Parusa sa amo na 'di pinakain ang kasambahay dahil nakabasag ng pinggan at baso

ni Atty. Persida Rueda-Acosta @Magtanong Kay Attorney | April 27, 2023

Dear Chief Acosta,

Isa akong kasambahay sa loob ng dalawang taon. Noong nakaraang linggo, nakagawa ako ng isang maliit na pagkakasala sa aking amo dahil nakabasag ako ng isang pinggan at baso.

Dahil dito, sinabihan niya ako na tatanggalan niya ako ng pagkain sa tanghalian bilang parusa at hindi hahayaan na matulog sa maid’s quarter sa loob ng isang linggo.

Ang parusa bang ito ay naaayon sa batas? Salamat sa inyong tugon. –Pining

Dear Pining,

Ang sagot sa iyong katanungan ay matatagpuan sa Seksyon 6 ng Republic Act (R.A.) No. 10361, kilala bilang “Domestic Workers Act” o “Batas Kasambahay,” na nagsasaad na:

“Section 6. Board, Lodging and Medical Attendance. – The employer shall provide for the basic necessities of the domestic worker to include at least three (3) adequate meals a day and humane sleeping arrangements that ensure safety.

At no instance shall the employer withdraw or hold in abeyance the provision of these basic necessities as punishment or disciplinary action to the domestic worker.”

Ayon sa nasabing probisyon na batas, inaatasan ang mga amo na magbigay ng mga pangunahing pangangailangan ng kanilang mga kasambahay tulad ng tatlong sapat na pagkain sa isang araw at makatao na pagsasaayos ng tulugan upang masigurado ang kanilang kaligtasan. Ipinagbabawal ng batas, sa kahit anong pangyayari na tanggalin o ihinto ang pagbibigay ng nasabing benepisyo sa kanilang mga kasambahay bilang parusa o pagpapataw ng disiplina sa nagawang pagkakasala. Sa iyong nabanggit na sitwasyon, isang paglabag sa batas ang ginawang pagtanggal ng pagkain sa tanghalian at hindi pagpapatulog sa maid’s quarter sa loob ng isang linggo bilang parusa sa nagawa mong pagkakamali. Para sa iyong kaalaman, ang paglabag sa R.A. No. 10361 ay may karampatang parusa na nasasaad sa Seksyon 40 nito, kung saan maaaring magbayad ng multa na nagkakahalaga ngP10,000 hanggang P14,000 ang nagkasala.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.

Mga dahilan para maremata ang isang family home

ni Atty. Persida Rueda-Acosta @Magtanong Kay Attorney | April 26, 2023

Dear Chief Acosta,

Isinangla ng aking mga magulang ang aming bahay sa isang bangko upang makapag-umpisa ng negosyo, at mayroon silang pinirmahang Deed of Mortgage para rito. Sa kasamaang-palad, hindi na nila nabayaran ang kanilang utang at sinabihan kami ng bangko na ireremata na diumano ang aming bahay. Ito lamang ang naipundar na ari-arian ng aking mga magulang. May nakapagsabi sa akin na hindi diumano maaaring maremata ang isang family home. Tama ba ito? –Katya

Dear Katya,

Para sa iyong kaalaman, ayon sa Artikulo 155 ng Family Code of the Philippines, ang family home ay hindi maaaring makuha ng mga creditors. Ngunit may mga exceptions pa rin ukol dito. Ayon sa nasabing batas:

“Article 155. The family home shall be exempt from execution, forced sale or attachment except:

(1) For non-payment of taxes;

(2) For debts incurred prior to the constitution of the family home;

(3) For debts secured by mortgages on the premises before or after such constitution; and

(4) For debts due to laborers, mechanics, architects, builders, materialmen and others who have rendered service or furnished material for the construction of the building.”

Samakatuwid, sa kadahilanang isinangla ang inyong bahay ng iyong mga magulang bilang seguridad sa kanilang inutang na may kaakibat pang Deed of Mortgage, ang iyong sitwasyon ay exception sa general rule at maaaring maremata ng bangko ang inyong bahay kahit ito ay isang family home. Ang pagremata ay maaaring mangyari sa pamamagitan ng judicial foreclosure kung saan maghahain ng kaso ang bangko sa korte o extra-judicial foreclosure, kung ito ay napagkasunduan sa Deed of Mortgage.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala

Illegal dismissal, obligasyon ng empleyado na patunayan

ni Atty. Persida Rueda-Acosta @Magtanong Kay Attorney | April 25, 2023

Dear Chief Acosta,

Sinabihan ako ng aking amo sa kanyang opisina na tanggal na diumano ako sa trabaho kaya hindi na ako bumalik pa. Nang magkaharap kami upang magkasundo, itinanggi niya na tinanggal niya ako. Wala akong ebidensya o testigo para patunayan ang pagtanggal sa akin.

Obligasyon ba ng amo ko na patunayan na tinanggal niya ako? –Jussell

Dear Jussell,

Ang iyong katanungan ay tinalakay na ng ating Kagalang-galang na Korte Suprema sa kasong “ITALKARAT 18, INC. vs. Juraldine N. Gerasmio” (G.R. No. 221411, 28 September 2020), na isinulat ni Kagalang-galang na Kasamang Mahistrado Ramon Paul L. Hernando, kung saan binigyang-linaw na ang katotohanan ng pagtatanggal sa trabaho, kung pinagtatalunan, ay dapat na patunayan ng nagrereklamong empleyado:

“Indeed, in illegal dismissal cases, the burden of proof is on the employer in proving the validity of dismissal. However, the fact of dismissal, if disputed, must be duly proven by the complainant.

We have held in Machica v. Roosevelt Services Center, Inc.:

The rule is that one who alleges a fact has the burden of proving it; thus, petitioners were burdened to prove their allegation that respondents dismissed them from their employment.

It must be stressed that the evidence to prove this fact must be clear, positive and convincing.

The rule that the employer bears the burden of proof in illegal dismissal cases finds no application here because the respondents deny having dismissed the petitioner.”

Ayon sa nabanggit na kaso, ang katotohanan ng pagtatanggal sa trabaho, kung pinagtatalunan, dapat patunayan ng nagrereklamong empleyado. Ito ay alinsunod sa tuntunin na ang sinumang nag-aakusa ng isang katotohanan ay may pasanin na patunayan ito.

Batay sa iyong salaysay, itinanggi ng amo mo ang pagtatanggal sa iyo. Samakatuwid, hindi obligasyon ng iyong amo na patunayan na tinanggal ka niya dahil pinagtatalunan ang katotohanan nito kaya dapat mo itong patunayan.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa iyong patuloy na pagtitiwala.