aplikante ay kinakailangang magsagawa ng kanyang salaysay na siya ay maralita (Affidavit of lndigency), at magsumite ng mga sumusunod na dokumento:

1. Pinakahuling ulat ng buwis sa kita (Income Tax Return) o katibayan ng sweldo (pay slip), at iba pang patunay na nagpapakita ng net income;

2. Katunayan ng Pagkamaralita (Certificate of Indigency) mula sa Kagawaran ng Kagalingan at Pagpapaunlad Panlipunan (Department of Social Welfare and Development [DSWD]), o City/Municipal Social Welfare and Development Office na mayroong hurisdiksyon o nakakasakop sa lugar kung saan nakatira ang aplikante; o,

3. Katunayan ng Pagkamaralita at/o Walang Kita (Certificate of Indigency and/or No Income) mula sa Tanggapan ng Punong Barangay/Barangay Chairperson na mayroong hurisdiksyon o nakakasakop sa lugar kung saan nakatira ang aplikante.

x x x”

Subalit nais naming bigyang-diin na kung nauna nang nakalapit ang nanay ng anak ng iyong nobyo sa aming Tanggapan at siya ay nabigyan na ng masusing legal na pagpapayo at/o legal na representasyon ay hindi na maaaring matulungan ng aming opisina ang iyong nobyo sapagkat magkakaroon ng conflict of interest. Ipinagbabawal ang pagrerepresenta ng magkasalungat na interes. Sa katunayan, ito ay nakasaad sa Artikulo 8, Chapter II ng aming 2021 Binagong Manwal:

“ARTIKULO 8. Mga Kasong Hindi Dapat Hawakan. Ang mga Manananggol Pambayan ay hindi dapat magbigay ng serbisyong legal sa mga kliyente na ang kaso ay gaya ng sumusunod:

1. Kung mayroong tinatawag na magkasalungat na interes (conflict of interests) sa kasong hinawakan o hinahawakan at legal na serbisyo na ibinigay o ibinibigay ng isang Manananggol Pambayan;

x x x”

Gayunman, maaari ninyo ring subukan na lumapit sa ibang tanggapan/organisasyon/asosasyon na nagbibigay ng libreng serbisyong legal o sa mga unibersidad o kolehiyo na mayroong mga programang free legal aid.

Sana ay nabigyan namin ng linaw ang iyong katanungan. Ang payong aming ibinigay ay base lamang sa impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Parusa sa estudyanteng nagpapanggap na biktima ng bullying kahit hindi naman

ni Atty. Persida Rueda-Acosta - @Magtanong Kay Attorney | September 19, 2022

Dear Chief Acosta,

May kaibigan ako sa aming paaralan na nagsasabing siya ay biktima ng bullying. Ngunit nalaman ko na hindi siya nagsasabi ng totoo at gusto lamang niyang maparusahan ang kinaiinisan niyang estudyante. Nais ko lamang malaman kung ano ang kaparusahang maaaring ipataw ng paaralan sa estudyante kung ito ay mapatunayang nagsinungaling lamang o gumawa ng kuwento na siya ay biktima ng bullying? - Myrna

Dear Myrna,

Para sa iyong kaalaman, alinsunod sa Republic Act No. 10627 o ang “Anti-Bullying Act of 2013”, ang mga paaralan ay kailangang magtalaga ng mga polisiya tungkol sa bullying, kasama na ang pagdisiplina sa estudyante na maghahayag ng maling paratang ng bullying. Ayon sa Seksyon 3 (e) ng nasabing batas:

“SEC. 3. Adoption of Anti-Bullying Policies. – All elementary and secondary schools are hereby directed to adopt policies to address the existence of bullying in their respective institutions. Such policies shall be regularly updated and, at a minimum, shall include provisions which:

xxx

(e) Subject a student who knowingly makes a false accusation of bullying to disciplinary administrative action;”

Bukod dito, ayon sa Section 10 (B) (i), Rule VI ng Implementing Rules and Regulations (IRR) ng nasabing batas:

“i. False Accusation of Bullying

If the student, after an investigation, is found to have knowingly made a false accusation of bullying, the said student shall be subjected to disciplinary actions or to appropriate interventions in accordance with the existing rules and regulations of the Department or the private school.”

Base sa nabanggit na panuntunan, ang estudyanteng mapatutunayang sadyang gumawa ng maling akusasyon kaugnay ng bullying ay mapapatawan ng kaukulang pagdidisiplina o sumailalim sa nararapat na pakikialam o intervention sang-ayon sa mga umiiral na patakaran at regulasyon ng Kagawaran ng Edukasyon o ng paaralang kanyang kinabibilangan.

Kaya naman, dapat mong payuhan ang iyong kaibigan tungkol sa maaari niyang harapin kung patuloy siyang magbibigay ng maling paratang ng bullying. Ang bullying ay seryosong paratang na hindi dapat ginagamit para sa pansariling kalamangan. Bagkus, ito ay dapat lamang gamitin sa mga sitwasyon na totoong nagkaroon ng bullying kung saan ang parehong biktima at bully ay nangangailangan ng tulong upang maituwid o mapabuti ang kanilang mga landasin.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.